Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ E taon se kapeng tello’ pamarenta’anna Rato Hoseya pottrana Ela e Isra’il, Hizkiya pottrana Ahas jumenneng rato Yehuda.

² E bakto jareya yuswana sagame’ taon, ban marenta e Yerusalim sanga lekor taon abidda. Asmana ebuna Abiya pottrana Zakhariya.

³ Hizkiya ngalakone pa-apa se masenneng panggaliyanna PANGERAN akantha Rato Daud bangatowana.

⁴ Kennengnganna panyemba’anna diba se badha e man-dhimman erosak epaancor, gu-tuguna epagujur ban ca-arcana Dewi Asyera erosak. Bariya keya olar paronggu gabayanna Mosa se esebbut Nehustan apaancor. Sabab sampe’ bakto jareya oreng Isra’il gi’ ngobbar dupa menangka panghormadan ka olar paronggu jareya.

⁵ E antarana sakabbinna rato Yehuda, se sabellunna ban bariya keya se samarena Hizkiya, tadha’ se padha ban Hizkiya jareya. Salerana parcaja ka PANGERAN, Allahna Isra’il,

⁶ ban esto ka Salerana. Hizkiya ta’ tao alaban ka dhabuna PANGERAN. Sakabbinna papakon se eparengngagi kalaban parantara’anna Mosa, bi’ Hizkiya etoro’ kalaban gu-onggu.

⁷ Lantaran jareya bi’ PANGERAN etolonge terros sampe’ ahasel e dhalem sakabbinna usahana. Hizkiya aberonta’ ka rato Asyur, ta’ kasokan atellok.

⁸ Oreng Filistin epakala, kennengnganna erampok, dhari disa se paleng kene’ sampe’ ka kottha se paleng raja, tamaso’ Gaza ban dhaera e sabingkerra.

⁹ E taon se kapeng empa’ pamarenta’anna Hizkiya, iya areya taon se kapeng petto’ pamarenta’anna Rato Hoseya e Isra’il, Salmaneser rato Asyur nyerrang Isra’il ban ngeppong Samaria.

¹⁰ Saellana ekeppong tello taon abidda, Samaria gaggar. Jareya kadaddiyan e taon se kapeng ennem pamarenta’anna Hizkiya, ban e taon se kapeng sanga’ pamarenta’anna Hoseya.

¹¹ Saellana jareya rato Asyur ngangko’ reng-oreng Isra’il ka Asyur epadaddi tawanan; sabagiyan dhari reng-oreng Isra’il jareya esaba’ e kottha Halah, sabagiyan laenna e seddi’na Songay Habor e dhaera Gozan, ban sabagiyan pole e tha-kottha e nagara Madai.

¹² Samaria kala polana oreng Isra’il ta’ ta’at ka PANGERAN, Guste Allahna, ta’ neptebbi janji se ebadhi PANGERAN ban bangsa jareya, ta’ atoro’ ka sakabbinna papakonna Mosa, abdina. Bangsa Isra’il jareya ta’ endha’ ngedhingngagi ban ta’ endha’ atoro’.

¹³ E taon se kapeng pa’ bellas pamarenta’anna Hizkiya rato Yehuda, tha-kottha Yehuda se ngangguy binteng eserrang ban epakala bi’ Sanherib, rato Asyur.

¹⁴ Daddi Hizkiya akerem kabar ka Sanherib se badha e Lakhis, kantha reya monyena, "Kaula sala. Daddi kaula nyo’ona kasokana panjennengngan maambu serranganna ka bangsa kaula. Ponapa se daddi kasokanna panjennengngan sareng kaula etorodana." Sanherib apareng jawaban ja’ Hizkiya kodu ngeremmagi salaka sapolo ebu kilo ban emmas saebu kilo.

¹⁵ Daddi, salaka se badha e Padalemman Socce ban se badha e karatonna rato bi’ Hizkiya ekerem ka Sanherib kabbi.

¹⁶ Emmas se epasang ka bang-labangnga Padalemman Socce ban se epasang e ger-ogerra labangnga, epondhut pas epakerem ka Sanherib.

¹⁷ Tape rato Asyur jareya ngerem pasukan se raja dhari Lakhis epanyerrang Yerusalim. Pasukan jareya epimpin parwira tenggi katello, iya areya panglima kasorang, juru nom-enoman kasorang ban kapalana pangawalla rato kasorang. Sanapa’na ka kottha jareya reng-oreng buru ngala’ kennengngan e teggal, se anyama Teggalla Panatu e seddi’na sellogan se magili aeng dhari taman bagiyan attas.

¹⁸ Reng-oreng jareya laju aera’ ngolok Rato Hizkiya. Ponggabana Hizkiya kalowar katellowan nyander ka reng-oreng Asyur jareya. Ponggaba se katello jareya Elyakim ana’na Hilkiya kapalana roma tangga karaton, Sebna sekettarissa nagara, ban Yowah ana’na Asaf sekettarissa karaton.

¹⁹ Sala settong dhari parwira Asyur atanya kantha reya ka oreng se katello buru, "Atorragi ka Hizkiya dhabuna rato Asyur sapaneka, ‘Arapa ba’na me’ apangrasa kowat?

²⁰ Apa bi’ ba’na caca malolo esanggu bisa egabay gantena siyasat ban kakowadanna tantara? Sapa se eandellagi ba’na, me’ daddi amosowa ban Asyur?

²¹ Ba’na pajat ngarep bantowanna Messer, tape jareya padha ban oreng atongket lalang; tongket jareya dhaggi’ potong, tanangnga ba’na ekenneng jujju. Jareya gambaranna rato Messer monggu ka reng-oreng se ngarep bantowanna.’"

²² Parwira Asyur jareya pas ngoca’ pole, "Otabana pole ba’na ngoca’ ngarebba bantowanna PANGERAN, Allahna ba’na? E bakto Hizkiya apareng parenta sopaja oreng Yehuda ban Yerusalim abakte e adha’na mezba e Yerusalim malolo, se epamosna ratona ba’na jareya gu ta’ mezba ban kennengnganna kabakteyan ka PANGERAN dibi’ se badha neng e man-dhimman?

²³ Sateya kalaban asmana rato Asyur sengko’ bangal atarowana ja’ mon ba’na eberri’i jaran dhu ebu meggi’, bannya’na oreng e kotthana ba’na ta’ kera cokop se epanompa’a jaran jareya!

²⁴ Alabana parwirana tang bangsa se paleng mandhap bai ba’na banne tandhinganna. Tape ba’na me’ gi’ ngarep bantowan kareta perrang ban pasukan jaran dhari Messer!

²⁵ Tang bangsa se nyerrang ban makala nagarana ba’na reya apa bi’ ba’na esanggu ta’ olle bantowan dhari PANGERAN, ya? PANGERAN dibi’ se makon tang bangsa nyerrang ban maancor ba’na kabbi!"

²⁶ Elyakim, Sebna ban Yowah ngoca’ ka parwira jareya, "Manabi abu-dhabu ka kaula sakanca paneka ngangguy oca’ Aram saos, kaula ngarte. Ja’ ngangguy oca’ Ibrani, dhaggi’ ekaedhing reng-oreng se badha e attassa pagar alas ka’issa’, dhaggi’ oreng pas padha oneng."

²⁷ Saodda parwira jareya, "Apa bi’ ba’na sengko’ reya esanggu pera’ epakon manapa’ pessen jareya ka ba’na ban sareng ka ratona? Enja’! Sengko’ acaca keya ka ra’yat se toju’ e attas pagar alas, ra’yat ban ba’na kabbi se padha ngakana taena ban ngenoma kemmena dibi’."

²⁸ Saellana jareya parwira buru pas manjeng sarta aera’ ngangguy oca’ Ibrani, "Mara edhingngagi apa dhabuna rato Asyur:

²⁹ ‘Ba’na ja’ endha’ eco-koco Hizkiya; Hizkiya ta’ kera bisa masalamet ba’na.

³⁰ Ja’ edhingngagi mon Hizkiya nyacae ba’na esoro nyo’on tolong ka PANGERAN. PANGERAN ta’ kera masalamet ba’na otabana lang-ngalange tantara Asyur arebbu’ kotthana ba’na.

³¹ Ja’ edhingngagi Hizkiya. Mara ba’na padha kalowar dhari kotthana pas atellok ka sengko’. Dhaggi’ ba’na olle ngakan buwana anggur dhari kebbunna dibi’ sarta ngarassa’agi ne’madda buwana ara dhari bungkana andhi’na ba’na dibi’, bariya keya bisa ngenom dhari somorra ba’na dibi’,

³² sampe’ bi’ sengko’ ba’na ealle ka settong nagara se merep ban nagarana ba’na dibi’. E jadhiya badha kebbun anggurra se ngasellagi anggur se ekenneng kakan ba’na, badha teggalla gandum se ngasellagi teppong kaangguy kakanna ba’na. E nagara jareya bannya’ bungkana jaitun, bannya’ mennya’ jaitunna ban madduna. Mon ba’na atoro’ ka tang oca’ reya, ba’na bakal odhi’a, ta’ kera mate. Ja’ ngedhingngagi cacana Hizkiya! Ba’na eco-koco, ebalai ja’ ba’na tanto epasalamet bi’ PANGERAN.

³³ Ba’ badha’a dibana bangsa laen masalamet nagarana dhari tang kakobasa’an?

³⁴ Kemma ba-dibana nagara Hamat ban Arpad? Kemma ba-dibana Sefarwaim, Hena ban Iwa? Ba’ badha’a se dhateng nolonge Samaria?

³⁵ Diba se kemma se tao malopot nagarana dhari tang kakobasa’an? Dhu dhimma PANGERAN se bisa’a masalamet Yerusalim?’"

³⁶ Ngedhing oca’ jareya pandhudhu’ Yerusalim ta’ nyaot, sabab Rato Hizkiya la makon sopaja neng-enneng.

³⁷ Elyakim, Sebna ban Yowah pas nyebbit kalambina menangka tandha sossa, saellana jareya laju areppot ka ratona parkara pa-apa se ekoca’agi parwira Asyur gella’.

2 Raja-raja

Video 2 Raja-raja 18

Ikuti Kami:

KONTAK | PARTISIPASI | DONASI