Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Kenca Raja Josapat i Juda nari nggo bayak dingen terberita, iaturna sada perjabun i bas anggota keluargana nari ras anggota keluarga Raja Ahap i Israel nari.

² Piga-piga tahun kenca si e lawes Josapat ku Samaria ndahi Ahap. Guna mereken kehamaten man Josapat ras rombongenna, mbue biri-biri ras lembu igeleh Ahap guna erbahan pesta man-man. Iendik-endikna Josapat gelah ras ia nerang kota Ramot i Gileat.

³ Nina man Josapat, "Nggit kam ras kita nerang kota Ramot?" Nina Josapat ngaloi, "Bali nge aku ras kam. Rayatku bali nge ras rayatndu. Ikut kami ras kam erperang."

⁴ Tapi nina Josapat tole, "Tapi sisungkun lebe TUHAN."

⁵ Emaka ilebuh Ahap nabi-nabi; lit teremna kira-kira empat ratus kalak, jenari isungkunna nabi-nabi e nina, "Banci kang kuserang kota Ramot ntah lang?" "Seranglah," nina nabi-nabi e njabapsa. "Dibata si mereken kemenangen man bandu."

⁶ Tapi nungkun Josapat nina, "Lanai kin lit i jenda nabi si deban si banci jadi kelang-kelangta nungkun man TUHAN?"

⁷ Nina Ahap njabapsa, "Lit sekalak nari, eme Mikaya anak Imla. Tapi nembeh ateku ia sabap la pernah ia ernubuat kerna si mehuli man bangku; si lalap si la mehulina." "La arus kam bage ngerana!" nina Josapat ngaloi.

⁸ Emaka ilebuh Raja Ahap sekalak pegawai istana jenari ikatakenna man pegawai e gelah minter ia lawes ngelegi Mikaya.

⁹ Duana raja e, ipakena paken kerajan. Kundul ia das kursi kinirajanna i bas ingan ngerik i daraten pintu gerbang Samaria. Janah kerina nabi-nabi e ernubuat i adep-adepenna.

¹⁰ Sekalak i bas nabi-nabi e nari eme Sedakia anak si Kenaana, ibahanna tanduk besi jenari nina man Ahap, "Bagenda nina TUHAN, 'Alu enda ilawanndu bangsa Siria e janah ikernepkenndu ia.'"

¹¹ Kerina nabi-nabi si deban pe seri cakapna nina, "Laweslah erperang ngelawan Ramot, tentu kam menang. TUHAN si mereken kemenangen man bandu."

¹² Sanga e pengawal si nggo lawes ngelegi Mikaya ngerana man Mikaya nina, "Kerina nabi-nabi si deban nggo ernubuat maka si mehuli nge jadi man raja, ntah kam pe ulin nge bage ka perbahanndu."

¹³ Tapi ngaloi Mikaya nina, "Erkiteken TUHAN si nggeluh, arus kukataken kai si isuruh Dibatangku!"

¹⁴ Kenca ia nggo tedis i adep-adepen Raja Ahap, isungkun raja ia nina, "O Mikaya, banci kang Raja Josapat ras aku lawes nerang Ramot ntah lang?" "Seranglah!" nina Mikaya njabapsa. "Tentu saja kam menang. TUHAN si mereken kemenangen man bandu."

¹⁵ Tapi ngaloi Ahap nina, "Adi kam ngerana man bangku i bas gelar TUHAN turikenlah si tuhuna. Piga kali arus kukataken si e man bandu?"

¹⁶ Nina Mikaya njabapsa, "Kuidah tentera Israel marpar i uruk-uruk desken biri-biri si la lit permakanna. Janah nina TUHAN, 'Kalak enda la lit peminpinna; pelepaslah ia mulih alu dame!'"

¹⁷ Nina Ahap man Josapat, "Bagi si kukataken man bandu ndai, la pernah inubuatken si mehuli man bangku; lalap si la mehulina!"

¹⁸ Tole nina Mikaya, "Genduari begiken si ikataken TUHAN! Kuidah TUHAN kundul i bas kursi KinirajanNa i Surga dingen kerina malekatna tedis i kawes ras KemuhenNa.

¹⁹ Nina TUHAN, 'Ise si nipu Ahap gelah ia lawes gelah ibunuh i Ramot?' Pelain-lain kerina jabap malekat e.

²⁰ Dungna reh sada kesah, ideherina TUHAN nina, 'Kutipu ateku Ahap' 'Uga carana?' nina TUHAN nungkun.

²¹ Nina kesah e ngaloi, 'Aku ndahisa janah aku erbahanca maka kerina nabi-nabi Raja Ahap e nuriken si la tuhu.' Nina TUHAN, 'To lawes jenari tipu ia. Ugapa pe ngasup nge kam nipu ia.'"

²² Jenari nina Mikaya ndungi rananna, "Enda me si nggo jadi. TUHAN si erbahanca maka nabi-nabindu enda ngataken si la tuhu man bandu. Tapi TUHAN jine ngatakenca maka bene me kam."

²³ Kenca bage ideheri nabi Sedekia si Mikaya, iparapna Mikaya jenari Nina "Ndigan kin kesah TUHAN nadingken aku jenari ngerana man bandu?"

²⁴ "Idahndu nge denggo sanga kam cebuni," nina Mikaya ngaloi.

²⁵ Iperentahken Raja Ahap sekalak pengawalna nina, "Tangkap Mikaya, jenari baba ia man Amon gubernur kota enda, ras man putra mahkota Joas.

²⁶ Kataken man bana duana maka ipenjarakenna Mikaya dingen roti ras lau saja bereken bana seh aku mulih alu mejuah-juah."

²⁷ "Adi mulih kam alu mejuah-juah," nina Mikaya, "e tandana maka TUHAN la ngerana bangku!" Jenari tole nina Mikaya, "Kerina kam, begiken kai si nggo kukataken enda!"

²⁸ Kenca bage Ahap, raja Israel ras Josapat raja Juda duana ras berkat nerang kota Ramot i Gileat.

²⁹ Nina Ahap man Josapat, "Sanga kita lawes erperang, aku menyamar, tapi kam pakelah paken kinirajanndu." Dage raja Israel lawes ku peperangen alu menyamar.

³⁰ Nggo iperentahken raja Siria man puanglima pasukenna si ergereta perang maka ula iserangna ise pe seakatan raja Israel.

³¹ Dage sanga idah tentera Siria Raja Josapat, kerina ia erpengakap maka Josapat me raja Israel. Emaka erkusur kalak ndai, iayakina Josapat. Tapi nderkuh Josapat, ntah isampati TUHAN Dibata ia jenari ipelawes Dibata tentera Siria e i bas Josapat nari.

³² Idah puanglima tentera si ergereta perang maka ia labo raja Israel, ntah ingadikenna ngelis-ngelissa.

³³ Tapi rembang lit sekalak tentera Siria manahken anak panahna, janah ngkenai Raja Ahap kelang-kelang perdemun baju perangna. "Nggo aku kena!" nina erlebuh man si maba gereta perangna. "Ota mulih janah ndarat i bas perang enda nari!"

³⁴ Kidekah perang e terus denga erbintur, Raja Ahap tetap tedis alu irante i das geretana ngalaken tentera Siria e. Kenca matawari sundut mate ia.

2 Tawarikh

Video 2 Tawarikh 18

Ikuti Kami:

KONTAK | PARTISIPASI | DONASI