Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai modom ma si Josafat rap pakon ompungni, anjaha itanom ma ia i lambung ni ompungni i huta ni si Daud. Jadi si Joram, anakni ai ma bangkit raja gantihni.
2 Adong do saninani, anak ni si Josafat, ai ma: Si Asarya, si Hehiel, si Sakarya, si Asaryahu, si Mikael pakon si Sepatya; ganupan ai anak ni si Josafat, raja ni Juda ai.
3 Ibere bapa ni sidea do bani sidea buei sibere-bere pirak, omas pakon arta na maharga, sonai homa huta na pinatoguh i Juda; tapi anggo harajaon ai hubani si Joram do ibere, ai ia do bunga tubuhni.
4 Jadi dob ondos bani si Joram harajaon ni bapani ai, anjaha lambin markuasa ia, ibunuh ma ganup saninani ai bani podang, sonai homa deba humbani kopala-kopala ni Israel.
5 Marumur tolu puluh dua tahun do si Joram, sanggah na bangkit raja ai ia, anjaha ualuh tahun do dokahni ia manrajai i Jerusalem.
6 Mardalan do ia bani dalan ni raja-raja Israel, songon na binahen ni ginompar ni si Ahab; ai boru ni si Ahab do parinangonni. Anjaha ihorjahon do sogam ni uhur ni Jahowa.
7 Tapi seng ra Jahowa mangagou ginompar ni si Daud, halani padan na dob binahen-Ni hubani si Daud, anjaha halani na dob binagahkon-Ni ai hu bani pakon hubani ginomparni, mambere panondang ronsi sadokah ni dokahni.
8 Sanggah bani panorang ni si Joram mamulig ma halak Edom humbani gomgoman ni Juda, lanjar ipabangkit sidea ma sada raja manggomgom sidea.
9 Dob ai mandipar ma si Joram rap pakon puanglimani ampa haganup garetani, jadi jongjong ma ia bornginni ai mamboiskon halak Edom, na manginggotisi ai, ampa kopala ni gareta porangni.
10 Tapi age sonai lanjar mamulig do halak Edom humbani gomgoman ni Juda ronsi sadari on. Mamulig do homa ijia Libna, ai domma itadingkon raja ai Jahowa, Naibata ni ompung ni sidea.
11 Ambahni ai ipauli do panumbahan i buntu-buntu, i tanoh pardologan ni Juda; ibobahon do pangisi ni Jerusalem hubani parnaibataon na legan anjaha ipakahou do Juda.
12 Tapi das ma hubani sada surat humbani nabi Elia, na mangkatahon, “Sonon do hata ni Jahowa, Naibata ni ompungmu, si Daud: Halani na so mardalan ai ham ibagas dalan ni bapamu si Josafat, atap ibagas dalan ni si Asa, raja ni Juda,
13 tapi mardalan do ham bani dalan ni raja-raja Israel, anjaha ibobahon ham do Juda ampa pangisi ni Jerusalem hubani parnaibataon na legan, songon ginompar ni si Ahab, na mambobai Israel hu parnaibataon na legan, ambahni ai ibunuh ham do saninamu, ginompar ni bapamu, na dearan maruhur ase ham,
14 tonggor ma, pasogopon ni Jahowa ma sada hamagouan bolon bani bangsamu, hubani anakmu, hubani parinangonmu ampa hubani haganup na dong bamu.
15 Anjaha ham sandiri honaan ni naborit na parah do, ai ma naborit ibagas boltokmu, pala martahun-tahun, ronsi mandarat boltokmu halani naborit ai.”
16 Dob ai ipuhoi Jahowa ma ringis ni halak Palistim ampa halak Arab, na marianan dohorhon halak Etiopia, mangimbang si Joram.
17 Tangkog ma sidea dompak Juda, anjaha imasuki ma, itaban sidea ma sagala ugas-ugas na jumpah i rumah ni raja ai, sonai homa anakni ampa parinangonni, gabe seng dong be tading anak bani, sobali si Joahas, anakni sianggian ai.
18 Ambahni haganupan ai, ipapai Jahowa ma ia marhitei naborit ibagas boltokni, na so tartambari.
19 Dob lambin dokah, ai ma dob salpu dua tahun, mandarat ma bituhani halani naborit ai, gabe matei ma ia ibagas sitaronon na parngit tumang. Seng pala ipagara bangsani bani apuy laho pasangapkonsi, songon apuy, na pinagara bani ompungni.
20 Marumur tolu puluh dua tahun do ia sanggah na bangkit raja, anjaha ualuh tahun do dokahni manrajai i Jerusalem. Dob ai matei ma ia, sada pe lang na marpusok ni uhur. Itanom sidea ma ia i huta ni si Daud, tapi seng i tanoman ni raja-raja.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA