Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Yosafat seda laju esareyagi e pasareyanna to-rato e Kottha Daud. Yehoram pottrana se agante jumenneng rato.
2 Yehoram pottrana Yosafat, rato Yehuda, kaagungan taretan lalake’ kaennem: Azarya, Yehiyel, Zakhariya, Azariahu, Mikha’el ban Sefaca.
3 Tan-taretanna Yosafat jareya padha narema emmas, salaka ban rang-barang se aji laenna sabannya’na dhari ramana, sarta padha eparenge kottha se abinteng e Yehuda. Tape sarrena Yehoram reya pottrana se sareyang, daddi etantowagi se aganteya Yosafat jumenneng rato.
4 Saellana arassa kakobasa’anna se daddi rato la koko, Yehoram laju makon oreng mate’e tan-taretanna kabbi, bariya keya pan-barampan kaom oreng agung.
5 Yehoram jumenneng rato e bakto yuswana tello polo dhuwa’ taon, ban marenta e Yerusalim ballung taon abidda.
6 Yehoram jareya nerowe Rato Ahab ban to-rato Isra’il laenna, polana araji sala settong dhari pottra bine’na Ahab. Odhi’na possa’ ban dusa ka PANGERAN,
7 tape PANGERAN ta’ kasokan mate’e rato toronanna Daud, sabab Pangeran la ajanji ja’ toronanna Daud bakal marenta’a saterrossa.
8 E jaman pamarenta’anna Yehoram, Edom aberonta’ ka Yehuda pas maddek karaja’an dibi’.
9 Daddi Yehoram ban para panglimana kalowar netene ta-kareta perrangnga, laju alorok Edom. Rato jareya ban pangerengnga ekeppong bi’ tantara Edom, tape e baja malem ahasel narabas keppongan jareya, laju padha buru.
10 Molae dhari jareya Edom la ta’ endha’ eparenta Yehuda. E jaman jareya keya kottha Libna aberonta’ keya. Jareya kabbi kalakon polana Yehoram mongkore PANGERAN, Allah se esemba bangatowana.
11 La’-mala’ Yehoram maddek pan-barampan kennengngan panyemba’anna brahala e dhaera Pagunongan Yehuda, se andaddiyagi ra’yat Yehuda ban Yerusalim dusa ka Allah.
12 Yehoram laju narema sorat se etoles Nabbi Eliya e bakto gi’ odhi’na. Monyena sorat jareya kantha reya, "PANGERAN, Allah se esemba Daud, ngokom junandalem polana junandalem ta’ nerowe Rato Yosafat ramaepon junandalem, sareng Asa rato Yehuda, agungngepon junandalem.
13 Sabaligga, junandalem nerowe to-rato Isra’il, sareng andaddiyagi ra’yat Yehuda sareng Yerusalim ta’ esto ka Allah. Junandalem nerowe Rato Ahab sareng te-gantena. La’-mala’ junandalem mate’e tan-taretanna dibi’, mangkana tan-taretannepon junandalem gapaneka asaeyan dhari junandalem.
14 Daddi PANGERAN badhi madhatengnga okoman se berra’ ka ra’yadda junandalem, ka tra-pottrana sareng ka ji-rajina, jugan matompessa sadaja artaepon junandalem.
15 Junandalem dibi’ badhi nanggunga panyaket perro’ se sajan abit sajan sara."
16 E bakto jareya badha reng-oreng Filistin ban reng-oreng Arab se enneng e seddi’na kennengnganna reng-oreng Sudan e dhaera paseser. PANGERAN maguli atena reng-oreng jareya sopaja merrange Yehoram.
17 Daddi reng-oreng jareya laju alorok Yehuda, karatonna rato erampas essena, tra-pottrana Yehoram ban ji-rajina kabbi egiba egabay tawanan, kajabana Ahaziya, pottrana se bungso.
18 Saellana jareya kabbi, PANGERAN ngokom Yehoram, eparenge panyaket perro’ se ta’ bisa baras.
19 Para’ dhu taon abidda panyaket jareya sajan sara sampe’ dhi-budhina rato jareya seda; pasedana ce’ nyangsarana. Ra’yadda ta’ ngodhi’i api unggun menangka tandha sossa akantha e bakto sedana to-rato laenna sabellunna jareya.
20 Tadha’ oreng settonga se nangese sedana. Jinazana esareyagi e Kottha Daud, tape banne e pasareyanna to-rato. E bakto jumenneng rato, yuswana Yehoram tello polo dhuwa’ taon, ban marenta e Yerusalim ballung taon abidda.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA