Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kenca pitu tahun dekahna Jehu jadi raja i Israel, Joas jadi raja i Juda. Dekahna ia erkuasa i Jerusalem lit empat puluh tahun. Nandena Sibiah i Kuta Berseba nari.
2 Kidekah geluhna idalankenna si ngena ate TUHAN, erkiteken imam Joyada ngajari ia.
3 Aminna bage gia, ingan-ingan ersembah kalak perbegu la icedaken. Emaka terus nge kalak erbahan persembahen gelehen ras nutung kumenen i je.
4 Joas ndilo imam-imam janah iperentahkenna man kalak e guna nimpan duit si igalarken kalak asum ia erbahan persembahen i bas Rumah Pertoton, eme kap adangen si igalari kalak guna persembahen si wajib ras duit pemere arah ukur meriah.
5 Tep-tep imam ertanggung jawab kerna duit si ipersembahken kalak si reh man bana asum ia ertugas, janah duit e ipake guna pehuli Rumah Pertoton, asa perluna.
6 Tapi nggo pe dua pulu telu tahun Joas jadi raja lenga ka ipekena imam-imam Rumah Pertoton e.
7 Emaka isuruhna Joyada ras imam-imam si deban ngadap man bana, jenari isungkunna kalak e nina, "Ngkai maka la ipehulindu Rumah Pertoton? Mulai genduari lanai kam si nimpan duit si ialokenndu; arus iendeskenndu, gelah Rumah Pertoton e banci ipehuli."
8 Payo iakap imam-imam kerna si e, bage pe setuju kalak emaka la ia pekena Rumah Pertoton e.
9 Kenca bage ibuat Joyada sada peti, ibahanna lubangna i bas tutupna, emaka itamakenna peti e deherken batar-batar, arah kemuhen adi kalak bengket ku Rumah Pertoton e. Imam-imam si ertugas i lebe-lebe pintun namaken kerina duit si ibereken kalak si ersembah ku bas peti e.
10 Adi nggo melala duit i bas peti e, reh pegawai raja ras Imam si Mbelin, ibeligaina duit e, jenari ipunjutna i bas gajut-gajut.
11 Kenca isuratkenna buena duit e, emaka iendesken man mandur si ngurus dahin i bas Rumah Pertoton e. Duit e ipergunaken guna nggalari upah tukang kayu, tukang bangunen,
12 tukang tembok, ras tukang ukir batu, guna nukur papan ras batu si ipake i bas dahin e, ras nggalari perbelanjan si iperluken.
13 Tapi duit e la lit sitik pe ipake guna erbahan cangkir pirak, mangkuk, terompet, ntah perkakas si ipake guna ngurus lampu, ntah pe barang-barang si deban si ibahan i bas pirak ntah emas nari.
14 Duit e kerina ipake guna nggalari upah tukang ras nukur barang-barang si ipake guna pekena Rumah Pertoton e.
15 Kalak si ertugas ngurus dahin e tuhu-tuhu bujur i bas kai-kai pe, emaka labo perlu mindo perkiran man bana.
16 Duit si ibereken guna persembahen tebusen ras persembahen kerna dosa la isimpan i bas peti e; si e jadi sikerajangen imam-imam.
17 Tupung si e Raja Hasael i Siria nari merang Kuta Gat janah italukenna kuta e. Kenca bage iputuskenna ka guna merang Jerusalem.
18 Erkiteken si e ibuat Joas, raja Juda, kerina persembahen si nggo ipersembahken raja-raja si nggo leben asa ia, eme Josapat, Jehoram, ras Ahasia, janah itambahina ka pe alu persembahenna jine, bage pe kerina emas si lit i bas perbendaharan Rumah Pertoton ras istana, jenari ikiremkenna man Raja Hasael. Emaka la surung iperang Hasael kota Jerusalem.
19 Kerina si debanna si ilakoken Raja Joas isuratken i bas kitap Sejarah Raja-raja Juda.
20 Pegawai Raja Joas erpekat ngelawan ia. Dua i bas pegawaina e, eme kap Josakar anak Simeat ras Josapat anak Somer munuh ia i bas sada rumah si ipajekken i babo taneh tambusen arah Timur kota Jerusalem i bas dalan si ngincuah ku kota Silla. Joas ikuburken i bas kuburen raja-raja i bas Kota Daud, jenari anakna Amasia nggantiken ia jadi raja.
21 (2Raj 12:20)
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA