Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ E bakto meyarsa reppodanna oreng se katello gella’, Rato Hizkiya laju nyebbit rasoganna pas ngagem kaen karong menangka tandha sossa, saellana jareya laju meyos ka Padalemman Socce.

² Saellana jareya rato laju ngotos Elyakim, kapalana karaton, Sabna sekettarissa nagara ban para imam se la towa, epakon nyabis ka Nabbi Yesaya pottrana Amos. Reng-oreng jareya akalambi karong keya.

³ Areya’ pessenna Hizkiya se epanapa’ reng-oreng jareya ka Yesaya, "Are paneka are kasossa’an; kaula sareng sampeyan sadaja padha eokom sareng eya-seya. Kaula sareng sampeyan sadaja akadi oreng babine’ se rembi’a tape ampon ta’ gadhuwan kakowadan sakale.

⁴ Rato Asyur ngotos parwira tenggina epakon ya-nyeya Allah se odhi’. Pasera oneng GUSTE Allahna sampeyan meyarsa se eya-seya kadi gapaneka, sareng badhi ngokoma reng-oreng se ngoca’agi sadajana gapaneka! Daddi kaula nyo’ona tolong, nyo’onnagi ka Allah kaangguy bangsana kaula sareng sampeyan se gi’ odhi’."

⁵ Saellana meyarsa pessenna Rato Hizkiya jareya,

⁶ Yesaya makon para otosan jareya manapa’ saodda kantha reya, "Dhabuna PANGERAN, junandalem ta’ osa tako’ meyarsa cacaepon reng-orengnga rato Asyur se ngoca’ ja’ PANGERAN ta’ kera masalamet junandalem sareng sadajana ra’yadda.

⁷ Sareng PANGERAN rato Asyur epameyarsa kabar angen kantos laju abali ka nagarana dibi’ sarta pas epate’e oreng e ka’dhissa’."

⁸ Parwira Asyur jareya ngedhing kabar ja’ ratona la mangkat dhari Lakhis ban parappa’na aperrang ban kottha Libna se ta’ jau dhari jadhiya. Parwira jareya laju nyosol ka kottha jareya atemmowa ban ratona.

⁹ Rato Asyur la narema kabar ja’ pasukan Messer se ekapalae Tirhaka rato Sudan parappa’na e dhalem parjalanan ka jadhiya nyerranga bangsa Asyur. Daddi rato Asyur asoradan ka Hizkiya rato Yehuda.

¹⁰ Monyena kantha reya, "Ba’na ja’ ekenneng co-koco bi’ janjina Allahna se eandellagi ba’na se nyebbuttagi ja’ ba’na ta’ kera gaggar ka tang tanang.

¹¹ Ba’na la ngedhing ja’ saneyap nagara se eserrang to-rato Asyur epaancor kabbi. Ba’na ja’ ngera bisa’a lopot dhari sengko’!

¹² E bakto tang bangatowa ngancor tha-kottha Gozan, Haran ban Rezef, sarta mate’e oreng Eden se enneng e Telasar, tadha’ settonga dhari ba-dibana masalamet tha-kottha jareya.

¹³ Kemma to-rato Hamat, Arpad, Sefarwaim, Hena ban Iwa?"

¹⁴ Hizkiya maos sorat jareya se etarema dhari para otosan. Saellana jareya laju meyos ka Padalemman Socce. Sorat jareya laju ebarbar e ajunanna PANGERAN,

¹⁵ Hizkiya adu’a, dhabuna, "Guste PANGERAN, Allahna Isra’il, Junandalem se alenggi e attassa kerub, namong Junandalem Allah se ngobasane sadajana karaja’an e bume ka’dhinto. Junandalem se nyepta’agi langnge’ sareng bume.

¹⁶ Kasokana Junandalem ngoladi ponapa se kadaddiyan ka bangsa abdidalem samangken ka’dhinto, GUSTE. Peyarsa’agi sadajana se ekoca’agi Sanherib se ya-nyeya Junandalem, Allah se odhi’!

¹⁷ Abdidalem sadaja padha oneng, GUSTE, manabi to-rato Asyur ampon matompes sa-bangsa sabannya’na sareng maancor nagarana sa-bangsa gapaneka.

¹⁸ Ba-dibaepon sa-bangsa gapaneka jugan eobbar sareng epaancor, sabab ba-diba gapaneka ta’ gadhuwan kakobasa’an pa-ponapa, namong ca-arca se ebadhi dhari kaju sareng bato badhiyannepon manossa.

¹⁹ Adhu, Guste PANGERAN, Allah kaula, palopoddagi abdidalem sadajana dhari reng-oreng Asyur ka’dhissa’, sopaja sa-bangsa e dunnya oneng sadaja ja’ namong Junandalem Allah se settong."

²⁰ Saellana jareya Yesaya apessennan ka Rato Hizkiya ja’ menangka jawabanna du’ana,

²¹ PANGERAN adhabu kantha reya, "Ba’na ekala’-gella’ ban eco-koco bi’ Yerusalim, Sanherib.

²² Ba’ taowa ba’na sapa se eca’-koca’e ban eya-seya bi’ ba’na reya? Sengko’, Allahna Isra’il, Allah se socce! Ce’ angga’na ba’na ka Sengko’.

²³ Ba’na ngerem otosan epangedirragiya ja’ polana kareta perrangnga ba’na ce’ bannya’na daddi ba’na la makala nong-gunong se paleng tenggi e Libanon. Ba’na ngedirragi ja’ ba’na moger ka-bungkana comarana se paleng tenggi ban paleng bagus sarta narabas e las-alassa se paleng raja.

²⁴ Ba’na ngedirragi keya ja’ ba’na ngale mor-somor ban ngenom aeng e ra-nagara manca, ban ja’ rit-parjuridda ba’na enyek-enyek Songay Nil sampe’ kerreng.

²⁵ Apa ba’na ta’ tao ngedhing ja’ jareya kabbi la erancana’agi bi’ Sengko’ molae lamba’? Sateya Sengko’ ajalannagi rancana jareya. Sengko’ se aberri’ kobasa ka ba’na kaangguy maancor tha-kottha se ngangguy binteng sampe’ daddi jur-gujuran.

²⁶ Reng-oreng se enneng e jadhiya ta’ bisa apa-rapa; takerjat ban katako’en. Reng-oreng jareya akantha rebba e teggal otabana rebba se tombu e ata’na bengko, se daddi kerreng mon ecapo’ angen temor se panas.

²⁷ Tape Sengko’ la tao kabbi parkara ba’na. Sengko’ tao apa se elakone ba’na ban entara dha’ emma ba’na.

²⁸ Sengko’ tao ja’ ba’na ce’ peggella ka Sengko’, ban Sengko’ la ngedhing kasombonganna ba’na jareya. Sateya bi’ Sengko’ ba’na ekae’a elongnga ban ekaddhaliyana colo’na, ba’na eereda epabaliya lebat e jalan se elebadi ba’na padhatengnga."

²⁹ Yesaya apessennan kantha reya keya ka Hizkiya, "Areya’ se daddiya menangka tandha ka ba’na. Taon reya ban taon dhateng oreng bakal ngakana gandum se tombu dibi’. Tape saellana jareya reng-oreng jareya bakal bisa’a namen gandum ban anggur sarta bakal arassa’agiya nyamanna hasella.

³⁰ Oreng Yehuda se gi’ odhi’ bakal ma’mora akantha men-tamennan se ramo’na ce’ dhalemma sarta ngasellagi buwa.

³¹ E Yerusalim ban e attassa Gunong Siyon bakal badha’a reng-oreng se salamet, lantaran PANGERAN la nantowagi ja’ bendher bakal badha’a kadaddiyan se kantha jareya.

³² Ka’dhinto se edhabuwagi PANGERAN ka Rato Asyur, ‘Rato Asyur ta’ kera bisa maso’ ka kottha Yerusalim otabana ngocol panana ka kottha jareya. Rit-parjurit se padha ngangguy tameng ta’ kera badha se bisa’a nyemma’e kottha jareya, ban ta’ kera agabay tanggul pangeppongan e sakalenglengnga kottha jareya.

³³ Rato Asyur bakal moleya lebat e jalan se elebadi padhatengnga, ta’ kalaban sempat maso’ ka kottha jareya. Sengko’, PANGERAN, la ngoca’.

³⁴ Bit kahormadanna Sengko’ dibi’ sarta Tang parjanjiyan ban Daud Tang abdi, Sengko’ abilla’ana ban alindhungana Yerusalim.’"

³⁵ E malem jareya keya malaekadda PANGERAN meyos ka parkemahanna oreng Asyur, pas mate’e parjurit Asyur saratos ballung polo lema ebu oreng bannya’na. Kalagguwanna gu-laggu mayyidda reng-oreng jareya car-kalacer.

³⁶ Daddi Sanherib rato Asyur laju nyorot, abali ka Niniwe.

³⁷ E settong are, e bakto teppa’na abakte e dhalem kowella Diba Nisrokh, Sanherib epeddhang sampe’ mate bi’ Adramelekh ban Sarezer, tra-pottrana dibi’. Saellana jareya se kadhuwa buru pas buru ka nagara Ararat. Daddi se agante jumenneng rato pottrana se laen, iya areya Esarhadon.

2 Raja-raja

Video 2 Raja-raja 19

Ikuti Kami:

KONTAK | PARTISIPASI | DONASI