Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Saellana Rato Sulaiman mare se adu’a, dhari attas langnge’ toron apoy se ngello’ ban-kurban se eatorragi ka PANGERAN. Saellana jareya sonar kahadiranna PANGERAN nera’e Padalemman Socce jareya,
2 sampe’ para imam ta’ ngenneng maso’.
3 E bakto nangale’e apoy toron dhari langnge’ ban sonarra kahadiranna PANGERAN nera’e Padalemman Socce jareya, ra’yat Isra’il laju padha nyorkep e palesteran, pas nyemba sarta moji Allah polana Salerana sae ban kataresna’anna langgeng.
4 Saellana jareya Rato Sulaiman ban reng-oreng se akompol e jadhiya kabbi padha ngatorragi kurban ka PANGERAN.
5 Menangka kurban salameddan Sulaiman ngatorragi sape dhu lekor ebu meggi’ ban dumba saratos dhu polo ebu meggi’. Kalaban cara se kantha jareya rato ban ra’yat sacara resme ngatorragi Padalemman Socce jareya ka PANGERAN.
6 Para imam padha manjeng neng e kennengnganna se la etantowagi, dhep-adhebban ban oreng Lewi se amolja’agi PANGERAN ngangguy kas-pakakassa mosik gabayanna Rato Daud, sambi anyanye nyanyeyan "Kataresna’anna langgeng!" menorot se edhabuwagi bi’ Daud. Para imam nope tarompet sabatara ra’yat padha manjeng kabbi.
7 Sulaiman laju ngatorragi ka PANGERAN bagiyan tengngana taneyan se badha e adha’na Padalemman Socce jareya. Saellana jareya salerana laju ngatorragi e jadhiya kurban obbaran, kurban gandum ban gajina keban se egabay kurban salameddan. Kurban jareya eatorragi e jadhiya kabbi lantaran mezba paronggu badhiyanna rowa takene’ gallu’, ta’ seddheng ekabaddha ban-kurban jareya kabbi.
8 Sulaiman ban ommat Isra’il kabbi padha mabadha paraya’an Ranggun Dhaun sampe’ pettong are abidda. Reng-oreng se akompol noro’a paraya’an jareya talebat bannya’na, dhateng dhari dhaera se jauna dhari dhaja molae dhari Jalan Hamat sampe’ ka lao’ gan batessa Messer.
9 Pettong are abidda reng-oreng jareya akompol kaangguy opacara paresmeyanna mezbana PANGERAN, saellana jareya pas akompol pettong are aggi’ kaangguy paraya’an Ranggun Dhaun. E are se dhi-budhina ebadha’agi paraya’an panotoban,
10 ban kalagguwanna e tanggal tello lekor bulan petto’, Sulaiman makon reng-oreng jareya mole. Reng-oreng jareya padha perak polana sabarang se bagus se elampa’agi PANGERAN ka bangsa Isra’il ommadda, ka Daud ban ka Sulaiman.
11 Saellana Sulaiman mare se maddek Padalemman Socce ban karaton menorot rancanana,
12 PANGERAN ngaton pole ka salerana e bakto malem. PANGERAN adhabu ka salerana, "Sengko’ la ngedhing du’ana ba’na ban Sengko’ narema bengko reya menangka kennengngan se malolo kaangguy ngatorragi kurban ka Sengko’.
13 Mon Sengko’ ta’ matoron ojan, otabana madhateng balang se matadha’a hasel bume, otabana madhateng wabah panyaket ka Tang ommat reya,
14 ban Tang ommat se ngangguy Tang nyama jareya ngasorragi aba’ ban adu’a sarta entar ka Sengko’ tor addina’agi lalakonna se juba’, dhari sowarga Sengko’ ngedhingngagiya du’ana reng-oreng jareya. Sa-dusana bi’ Sengko’ esapora’a, ban nagarana bi’ Sengko’ epama’mora pole.
15 Sengko’ terrosa ajaga padalemman reya ban Sengko’ ngedhingngagiya sakabbinna du’a se etojjuwagi ka Sengko’ dhari kennengngan reya.
16 Jareya kabbi bi’ Sengko’ elakonana polana kennengngan reya bi’ Sengko’ la epele ban la epamalolo daddi kennengnganna oreng abakte ka Sengko’ salanjangnga. Bi’ Sengko’ ejaga’a ban elindhungana saterrossa.
17 Mon ba’na esto ngabdi ka Sengko’ akantha Daud, ramana, atoro’ ka apa se daddi Tang karep sarta ta’at ka Tang kom-hokom sarta ngalakone sabarang se eparenta’agi Sengko’ ka ba’na,
18 Sengko’ neptebbana Tang janji ka Daud, ramana ba’na, iya areya ja’ salanjangnga terrosa badha settong toronanna se daddi rato e Isra’il.
19 Tape mon ba’na ban ra’yadda nerrak Tang kom-hokom ban Tang sabarang se la eparenta’agi bi’ Sengko’, sarta nyemba ka ba-diba,
20 Sengko’ makalowara ba’na dhari nagara se bi’ Sengko’ la ebagi ka ba’na kabbi reya. Bariya keya Sengko’ ondura dhari bengko reya se bi’ Sengko’ la eteptebbagi menangka kennengnganna oreng abakte ka Sengko’. E dhimma’a bai bengko reya bakal eya’-seya’a ban ekala’-gella’a bi’ oreng.
21 Padalemman Socce reya sateya talebat ehormadi oreng, tape e bakto jareya saneyap oreng se lebat e jadhiya bakal herana ban atanya, ‘Arapa nagara ban padalemman reya me’ epakantha reya bi’ Pangeran?’
22 Oreng bakal nyaoda kantha reya, ‘Sabab bangsa reya mongkore Pangeranna, GUSTE Allahna, se la ngaterragi bangatowana kalowar dhari Messer. Bangsa reya nyemba ban ajanji estowa ka ba-diba. Daddi PANGERAN madhateng balai se kantha reya ka bangsa jareya.’"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA