Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ahas jumenneng rato e bakto yuswana dhu polo taon, ban marenta e Yerusalim nem bellas taon abidda. Rato jareya ta’ nerowe conto se bagus dhari Rato Daud, bangatowana, tape ngalakone sabarang se ta’ masenneng panggaliyanna PANGERAN.
2 Salerana nerowe to-rato Isra’il, ban makon oreng agabay ca-arcana Ba’al dhari logam,
3 sarta ngobbar dupa e Cora Hinom. La’-mala’ pottrana dibi’ egabay kurban obbaran ka la-brahalana, menorot kabiyasa’an se juba’ dhari reng-oreng se la eojuk bi’ PANGERAN dhari nagara Kana’an e bakto oreng Isra’il maso’ ka nagara jareya.
4 Ahas ngatorragi kurban ban ngobbar dupa e pan-barampan kennengnganna panyemba’anna diba e nong-gunong ban e babana ka’-bungka’an se rampa’.
5 Sarrena Rato Ahas dusa, bi’ GUSTE Allahna edina e bakto epakala rato Siria; rato Siria jareya ngangko’ oreng Yehuda sabannya’na, ekagabay tawanan, egiba ka Damsyik. Bi’ PANGERAN Ahas epanneng keya e bakto epakala Rato Pekah ana’na Remaliya oreng ngodha dhari Isra’il se e dhalem saare mate’e saratos dhu polo ebu oreng parjuridda Yehuda se ngal-bangal. Bi’ PANGERAN, Allahna bangatowana kadaddiyan jareya kabbi epanneng polana ra’yat Yehuda ta’ parduli pole ka PANGERAN.
6 (28:5)
7 Pottrana Ahas, se anyama Ma’aseya epate’e Zikhri, parwirana Isra’il. Zikhri mate’e keya Azrikam se ngorosa karatonna rato, ban Elkana, tanang kanganna rato.
8 Maske oreng Yehuda reya sabangsa ban Isra’il, tape tantara Isra’il nawan babine’an ban na’-kana’ bannya’na dhu ratos ebu oreng; jareya kabbi eangko’ ka Samaria epabareng ban rang-barang rampasan se talebat bannya’na.
9 Badha nabbina PANGERAN, Oded asmana, alenggi e Samaria. E bakto tantara Isra’il abali ngeba tawanan dhari Yehuda, Oded nyander ka reng-oreng jareya e bakto reng-oreng jareya maso’a ka kottha. Dhabuna, "Ba’na makala oreng Yehuda polana GUSTE Allah Pangeran se esemba bangatowana ba’na duka ka oreng Yehuda. Tape PANGERAN meyarsa saapa kejjemma ba’na se mate’e reng-oreng Yehuda jareya.
10 Ban sateya reng-oreng Yerusalim sarta Yehuda bi’ ba’na ekadunora. Apa ba’na ta’ tao ja’ ba’na dibi’ padha dusa ka GUSTE Allahna?
11 Edhingngagi! Se etawan ba’na jareya taretanna ba’na dibi’. Daddi, mara soro mole kabbi. Mon enja’, PANGERAN tanto duka, sarta ngokom ba’na."
12 Badha pamimpin Isra’il kaempa, iya areya Azarya ana’na Yokanan, Berekhya ana’na Mesilemot, Yehizkiya ana’na Salum, ban Amasa ana’na Hadlai, padha nyala’agi tantara Isra’il se mole jareya.
13 Ca’na oreng se kaempa gella’, "Tawanan jareya ja’ giba dha’ enna’! Sengko’ ban ba’na la padha dusa ka PANGERAN, sa-dusa jareya cokop rajana sampe’ maduka PANGERAN, daddi sengko’ ban ba’na pantes eokom. Sateya ba’na ngalakone barang se pera’ namba’a kasala’anna."
14 Daddi bi’ rit-parjurit jareya tawanan ban rang-barang rampasan gella’ epassra’agi ka ra’yat ban pin-pamimpinna.
15 Oreng se kaempa gella’ epele epangoros para tawanan jareya. Dhari rang-barang rampasan gella’ badha angguyya; angguy jareya ebagi ka reng-oreng tawanan se marlowagi. Reng-oreng tawanan jareya eberri’i keya sapatu, kakanan ban nom-enoman. Se loka etambai mennya’ jaitun. Se ta’ kellar ajalan epanompa’ hemar, saellana jareya reng-oreng tawanan gella’ egiba ka Yerikho, kottha ka-bungkana korma, sopaja ngennenga mole ka kampongnga e Yehuda. Saellana jareya reng-oreng Isra’il jareya laju padha mole ka Samaria.
16 Reng-oreng Edom molae pole alorok Yehuda; bannya’ oreng Yehuda se etawan. Daddi Rato Ahas nyo’on kereman bantowan ka Tiglat-Pileser, rato Asyur.
17 (28:16)
18 E bakto jareya keya reng-oreng Filistin teppa’na alorok tha-kottha e dhaera babana gunong e bagiyan bara’ sarta e dhaera e bagiyan lao’na Yehuda. Oreng Filistin arebbu’ kottha Bet-Semes, Ayalon, ban Gederot, kottha Sokho, Timna, ban Gomzo sarta sa-disa e sabingkerra tha-kottha se tatello’ jareya, laju neptep e jadhiya.
19 Sarrena Ahas rato Yehuda mongkore PANGERAN ban ta’ marenta ra’yadda menorot samasthena, PANGERAN madhateng kasossa’an ka Yehuda.
20 Rato Asyur rabu banne nolongana Yehuda, la’-mala’ madhateng kasossa’an.
21 Tapaksa Ahas mondhut emmas dhari Padalemman Socce, dhari karaton, ban dhari bengkona pin-pamimpinna ra’yat, pas eatorragi ka rato Asyur. Tape jareya tadha’ gunana keya.
22 E dhalem kabadha’an se tapeppe’ kantha jareya, Ahas la’-mala’ sajan agabay dusa ka PANGERAN se alebbiyan dhari sabellunna.
23 Rato jareya macalaka’ aba’na dibi’ ban ra’yadda polana ngatorragi kurban ka ba-dibana oreng Siria se makala salerana. Ca’na panggaliyanna, "Ba-diba Siria abanto oreng Siria, daddi mon sengko’ ngatorragi kurban ka ba-diba jareya, olle daddi sengko’ etolong keya."
24 Saellana jareya Ahas mondhut sakabbinna pakakas e Padalemman Socce, pas epaancor. Padalemman Socce laju etotop, sarta laju maddek ba-mezba e saantero Yerusalim.
25 E saneyap kottha ban disa e Yehuda epaddeggi kennengnganna panyemba’anna brahala, kaangguy ngobbar dupa ka ba-dibana bangsa laen. Kalaban cara se kantha jareya Ahas maduka PANGERAN, Allahna para bangatowana ka salerana.
26 Careta laenna parkara pamarenta’anna ban sakabbinna lalakonna Ahas dhari parmola’an sampe’ aher, ecathet e dhalem ketab Sajarana To-rato Yehuda ban Isra’il.
27 Ahas seda, laju esareyagi e Yerusalim, tape banne e pasareyanna to-rato. Hizkiya pottrana epagante epajumenneng rato.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA