Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Wattunna a’jari Karaeng Ahas 20 taung umuru’na, siagang 16 taung sallona ammarenta ri Yerusalem. Tena naturuki panggaukang baji’na Karaeng Daud, boena, passangalinna nagaukangi apa tenaya Nangai Batara.

² Sangkammai karaeng Israel panggaukanna ri tallasa’na siagang nasuroi taua appare’ patung Baal tambaga,

³ nampa attunu dupa ri Ka’bung Lappara’ Hinom. Ba’lalo ana’ bura’ne kalenna napassareang a’jari koro’bang mae ri barhalaya, situru’ kabiasang ja’dala’na tau le’bakamo Nabongka Batara battu ri pa’rasangang Kanaan ri wattunna napantamakki tu Israel anjo pa’rasanganga.

⁴ Assare tongi Ahas koro’bang siagang attunui dupa ri tampa’-tampa’ panynyombanga mae ri rewataya ri moncong-monconga siagang irawanganna poko’-poko’ kayu lompoa.

⁵ Lanri dorakana Karaeng Ahas, nibalang parekammi ri Karaeng Allata’alana nibeta ri karaeng Siria, le’baka allaling tongi tu Yehuda salaku tunitahang mange ri Damsyik. Nibalang parekang tongi ri Batara nibeta ri Karaeng Pekah ana’na Remalya battu ri Israel, le’baka ambunoi tantara-tantara baranina Yehuda 120.000 jaina lalang siallo bawang. Nicini’-ciniki ri Batara, Allata’alana boe-boena ke’nanga kajariang ngaseng anjo sikammaya, lanri tenanamo namappilangngeri ra’ya’ Yehuda mae ri Batara.

⁶ (28:5)

⁷ Ana’ bura’nena Ahas, niarenga Maaseya, nibunoi ri kalase’renna perwirana Israel niarenga Zikhri. Nabuno tongi Zikhri pangurusu’ balla’na karaenga niarenga Azrikam, kammayatompa nabuno tongi bongga kananna karaenga niarenga Elkana.

⁸ Manna pole anjo tu Yehuda paranna tonji tu Israel, mingka natahangi tu Israel nia’ 200.000 jaina tubaine siagang ana’-ana’, nampa nalaling ke’nanga mange ri Samaria napasierang kabusu’ siagang sanna’ jaina barang-barang nirampasa’.

⁹ Nia’ sitau na’biNa Batara niarenga Oded ammantang ri kota Samaria. Ri se’reang wattu ammotereki tantara Israel angngerang tunitahang battu ri Yehuda. Battumi Oded anruppai ke’nanga ri wattunna lantama’ ke’nanga ri kotaya. Nakanamo ri ke’nanga, "Le’ba’mi nubeta tu Yehuda lanri larroi Karaeng Allata’alana boe-boenu mae ri ke’nanga. Mingka Nalangngereki Batara antekamma palla’nu ambunoi anjo tantara Yehuda.

¹⁰ Na kamma-kamma anne eroki nupa’jari atannu anjo tu Yerusalem siagang tu Yehuda. Tenaka nuassengi angkanaya ikau doraka ngaseng tommako mae ri Karaeng Allata’alanu?

¹¹ Pilangngeri! Anne sikamma tunitahanga sangnging sari’battannu ngaseng. Jari, suromi ke’nanga ammotere’. Punna tena, tena talarroNa Batara nampa Nahukkungko."

¹² Nia’ appa’ pamimping battu ri Israel, iamintu Azarya ana’na Yohanam, Berekhya ana’na Mesilemot, Yehizkia ana’na Salum, siagang Amasa ana’na Hadlai, tena todong nasitujui panggaukanna anjo tantara ammotereka.

¹³ Nakanamo ke’nanga, "Teako erang-erangngi mae anrinni antu sikamma tau nitahanga! Ikatte tau dorakamaki’ mae ri Batara, siagang anjo dosa-dosata sangka’mi jaina sa’genta siratang nihukkung. Kamma-kamma anne ero’mako pole appanggaukang untu’ poro antambai kadorakanta."

¹⁴ Jari napassareammi sikamma tantaraya anjo sikamma tunitahanga siagang barang-barang narampasaka mae ri ra’yaka siagang pamimping-pamimpinna ke’nanga.

¹⁵ Nampa ammenteng nai’ anjo appaka pamimping untu’ angngurusuki anjo sikamma tunitahanga. Napa’bage-bageammi ke’nanga pakeang nirampasaka mae ri anjo tunitahanga ia parallua. A’bage tongi ke’nanga sapatu, kanre-kanreang siagang inung-inungang. Sikamma tunitahang lokoka niballei minynya’ zaitun. Ia tena dudua nakullei a’jappa nipanaiki ri keledaia, nampa nierang kabusu’ anjo tunitahanga mange ri Yerikho, kota jaia poko’-poko’ koro’ma, sollanna akkulle ammotere’ ke’nanga mange ri pa’rasanganna ri Yehuda. Le’baki anjo ammotere’mi tu Israel mange ri Samaria.

¹⁶ Appakkaramulami pole tu Edom ambunduki tu Yehuda nampa jai tu Yehuda natahang ke’nanga. Lanri kammana anjo appala’mi bantuang Karaeng Ahas mae ri Tiglat-Pileser, karaeng Asyur, sollanna akkiring bantuang.

¹⁷ (28:16)

¹⁸ Ia todong anjo wattua nabattu tu Filistin ambunduki kota-kota niaka ri bangkeng bulu’ bageang ilauka siagang ri daera bageang timboro’na Yehuda. Naallemi ke’nanga kota-kota Bet-Semes, Ayalon, Gederot, Sokho, Timna, Gomzo, siagang desa-desana, nampa ammantang ke’nanga anjoreng.

¹⁹ Lanri nabokoina Ahas karaeng Yehuda Batara, siagang tena naparentai ra’yaka situru’ ero’Na Batara, appabattumi kasusaang Batara mae ri tu Yehuda.

²⁰ Battui anjo karaeng Asyur teai untu’ lanabantu Ahas, pasangalinna untu’ ansusai.

²¹ Naalle tariero’na mami Ahas bulaenga battu ri Balla’Na Batara, battu ri balla’ karaenga, siagang battu ri balla’na ngaseng sikamma pamimpinna ra’yaka, nampa napassareang mae ri karaeng Asyur. Mingka tena tongija matu-matunna anjo passarena.

²² Lalang ri wattu anjo kasukkaranga, ba’lalo pila’ dorakaji Ahas mae ri Batara.

²³ Nacilakai kalenna siagang ra’ya’na lanri assarena koro’bang mae ri rewata-rewatana tu Siria le’baka ambetai. Nakana nawa-nawana, "Rewata-rewata Siria le’ba’ ambantui karaeng-karaeng Siria, jari punna assarea’ koro’bang mae ri anjo rewata-rewataya, barang akkulle tonga’ natulung."

²⁴ Nampa naalle sikontu pakkakasa’ niaka lalang ri Balla’Na Batara naancuru’. Nampa natongko’ Balla’Na Batara, siagang ambangung tampa’-tampa’ pakkoro’bangngang ri sikontu Yerusalem.

²⁵ Ri tunggala’ kota siagang desa niaka ri Yehuda ambangungi tampa’-tampa’ panynyombang mae ri barhalaya untu’ attunu dupa mae ri rewata-rewata bansa maraenga. Lanri kammana anjo napakalarromi Batara, Allata’alana boe-boena.

²⁶ Pau-pau maraengannaya ri passala’na pamarentahanna siagang sikontu apa nagaukanga Ahas, battu ri pakaramulanna sa’genna kala’busanna, niaki nicata’ lalang ri kitta’"Pau-pauanna Sikamma Karaeng Yehuda siagang Israel."

²⁷ Matemi Ahas, na nitarawang ri Yerusalem; mingka tena nanjoreng ri jera’na sikamma karaenga. Ana’ bura’nena niarenga Hizkia ansambeangi a’jari karaeng.

2 Tawarikh

Video 2 Tawarikh 28

Ikuti Kami:

KONTAK | PARTISIPASI | DONASI