Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kenca kematen Ahap raja Israel, negeri Moap berontak ngelawan Israel.
2 I bas sada wari ndabuh Ahasia raja Israel, i das tarum istanana nari i Samaria, janah mekelek kal akapna. Erkiteken si e isuruhna piga-piga kalak persuruhen nungkuni Baalsebub dibata-dibata kalak Pilisti si lit i Kuta Ekron, guna meteh malem denga ia tah lang.
3 Tapi sekalak malekat TUHAN nuruh Elia nabi i Tisbe nari njumpai persuruhen Raja Ahasia e guna nungkuni, "Ngkai maka isungkunndu atendu Baalsebub, dibata Kuta Ekron? La kin akapndu lit Dibata i Israel maka bage perbahanenndu?
4 Turiken man Raja Ahasia maka nggo ikataken TUHAN, 'Lanai kam keke i bas ingan medemndu nari, mate kam la banci lang!'" Ilakoken Nabi Elia bagi si iperentahken TUHAN man bana,
5 jenari mulih minter persuruhen ndai ndahi raja. Nungkun raja nina, "Ngkai maka kam mulihken?"
6 Ngaloi persuruhen e nina, "Lit ndai sekalak dilaki njumpai kami; isuruhna kami mulih ras nuriken maka TUHAN nggo ngataken man bandu, 'Ngkai maka isuruhndu persuruhen nungkuni Baalsebub, dibata Kuta Ekron? La kin lit Dibata i Israel maka bage perbahanenndu? Lanai kam keke i bas ingan-medemndu nari, mate kam la banci lang!'"
7 "Uga rupana dilaki e?" nina raja nungkun.
8 "Ia make jubah kulit rubia-rubia, ibentingkenna benting kulit," nina persuruhen e ngaloi. "Elia kap e!" nina raja.
9 Kenca bage isuruh raja sekalak kepala tentera ras lima puluh kalak tenterana ngelegi Elia. Idapeti kepala tentera ndai Elia sangana kundul i das uruk-uruk. Nina man Elia, "O kam suruh-suruhen Dibata iperentahken raja gelah kam nusur."
10 Erjabap Elia nina, "Adi suruh-suruhen Dibata kin aku, nusur gelah api i langit nari munuh kam ras tenterandu!" Minter reh api i datas nari mbunuh kepala tentera ndai ras anak buahna.
11 Isuruh raja ka kepala tentera si deban ras lima puluh kalak tenterana. Lawes ia nangkeng, jenari nina man Elia, "O suruh-suruhen Dibata, iperentahken raja gelah minter kam nusur!"
12 Erjabap ka Elia nina, "Adi suruh-suruhen Dibata kin aku nusur gelah api i langit nari munuh kam ras tenterandu!" Emaka minter ka reh api Dibata i datas nari, mbunuh kepala tentera e ras anak buahna.
13 Isuruh raja ka sekali nari sekalak kepala tentera ras lima puluh kalak tenterana. Lawes ia ku das uruk e, kenca bage minter ia erjimpuh i lebe-lebe Elia, janah alu mengis-ngis mindo ia man Elia, "O suruh-suruhen Dibata, mekuah min atendu man bangku ras man anak buahku. Kelengilah min kesah kami!
14 Kepala tentera si dua e ras anak buahna nggo mate ipan api i langit nari, tapi man aku, mekuahlah min atendu!"
15 Nina malekat TUHAN man Elia, "Raslah kam ku rumah ula kam mbiar." Kenca bage lawes Elia ras kepala tentera ndai ndahi raja.
16 Nina Elia man raja, "Enda me kata TUHAN, 'Erkiteken isuruhndu persuruhen nungkun Baalsebub dibata kuta Ekron tempa-tempa la lit Dibata i Israel si man sungkunen. Emaka kam lanai keke i bas inganndu medem nari; mate kam la banci lang!'"
17 Jenari mate Ahasia, sue ras si kata TUHAN arah Nabi Elia. Erkiteken anak Ahasia la lit dilaki, seninana Joram ngantiken ia jadi raja Israel. Tupung e Jehoram anak Josapat nggo tahun peduaken jadi raja i Juda.
18 Kerina perbahanen si deban si ilakoken Raja Ahasia isuratken i bas kitap Sejarah Raja-raja Israel.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA