Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri taung makasampulo assagantuju ammarentana Yosafat salaku karaeng tu Yehuda, Yoram ana’na Ahab a’jari karaeng Israel siagang ammarentai ri Samaria sampulo anrua taung sallona.
2 Ja’dalaki panggaukanna ri paccini’Na Batara, mingka tena nasangkamma ja’dala’na Ahab siagang Izebel, tau toana. Patung napareka manggena untu’ anynyomba Baal le’baki narumbang.
3 Mingka, sangkamma Yerobeam ana’na Nebat ammarentaya rioloannaya, naerang tongi tu Israel mae ri dosaya siagang tena nammari anggaukangi anjo passalaka.
4 Karaeng Mesa battu ri Moab ammarakai gimbala’. Tunggala’ taungi assare 100.000 ana’ gimbala’ siagang 100.000 kukkulu’ gimbala’ laki.
5 Mingka ri wattunna matemo Karaeng Ahab, angngewami Mesa mae ri tu Israel.
6 Lanri kammana anjo akkaro-karomi ambokoi Samaria nampa a’lampa ampasadiai sikontu tantarana.
7 Akkiringi pasang mae ri Karaeng Yosafat battu ri Yehuda angkana, "Angngewami karaeng Moab mae ri nakke; maka ero’jako anrurunganga’ ambaliangi a’bundu’?" Appialimi Karaeng Yosafat angkana, "Baji’mi. Inakke siagang ana’ buaku kammayatompa pasukang a’jarangku lamminawang a’bundu’ anrurungangko.
8 Battu ri oloang kereanga laniolo mange ambunduki?" Appialimi Yoram angkana, "Nialle battui ri oloang allaloa ri Parang Lompo Edom."
9 Jari a’lampami Karaeng Yoram siagang karaeng Yehuda kammayatompa karaeng Edom. Le’baki a’jappa tuju allo, kala’busammi ke’nanga ri je’ne’, sa’genna tenamo nangnginung pasukanna ke’nanga siagang olo’-olo’ angngangkakai baranna ke’nanga.
10 Ammarrammi Karaeng Yoram angkana, "Ballasa’ maki’. Le’ba’mi kutadeng Narancanakang Batara untu’ ampassareangki’ sipattallu mae ri karaeng Moab!"
11 Akkuta’nammi Karaeng Yosafat angkana, "Apaka tena anrinni na’bi akkulle akkuta’nang ri Batara untu’ ikatte ngaseng?" Nia’mo kalase’renna perwira appiali angkana, "Nia’, iamintu Elisa ana’na Safat! Ia riolo pambantuna Na’bi Elia."
12 Nakanamo Karaeng Yosafat, "Kammatojengi! Memang a’bicarai Batara tete ri ia." Jari a’lampami anjo tallua karaeng mange ri Elisa.
13 Nakanamo Elisa ri karaeng Israel, "Angngapa nuppala’ tulung ri nakke? A’lampamako mange appala’ tulung ri na’bi-na’bina tau toanu!" Appialimi Yoram angkana, "Tena! Nasaba’ Batara anrancanakangi untu’ ampassareangi anne ikambe sipattallu mae ri karaeng Moab."
14 Appialimi Elisa angkana, "Lanri Batara mattallasaka, ia kulayania, kulambusiangko kupauang angkanaya ka’de’ teai lanri Karaeng Yosafat kupakalompo, tena nakuero’ siurusu’ siagang ikau.
15 Kamma-kamma anne angngerangko mae sitau pakacaping." Lalang akkarena kacapinna anjo taua nikoasaimi Elisa ri RohNa Batara,
16 sa’genna nakanamo, "Iaminne kananNa Batara: ‘Apparekko kalok-kaloro’ anrinni ri balanga.
17 Manna pole tena naturung bosia nucini’ yareka tena nammiri’ anginga nusa’ring, mingka lallumpa-lumpai je’neka anrinni ri balanga. Ikau ngaseng siagang olo’-olo’ piaranu kammayatompa olo’-olo’ paerang barannu langgappai je’ne’ untu’ nainung sa’genna bassoro’.’"
18 Nampa nakana pole Elisa, "Mingka anjo sikammaya kara-kara ca’diji bawang mae ri Batara. Lanasare tongko pammetang mae ri tu Moab.
19 Sikontu kotana ke’nanga ammakea pattahangngang siagang ga’ga-ga’gaya lanurumbang kabusuki; sikontu poko’ kayu rappo-rappoanna ke’nanga lanuta’bangi, sikontu timbuseng je’ne’na lanutongkoki, kammayatompa koko-koko copponga buttana lanusambilai batu sa’genna panra’ tabasikali."
20 Ammukona, ri wattu assarena ke’nanga koro’bang bari’basa’, nia’mo je’ne’ assolong battu ri Edom sa’genna rassi anjo balanga.
21 Nalangngere’na tu Moab angkanaya nia’mi battu anjo tallua karaeng ero’ ambunduki ke’nanga, sikontu taua — battu ri kaminang toaya sa’genna kaminang loloa — ia akkullea ammisang sanjata, nipagio’ kabusu’mi nampa nipamange ri daera pa’baeng-baenga.
22 Ammukona, ri wattunna ambangung bari’basa’ ke’nanga, nasioro’mi allo tompo’na je’neka sa’genna eja tanja’na sangkamma cera’.
23 Ammarrammi ke’nanga angkana, "Cera’! Ma’nassa siba’jimi para ia anjo tallua pasukang musu nasibuno-buno! Umba kimange anrampo’ ri pakkemaanna ke’nanga!"
24 Mingka ri wattunna battu anjo tu Moab mange ri pakkemaanga, nitunrummi siagang nipamono’ bokomi ri tu Israel majua angngondangi ke’nanga nampa nabuno
25 siagang narumbang kota-kotana ke’nanga. Sikamma koko-koko coppong naoloa ke’nanga nasambilai batu. Kale’bakkanna sikontu kokoa katongkokang kabusu’mi ri batu. Natongko’ tommi tu Israel sikontu timbuseng je’neka siagang nata’bammi sikontu poko’ kayu rappo-rappoanga. Niaka ammantang tassesa iamintu kota Kir-Hareset mami, ibukotana Moab. Kala’busanna manna anjo kotaya nikurummi siagang nisambilai batu ri sikamma pasambilaya.
26 Naassennamo karaeng Moab angkanaya takkulleami attahang, naerammi tantarana kaminang cara’deka akkarena pa’dang 700 tau jaina nampa ero’ napantamakki pattahanganna karaeng Edom, mingka tanakulleai.
27 Lanri kammana anjo naallemi ana’ bura’nena, nampa napassareang anjari koro’bang irate ri tembo’na kotaya mae ri rewatana Moab. Jari malla’mi tu Israel, sa’genna napamunduru’ pasukanna ke’nanga battu ri anjo kotaya nampa ammotere’ mange ri pa’rasanganna ke’nanga.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA