Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri wattunna jarre’mo empoanna Rehabeam a’jari karaeng, ia siagang sikontu ra’ya’ Israel tanajampangiami hukkunNa Batara,
2 siagang tenamo namajarre’ mae ri Ia. Lanri kammana anjo nihukkummi ri Batara ke’nanga. Ri taung makalima ammarentana Rehabeam, battumi Sisak, karaeng Mesir,
3 siagang 1.200 kareta bundu’, 60.000 tantara a’jarang, kammayatompa pasukang sannaka jaina sa’genna takkullea nirekeng, kammayami pasukang Libia, Suki siagang Sudan, untu’ ambunduki tu Yerusalem.
4 Naallemi ke’nanga kota-kota niaka tembo’ pattahanganna ri Yehuda, nampa maju pole sa’genna mange ri Yerusalem.
5 Anjo wattua Karaeng Rehabeam siagang sikamma pamimpinna Yehuda nia’mi a’rappung ri Yerusalem lanri lari ke’nanga alliliangi Karaeng Sisak. Battumi Na’bi Semaya mae ri ke’nanga nampa angkana, "Kamma anne kananNa Batara, ‘Ikau ngaseng nubokoiA’, jari kamma-kamma anne Kubokoi tommako, sa’gennu nikoasaimo ri Sisak.’"
6 Mangakumi karaenga siagang sikontu pamimpinga angkanaya dorakami ke’nanga. Nakanamo ke’nanga, "Anjo apa Nagaukanga Batara adeleki."
7 Ri wattunna Nacini’ Batara angkanaya napa’jari tunami kalenna ke’nanga, a’bicarami mae ri Semaya, Nakana, "Lanri namangakuimi dosana ke’nanga, jari tenamo nalaKupanraki ke’nanga. LaKupasalamaki linta’ ke’nanga; tena nalaancuru’ Yerusalem. Mingka manna nakamma,
8 lanikoasai ke’nanga ri Sisak, sollanna akkulle naasseng ke’nanga angkanaya antekamma sisalana punna napare’ ata kalenna mae ri Nakke siagang punna napare’ ata kalenna mae ri tukoasana linoa."
9 Jari battumi Karaeng Sisak ambunduki anjo kota Yerusalem nampa narampasa’ barang-barang lompoa anggaranna niaka lalang ri Balla’Na Batara siagang ri balla’ karaenga, kammayatompa sikamma pannangkisi’ bulaeng napareka Karaeng Salomo.
10 Salaku sambenna appare’mi Rehabeam pannangkisi’-pannangkisi’ tambaga, siagang napappirannuangi mae ri sikamma perwira pangawala’na pakke’bu’ lompona balla’ karaenga.
11 Sampang battu karaenga mae ri Balla’Na Batara, naerangi sikamma pangawalaka anjo pannangkisi’-pannangkisika, nampa napoterang antama’ ri kamara’ jagaya.
12 Lanri napakatunana kalenna karaenga ri dallekanNa Batara, kammayatompa lanri nia’na ija apa-apa baji’ ri Yehuda, jari naummi larroNa Batara mae ri Rehabeam siagang tenamo nanipanraki tabasikali ri Batara.
13 Anjorengi ri Yerusalem Rehabeam ammarenta, siagang pila’ lompoi kakoasanna. Wattuna a’jari karaeng 41 taung umuru’na, siagang 17 taung sallona ammarenta ri Yerusalem, iamintu kota Napilea Batara battu ri alla’na sikontu daera Israel untu’ a’jari tampa’ panynyombang mae ri KalenNa. Amma’na Rehabeam iamintu Naama battua ri pa’rasangang Amon.
14 Dorakai panggaukanna Rehabeam lanri tena nagaukangi ero’Na Batara.
15 Pau-pauanna pamarentahanna Rehabeam battu ri pakaramulanna sa’genna kala’busang kammayatompa pattottoranna niaki nicata’ lalang ri kitta’ Pau-pauanna Na’bi Semaya siagang lalang ri kitta’ Pau-pauanna Na’bi Ido. Tuli nia’na pa’bundukang ri Rehabeam a’bali Yerobeam.
16 Matei Rehabeam nampa nitarawang ri pa’jerakkanna sikamma karaenga ri Kota Daud. Ana’na niarenga Abia ansambeangi a’jari karaeng.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA