Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Anjo Naaman panglima tantarana tu Siria sannaka ningaina siagang nipakala’biri’na ri karaeng Siria. Nasaba’ tete ri Naaman, nisarei pammetang ri Batara tantara Siria. Anjo Naaman panglima sanna’ baranina, mingka natabai garring sala.

² Ri se’reang wattu battui tu Siria ambunduki pa’rasangang Israel. Lalang anjo pa’bundukanga nia’ sitau ana’ baine tu Israel nijakkala’ nampa nierang salaku tunitahang, nampa nipa’jari palayang untu’ bainenna Naaman.

³ Ri se’reang allo nakanamo anjo palayanga mae ri pinggawana, "Ibu’, ebara’ angkana a’lampa bapaka mange ri na’bi niaka ammantang ri Samaria, mattantuna lanipammollei bapaka ri anjo na’bia."

⁴ Nalangngere’na Naaman anjo passalaka, a’lampami mange ri karaenga nampa nacarita anjo apa le’baka napau anjo ana’ bainea.

⁵ Nakanamo karaenga, "Baji’mi, a’lampamako mange ri karaeng Israel. Lannulisikka’ sura’ mae ri ia." Jari a’lampami Naaman, nangngerang 30.000 doe’ pera’, 6.000 doe’ bulaeng, siagang 10 pasang pakeang ga’ga ngaseng.

⁶ Anjo sura’ naeranga kammai anne bonena: "Tete ri anne suraka kupappiassengangi panglimaku, iamintu Naaman, mae ri katte sollanna akkulle kipammolle battu ri garrinna."

⁷ Ri wattunna nabaca karaeng Israel anjo suraka, nakekke’-kekke’mi pakeanna napakamma lussa’, na nakana, "Ballasa’ma’ nakke! Apa saba’na nanapala’ karaeng Siria sollanna kupammolle anne taua? Teai inakke Allata’ala, Ia niaka koasaNa untu’ ampattallasaki yareka ampamatei rupa taua. Ma’nassa ero’naja anjo karaeng Siria a’boya pa’bettesang mae ri nakke!"

⁸ Nalangngereki Na’bi Elisa anjo passalaka, nampa akkirimmo pasang mae ri karaeng Israel angkana, "Angngapa nulussa’? Suroi anjo taua battu mae ri nakke sollanna naasseng angkanaya ri anne Israel nia’ sitau na’bi!"

⁹ Lanri kammana anjo a’lampami Naaman siagang kareta jaranna mange ri balla’na Elisa, nampa ammantang ri dallekanna pakke’buka.

¹⁰ Nasuromi Elisa sitau palayang untu’ akkana kamma anne ri Naaman, "A’lampaki’ a’je’ne’ pintuju ri Binanga Yordan, nakiammolle taba sikali sallang."

¹¹ Nalangngere’na anjo kana kammaya larromi Naaman nampa nakana, "Kupikkiriki angkanaya kalenna lassulu’ ambuntulia’, siagang appala’ doang mae ri Batara, Allata’alana, kammayatompa napagio’ limanna irateanna anne kalengku garringa nampa a’jari bajikka’.

¹² Binanga Abana siagang Parpar ri Damsyik la’bi bajikangngangi na binanga manna pole kemae binanga niaka ri Israel. Akkullea’ a’je’ne’ anjoreng nampa a’jari bajikka’!"

¹³ Mingka nalangngere’mi palayang-palayanna akkana kamma. A’reppese’mi ke’nanga nampa angkana, "Bapa’, ebara’ angkana nisuroki’ anggaukang apa sukkara’, mattantuna lakigaukangi. La’biangampa kanasurojaki’ bawang a’je’ne’ sollanta a’jari baji!"

¹⁴ Lanri kammana anjo a’lampami Naaman mange ri Binanga Yordan nampa antama’ ampaselangi kalenna pintuju sangkamma napassuroanga Elisa. Na’jari baji’mo Naaman. A’jari baji’mi ammotere’ tanja’na kalenna sangkamma kale turungka.

¹⁵ Nampa ammotere’mo siagang sikontu paeranna mange ri Elisa. Nakanamo Naaman ri Elisa, "Kamma-kamma anne kuassemmi angkanaya ri sikontu anne linoa se’reji bawang Allata’ala, iamintu Allata’ala nisombaya ri tu Israel. Lanri kammana anjo kuminasai nakiero’ antarimai anne passareku."

¹⁶ Appialimi Elisa angkana, "Lanri Batara mattallasaka, iamintu kulayania, tena nalakualle manna pole passare apa." Napassa-passami Naaman sollanna ero’ Elisa antarimai passarena, mingka tuli teana Elisa angngallei.

¹⁷ Nampa nakanamo Naaman, "Punna kamma tenana kiero’ antarimai passareku, kipa’biamma’ angngerang butta siapa-siapa jaina akkulle naerang siayoka bagal. Nasaba’ appakkaramula anne wattua tuli lassarea’ koro’bang untu’ Batara bawang, teai untu’ rewata maraengannaya.

¹⁸ Punna sallang musti kururungang karaengku mange assambayang ri tampa’ passambayangang Rimon rewatana Siria, poro Napammopporang laloa’ Batara."

¹⁹ Nakanamo Elisa, "A’lampamako siagang salama’." Nampa a’lampamo Naaman. Tena nasallo a’lampanamo Naaman,

²⁰ appikkiri’mi Gehazi, iamintu palayanna Elisa, angkana, "Eh, angngapa nanilappassang a’lampa natena na’bayara’? Musti natarima bapakku anjo passarena tubattua ri Siria! Lanri Batara mattallasaka, musti kuondangi anjo taua sollangku anggappa apa-apa battu ri ia!"

²¹ Nampa naondammo Gehazi anjo Naaman. Ri wattunna nacini’ Naaman angkanaya nia’ tau battu, naummi battu ri karetana nampa akkuta’nang angkana, "Apa kutadeng?"

²² Appialimi Gehazi angkana, "Kipammopporanga’ Bapa’, nisuroa’ ampauangki’ angkanaya silalonna nia’ rua na’bi lolo battu ri daera Monconna Efraim. Napalaki bapakku sollanna assareki’ 3.000 doe’ pera’ siagang ruampasang pakeang ga’ga untu’ anjo ruaya na’bi."

²³ Nakanamo Naaman, "Tantumi kusarena!" Nampa napassa Gehazi angngerang 6.000 doe’ pera’. Narokoki Naaman anjo doeka lalang rua pa’roko’, nampa angngalle ruampasang pakeang ga’ga. Napassareang kabusu’mi anjo mae ri rua palayanna nasuroa a’jappa riolo ri dallekanna Gehazi.

²⁴ Ri wattunna battumo ri bonto napammantangia Elisa, naallemi Gehazi anjo doeka siagang pakeanga battu ri palayang-palayanna Naaman, nampa naboli’ lalang ri balla’. Nasuromi ammotere’ anjo palayang-palayanga,

²⁵ nampa antama’ ammotere’ ri balla’. Akkuta’nammi Elisa angkana, "Battu kemaeko?" Appialimi angkana, "Tena kubattu kemae-kemae Bapa’!"

²⁶ Mingka nakanamo Elisa, "Niaki anjoreng nyawaku ri wattunna naung Naaman battu ri karetana untu’ ambuntuliko. Anne teai wattunna untu’ anggappa doe’ siagang ammalli koko zaitun, koko anggoro’, gimbala’, sapi siagang ata-ata.

²⁷ Lanri nutarimana anjo passarea, lanutarima tongi anjo garrinna Naaman. Ba’lalo sa’genna satunggu-tungguna sikamma jari-jarinu lanagappai anjo garringa!" Ri wattunna assulu’ Gehazi battu anjoreng, anggappami garring sala, iamintu a’jari kebo’ sikalimi bukkulenna.

2 Raja-raja

Video 2 Raja-raja 5

Ikuti Kami:

KONTAK | PARTISIPASI | DONASI