Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Josapat mate dingen ikuburken i bas kuburen raja-raja i Kota Daud emaka anakna Jehoram nggantiken ia jadi raja.
2 Jehoram anak Raja Josapat i Juda nari lit enem seninana: Asaria, Jehiel, Sakaria, Asariahu, Mikael ras Sepatia.
3 Ibereken bapana man anak-anakna enda ndai melala emas, pirak, ras erta-erta si deban si meherga, janah itamakenna ia sekalak-sekalak jadi kepala i bas sada kota Juda si lit bentengna. Tapi erkiteken Jehoram anak sintua, emaka ia ibahanna gantina jadi raja.
4 Kenca kuasa Jehoram nggo ntegeh i bas kerajan e, ibunuhna kerina seninana, bage pe piga-piga peminpin-peminpin Israel.
5 Jehoram jadi raja i bas umur telu pulu dua tahun janah ia jadi raja i Jerusalem lit waluh tahun dekahna.
6 Ia pe jahat perbahanenna bali ras perbahanen Raja Ahap ras raja-raja Israel si deban, sabap nggo iempoina sekalak anak Ahap. Erdosa ia man TUHAN,
7 tapi la ate TUHAN ngkernepken kerajan Daud, sabap TUHAN nggo erbahan sada perpadanen ras Daud janah IjanjikenNa maka kesusuren Daud tetap ncikep pemerentahen.
8 Sanga pemerentahen Jehoram, bangsa Edom berontak man Juda jenari Edom nggo jadi kerajan merdeka.
9 Emaka ndarat Jehoram ras puanglimana ergereta kuda jenari iserbuna Edom. Ikepung tentera bangsa Edom Jehoram ras tenterana tapi kenca berngi ngasup ia nerang tentera Edom emaka pulah ia i bas kepungen e nari.
10 Kenca si e, Edom nggo merdeka i bas Juda nari. I bas paksa si e ka kota Lipna pe berontak man Juda, sabap Jehoram nggo nundalken TUHAN Dibata nini-ninina.
11 Tambah si e ipajekkenna ka pe ingan-ingan ersembah berhala i deleng-deleng Juda jenari ibabaina bangsa Juda ras Jerusalem erdosa man TUHAN.
12 Ikirem Nabi Elia sada surat man Jehoram, isina bagenda, "TUHAN Dibata nini-ninindu Daud ngukum kam sabap la iikutkenndu kai si ibahan bapandu Raja Josapat ntah pe si ibahan ninindu Raja Asa.
13 Tapi iikutkenndu kai si ibahan raja-raja Israel janah ibabaindu kalak Juda ras Jerusalem lanai setia man Dibata, bali ras Ahap ras raja-raja si nggantiken ia mabai Israel lanai setia man Dibata. Senina-seninandu jine pe ibunuhndu, si ndauh ulin asangken kam.
14 Erkiteken si e mesangat pagi iukum TUHAN rayatndu, anak-anakndu, ras kemberahen-kemberahenndu, janah erta-ertandu IkernepkenNa me.
15 Kam jine pe nandangi mesui me iakapndu sabap turah me penakit si mekelek i bas beltekndu janah tambah wari tambah kelekna."
16 Sanga si e lit kalak Pilisti ras Arab ringan deherken bangsa Sudan si erkuta i tepi lawit. Iajuk TUHAN bangsa-bangsa e gelah iperangna Jehoram.
17 Emaka iserbuna Juda, ibuatna kerina erta-erta si lit i bas istana, jenari ibabana jadi tabanen kerina kemberahen-kemberahen raja ras anak-anakna si dilaki, seakatan anakna si nguda eme Ahasia.
18 Kenca si enda ndai kerina nggo jadi, ipeturah TUHAN i bas beltek raja sada penakit si mesui mekelek.
19 Menam dua tahun dekahna penakit e tetap erkelekna seh maka dungna mate raja e i bas kiniseran si mesangat. Tupung ia mate la ipegara rayatna api pinugun lako nghamatisa; adi man nini-ninina nai semal ipegara kalak api pinugun e.
20 Sanga Jehoram jadi raja umurna telu pulu dua tahun, janah nggo ia merentah i Jerusalem lit waluh tahun dekahna. Tupung ia mate ise pe la lit rate ceda. Ikuburken kalak ia i bas Kota Daud tapi la i bas kuburen raja-raja.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA