Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kenca Raja Salomo ndungi pertotonna, nusur api i langit nari, ipanna persembahen si nggo ipersembahken, jenari sinalsal kemulian TUHAN ndemi Rumah Pertoton e.
2 Erkiteken Rumah Pertoton nggo dem alu sinalsal kemulian TUHAN, emaka imam-imam e lanai banci bengket ku bas.
3 Kenca idah kalak Israel api e nusur i langit nari dingen sinalsal kemulian TUHAN ndemi Rumah Pertoton e, erjimpuh ia kerina ayona seh ku taneh. Isembah dingen ipujina Dibata erkiteken kiniulin ras keleng AteNa si la erkeri-kerin.
4 Kenca bage Salomo ras kerina bangsa e erbahan persembahen man TUHAN.
5 Ipersembahken Salomo 22.000 lembu dingen 120.000 biri-biri jadi persembahen persadan. Alu bage ia ras kerina bangsa Israel nangkuhken Rumah Pertoton e.
6 Imam-imam tedis i bas ingan si nggo itetapken janah i lebe imam-imam e tedis kerina kalak Lewi. Ipujina TUHAN alu alat-alat musik si nggo isikapken Daud janah ngendeken ende-enden "KekelengenNa si la erkeri-kerin," sue ras si nggo itugasken Daud. Kerina imam-imam e ngembus terompet sedangken kerina perpulungen pe tedis.
7 I tengah-tengah kesain e, arah bagin lebe Rumah Pertoton e, si ipebadiaken Salomo, ipersembahkenna i je kerina persembahen tutungen, persembahen buah gandum, dingen tabeh-tabeh i bas persembahen persadan nari. Ilakokenna e, erkiteken batar-batar tembaga si nggo ibahanna e kitiksa man ingan kerina persembahen e.
8 I bas paksa e irayaken Salomo ras kerina bangsa e wari Raya Sapo-sapo, dekahna lit pitu wari. Seh kal teremna jelma pulung, menaken i bas dalan kempak ku Hamat i Utara dingen perbalengen Mesir i Selatan.
9 Pitu wari dekahna kalak ndai nangkuhken batar-batar e, janah kenca bage pitu wari nari ka guna ngerayaken wari Raya Sapo-sapo e. I bas wari pendungi ibahanna penutupen pesta e,
10 emaka pepagina wari si pedua pulu teluken bulan si pepituken isuruhna perpulungen e mulih. Meriah kal iakapna kerna pasu-pasu si nggo ibereken TUHAN man BangsaNa Israel, man Daud ras man Salomo.
11 Kenca Raja Salomo dung erbahan Rumah Pertoton e ras istanana, dingen nggo genep sue ras si nggo isura-surakenna,
12 icidahken TUHAN BaNa man Salomo berngi e. Nina, "Nggo Kubegi pertotonndu dingen Kualoken Rumah Pertoton e jadi ingan mpersembahken persembahen man bangKu.
13 Adi la Kubereken udan, ntah adi Kusuruh labang mangani sinuan-sinuan, ntah adi Kubereken penakit laya-laya man bangsangKu,
14 adi ertoto ia man bangKu dingen erkadiola ia jenari itadingkenna si jahat si nggo ibahanna, Kubegiken pertotonna i Surga nari, Kualemi dosa-dosana, jenari Kubahan ka maka mehumur mulihken tanehna.
15 Aku si mperdiateken Rumah Pertoton enda, dingen Aku nggo ersikap megikenca kerina pertoton si itotoken i jenda,
16 sabap nggo Kupilih dingen Kupebadiaken ingan e jadi ingan ersembah man bangKu seh rasa lalap.
17 Adi patuh kam nembah Aku bali ras si nggo ibahan bapandu, ipatuhindu undang-undangKu, idalankenndu kerina si Kuperentahken man bandu,
18 adi bage Kucikep padan si nggo Kubahan ras bapandu Daud sanga Kukataken man bana, maka Israel tetap iperentah kesusurenna.
19 Tapi kune pagi kam ntah bangsandu la ngikutken undang-undang e ras perentah-perentah si nggo Kubereken man bandu, jenari nembah kam man dibata-dibata si deban,
20 adi bage Kupelawes kam i bas negeri si nggo Kubereken man bandu enda nari, dingen Kutadingken Rumah Pertoton si nggo Kupebadiaken jadi ingan ersembah man bangKu enda. I japa pe Rumah Pertoton jadi kuan-kuan dingen ciga ate kalak man bana.
21 Rumah Pertoton si genduari e ipehaga tuhu-tuhu tapi denggo asa kalak si mentas arah e mamang atena dingen nungkun ia nina, 'Ngkai maka bage ibahan TUHAN man negeri enda ras man Rumah Pertoton enda?'
22 Ijabap kalak me pagin nina, 'Erkiteken bangsa Israel nggo nadingken TUHAN Dibatana, si nggo maba nini-ninina ndarat i Mesir nari. Leket ukurna man dibata-dibata si deban dingen nembah ia man bana. Eme sabapna maka ibereken TUHAN mara si mbelin e man bangsa Israel enda.'"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA