Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lit pitu puluh kalak sinursur Raja Ahap ringan i kota Samaria. Itulis Jehu surat, jenari ikiremkenna man peminpin kuta e, bage pe man pengulu i bas kuta e ras man kalak si ngepkep sinursur Ahap. Bagenda me kata surat e:

² "Kam me si ngepkep sinursur raja dingen kerina gereta perang, kuda, senjata, ras kota-kota si erbenteng lit i teruh pengawasenndu. Erkiteken si e, kenca ialokenndu surat enda minterlah

³ ipilihndu kalak si mbisana i bas sinursur raja, angkat jadi raja, jenari erperanglah mpertahanken ia."

⁴ Emaka mbiar kerina penguasa Samaria. Nina, "Uga banci silawan Jehu, adi Raja Joram ras Raja Ahasia pe la ngasup?"

⁵ Erkiteken si e pegawai si ertugas ngurus istana, ras pengulu ras kerina si ngepkep sinursur raja, ngkiremken tenah enda man Jehu, "Kami suruh-suruhenndu, nggo sikap ndalanken kai si ikatakenndu. Tapi la ate kami ngangkat ise pe jadi raja, bahanlah kai akapndu mehuli."

⁶ Kenca bage ibahan Jehu ka sada nari surat bagenda, "Adi ras aku kin kam, janah adi nggo kin kam sikap ndalanken perentahku, babalah man bangku i Jesreel kerina takal kususuren Raja Ahap, bagi genduari e ka pagi." Sinursur Raja Ahap si pitu puluh kalak e lit i bas kepkepen pengulu Samaria guna pebelin-belinca.

⁷ Kenca surat Jehu e ialoken, itampulna pitu puluhna sinursur Ahap, itamakenna takalna i bas raga, kenca bage ikiremkenna man Jehu i Jesreel.

⁸ Tupung iberitaken man Jehu maka takal sinursur Ahap nggo ibaba, iperentahkenna gelah ipegun-gunna i bas dua ingan i pintu gerbang kota, janah ipelepas i je seh pepagina.

⁹ Pepagina lawes ia ku gerbang e, emaka ikatakenna man kalak si i je, "Aku me si erpekat ngelawan Raja Joram dingen si munuh ia, labo kam ertanggung jawab kerna si e. Tapi ise si munuh kalak enda kerina?

¹⁰ Enda sada bukti maka kerina si ikataken TUHAN kerna kesusuren Ahap jadi me. Nggo ilakoken TUHAN kai si IpadankenNa arah NabiNa Elia."

¹¹ Kenca bage ibunuh Jehu kerina kade-kade Ahap si deban si ringan i Jesreel, bage pe kerina pegawaina, teman-temanna meriah, ras imam-imam. La lit sada pe si tading nggeluh.

¹² Kenca bage lawes Jehu i Jesreel nari ku Samaria. I tengah dalan, i bas sada ingan si igelari "Ingan Permakan,"

¹³ rembang ia jumpa ras piga-piga kalak kade-kade Ahasia, raja Juda si nggo mate. Iorati Jehu kalak e nina, "Ise kin kam?" "Kade-kade Ahasia," nina kalak ndai ngaloi. "Lawes ate kami ku Jesreel ertedeh ate man anak, Kemberahen Isebel ras man kerina si debanna keluarga raja."

¹⁴ Emaka iperentahken Jehu anak buahna, "Tangkap kalak enda geluh-geluhen!" Itangkapna kalak ndai, emaka ibunuhna kerina deherken embang. Lit kalak ndai empat pulu dua kalak kerina, janah sada pe la lit itadingken nggeluh.

¹⁵ Berkat ka Jehu, janah i bas perdalanenna, ia ijumpai Jonadap anak Rehap. Ikataken Jehu mejuah-juah man bana, jenari nina, "Kuakap bali nge perukurenndu ras perukurenku. Nggit kam nampati aku?" "Nggit," nina Jonadap erjabap. "Adi bage, sisalamen dage kita," nina Jehu. Emaka sisalamen ia duana, janah ijemak Jehu tanna asum ia nangkih ku geretana.

¹⁶ Nina Jehu, "Marilah ras aku. Nehenlah uga tutusna aku man TUHAN." Emaka iteruskenna perdalanenna ras-ras ku Samaria.

¹⁷ Kenca ia seh i je, ibunuh Jehu kerina kade-kade Ahap, la lit sada pe itadingkenna. Kai si jadi enda sue ras si nggo ikataken TUHAN man Elia.

¹⁸ Kenca bage ipepulung Jehu kerina kelah Samaria, jenari nina, "Raja Ahap sitik ngenca persembahenna man dibata-dibata Baal, tapi ndauh ateku belinen persembahenku.

¹⁹ Emaka pepulung kerina nabi-nabi Baal, kerina si nembah man bana, bage pe kerina imam-imamna, la lit sada pe si tading. Ateku mpersembahken persembahen si mbelin man Baal, emaka ise si la reh la banci lang ibunuh." (Situhuna si enda akal Jehu ngenca; arah e atena munuh kerina kalak si nembah man Baal.)

²⁰ Kenca bage iperentahken Jehu, "Momokenlah sada wari kebaktin man Baal!" Ibahan me momo e;

²¹ itenahkenna ku belang-belang negeri Israel. Emaka reh me kerina kalak si nembah Baal; la lit sada pe si la reh. Bengket ia kerina ku rumah pertoton Baal; dem kal rumah pertoton e.

²² Kenca bage iperentahken Jehu imam si ngurus jubah si khusus ipake i bas kebaktin e gelah ipedaratna jubah e jenari merekenca man kalak si ersembah e.

²³ Dung kenca si e, Jehu ras Jonadap anak Rehap pe bengket ku bas rumah pertoton Baal e, emaka nina man kalak si i je, "Jaga maka kalak si ersembah man Baal saja ngenca banci i bas, ula lit sada pe si ersembah man TUHAN."

²⁴ Kenca bage ia ras Jonadap bengket mpersembahken persembahen man Baal. Ope denga ia bengket nggo isuruhna waluh puluh kalak erjaga i darat rumah pertoton e. Iperentahkenna man kalak e, "La banci la ibunuhndu kerina kalak enda; ise si erbahanca pulah sekalaklah gia arus igalarina alu kesahna!"

²⁵ Kenca dung Jehu erbahan persembahen e, minter ikatakenna man kepala ras penjaga e, "To bengket, bunuh kalak e kerina. Ula pelepas sekalak pe pulah!" Bengket kalak ndai alu pedang si talang. Ibunuhna kerina, jenari maitna isarenna ndarat. Kenca bage bengket kalak ndai ku bas bagin si arah basna i bas rumah pertoton Baal e,

²⁶ emaka ibabana ndarat tiang sembah-sembahen e janah icilukna.

²⁷ Rumah pertoton e ras tiang sembah-sembahenna irontaskenna, isalihkenna jadi kakus seh ngayak genduari.

²⁸ Bage me Jehu nasapken penembahen man Baal i Israel.

²⁹ Tapi iusih-usihna dosa Raja Jerobeam, si mabai Israel erdosa alu nembah man lembu emas si itamakenna i Betel ras i Dan.

³⁰ Nina TUHAN man Jehu, "Nggo ilakokenndu man kesusuren Ahap kerina sue ras peratenKu. Erkiteken si e erpadan Aku man bandu maka kesusurenndu, seh ku sundut si peempatken, tetap jadi raja Israel."

³¹ Tapi la ikutken Jehu alu bulat ukurna Undang-undang TUHAN, Dibata kalak Israel, tapi Jerobeam nge iusih-usihna, si mabai Israel erdosa.

³² I bas paksa si e mulai me TUHAN ngkurangi belang daerah Israel. Raja Hasael i Siria nari naluken kerina daerah Israel.

³³ Si arah Timur Jordan, terus ku Selatan seh Kuta Aroer i tepi Lau Arnon -- subuk daerah-daerah Gileat ras Basan, i ja ringan suku-suku Gat, Ruben ras suku Manase Timur.

³⁴ Kerina si debanna si ilakoken Jehu, subuk perbahanen-perbahanen si nuduhken kinimbisanna, isuratken i bas kitap Sejarah Raja-raja Israel.

³⁵ Ia mate ras ikuburken i Samaria, janah anakna Jehoahas nggantiken ia jadi raja.

³⁶ Dekahna Jehu jadi raja Israel i Samaria lit dua pulu waluh tahun.

2 Raja-raja

Video 2 Raja-raja 10

Ikuti Kami:

KONTAK | PARTISIPASI | DONASI