Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E taon se kapeng petto’ pamarenta’anna Yehu e Isra’il, Yowas jumenneng rato Yehuda. Salerana marenta e Yerusalim pa’ polo taon abidda. Asmana ebuna Zibya dhari kottha Bersyeba.
2 Berkat pangajaranna Imam Yoyada, saomorra Yowas alampa’agi sabarang se masenneng panggaliyanna PANGERAN.
3 Pera’ emanna, kennengnganna panyemba’anna ba-diba ta’ epamosna, daddi ra’yat gi’ ngatorragi kurban ban ngobbar mennyan e jadhiya.
4 E settong are Yowas adikane para imam laju epakon nyempen pesse ollena tor-ator e Padalemman Socce, se aropa bajaranna se mabadha ban-kurban, otabana pesse tor-ator sokalella.
5 Saneyap imam kodu atanggungjawab parkara pesse se eatorragi reng-oreng se eladine imam jareya bang-sebang. Pesse jareya eangguya mateppa’ karosagan-karosaganna Padalemman Socce.
6 Sampe’ taon se kapeng tello lekor pamarenta’anna Yowas, para imam gi’ ta’ mateppa’ karosagan e Padalemman Socce.
7 Daddi Yowas laju nembali Imam Yoyada ban mam-imam laenna, pas adhabu, "Arapa ba’na me’ gi’ ta’ mateppa’ Padalemman Socce rowa? Molae sateya ba’na ta’ olle nyempen pesse se etarema ba’na. Kabbi kodu epassra’agi kaangguy mateppa’ Padalemman Socce."
8 Mam-imam saroju’ ta’ makompola pesse dhari ra’yat, ban ta’ ro’-noro’a nanggung orosan se mateppa’a Padalemman Socce.
9 Daddi Yoyada laju mondhut settong kothak, kodhungnga elobange; kothak jareya esaba’ e seddi’anna mezba e kanganna labang mon maso’a ka Padalemman Socce. Pesse se eatorragi reng-oreng e Padalemman Socce jareya emaso’agi ka kothak jareya bi’ mam-imam se atugas e labang mon maso’a.
10 Sabban pesse e kothak jareya la bannya’, sekettarissa rato ban Imam Agung rabu ka jadhiya, ngetong pesse jareya ban pesse jareya laju ebundu’.
11 Mon bannya’na la ecathet, pesse jareya laju epassra’agi ka reng-oreng se epassrae orosan mateppa’ Padalemman Socce. Saellana jareya reng-oreng se epassrae lalakon jareya laju majari para tokang kaju, tokang bangonan,
12 tokang bato ban tokang ngetthoga bato, sarta melle kaju ban bato, ban ngator sakabbinna pangalowaran se eangguy mateppa’ padalemman jareya.
13 Tape pesse jareya maske sakone’a ta’ eangguy agabay ker-cangker salaka, bung-tobung, tarompet, but-parabudda damar otabana pakakas laenna se dhari emmas otaba salaka.
14 Kabbi ekabajar kang-tokang ban ekabelli sabarang kaparlowanna geddhong jareya.
15 Reng-oreng se daddi pangawassa lalakon jareya ce’ jujurra, daddi ta’ osa epentae laporan parkara pangalowaranna pessena.
16 Pesse ollena kurban tebbusanna kasala’an ban dhari kurban pangamponanna dusa ta’ epamaso’ ka kothak jareya. Pesse jareya ebagi ka mam-imam.
17 E jaman jareya Hazael rato Siria nyerrang ban ngobasane kottha Gat. Samarena laju aneyat aloroga Yerusalim keya.
18 Daddi Yowas laju ngeremmagi pesse tebbusan ka salerana. Pesse jareya ollena dhari sakabbinna tor-ator se lamba’ la eatorragi ka PANGERAN bi’ Yowas dibi’, bi’ Yosafat, Yoram ban Ahaziya, iya areya to-rato se marenta sabellunna. Laen dhari jareya gi’ etambai ban sakabbinna emmas se badha e ekkassa Padalemman Socce ban e karatonna rato. Daddi Hazael laju burung se aloroga Yerusalim.
19 Saellana jareya ba-ponggaba karaja’an Yehuda asakongkel ngamoso Rato Yowas. E antarana reng-oreng jareya badha kadhuwa se anyama Yozakar ana’na Simeyat, ban Yozabad ana’na Somer, se mate’e Yowas e settong bengko se epaddek e attassa tana tembugan e bagiyan temorra Yerusalim, e lorong ka Sila. Yowas esareyagi e pasareyanna to-rato e Kottha Daud. Sasedana laju egante pottrana se asmana Amaziya. Careta laenna parkara Rato Yowas ecathet e dhalem ketab Sajarana To-rato Yehuda.
20 (12:19)
21 (12:19)
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA