Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Pasapuluh-ualuhtahunkon dob raja si Jerobeam, anak ni si Nebat, bangkit raja ma si Abia i Juda.

² Tolu tahun do ia manrajai i Jerusalem; si Maaka do goran ni inangni, boru ni si Absalom.

³ Anjaha ihorjahon do ganup dousa, sagala na hinorjahon ni bapani na i lobei ni; seng gok daulat ni uhurni bani Jahowa Naibatani, songon uhur ni ompung ni si Daud.

⁴ Tapi halani si Daud do, ase ibere Jahowa, Naibatani ai, bani sada palita i Jerusalem, ai ma marhitei na pabangkitkon anakni manggantihsi, anjaha totap Jerusalem ibahen;

⁵ halani ihorjahon si Daud do na pintor ibagas uhur ni Jahowa, anjaha seng manlembang ia hun bani ganup na tinonahkon-Ni bani sadokah manggoluh ia, sobali pasal si Uria, halak Heti ai.

⁶ Tapi sai tong do adong porang i tongah-tongah ni si Rehabeam pakon si Jerobeam sadokah manggoluh bei sidea.

⁷ Barita na legan ai pasal si Abia pakon ganup na binahenni ai, ai lang tarsurat do ai ibagas buku Barita ni Raja-raja ni Juda? Anjaha sai tong do adong porang i tongah-tongah ni si Abia pakon si Jerobeam.

⁸ Dob ai modom ma si Abia rap pakon ompungni, anjaha itanom ma ia i huta ni si Daud. Jadi si Asa, anakni ai ma manggantihsi.

⁹ Paduapuluhtahunkon dob raja i Israel si Jerobeam, bangkit raja ma si Asa manggomgom Juda.

¹⁰ Ompat puluh sada tahun do dokahni manrajai i Jerusalem. Goran ni ompung ni si Maaka do, boru ni si Absalom.

¹¹ Ihorjahon si Asa do na pintor bani uhur ni Jahowa, songon si Daud ompungni ai.

¹² Ai ipalaho do sagala dalahi, na marjolmahon dalahi hun tanoh ai, anjaha ipadaoh do sagala gana-gana, na pinadear ni ompungni.

¹³ Ipaturun do homa ompung ni si Maaka hun bani pangkat harajaon, halani ipadear sada gana-gana bani sisombahon Ashera; irumbakkon si Asa ma gana-gana ai anjaha itutung ma ai i topi ni Bah Kidron.

¹⁴ Tapi seng ipadaoh anggo rumah panumbahan na i buntu-buntu. Sai tong do anggo uhur ni si Asa marsijoloman hu bani Jahowa sadokah manggoluh ia.

¹⁵ Sonai homa iboan do pirak, omas pakon parugas, na dob pinapansing ni bapani pakon na pinapansingni sandiri hu Rumah ni Jahowa.

¹⁶ Sai tong do adong porang i tongah-tongah ni si Asa pakon si Baesa raja hun Israel, sadokah manggoluh bei sidea.

¹⁷ Ai tangkog do si Baesa, raja ni Israel, mandorab Juda, anjaha ibatar-batari do Rama, ase ulang tarbahen atap ise luar barang masuk marayak si Asa, raja ni Juda.

¹⁸ Dob ai ibuat si Asa ma ganup pirak pakon omas na tading ai ope hun bani arta na i Rumah ni Jahowa, sonai homa arta na i rumah ni raja ai, jadi iondoskon ma ai hu bani juakjuakni; dob ai isuruh si Asa ma sidea marayak si Benhadad, anak ni si Taberimon, tinubuhkon ni si Hesion, raja hun Aram, na marianan i Damaskus, nini ma,

¹⁹ “Marpadan ma hita, songon bapanta na marpadan samah sidea, Tonggor ma, hutongos do bamu siluah pirak pakon omas; on pe rotapkon ham ma padanmu pakon si Baesa, raja hun Israel, ase surut ia hun bangku.”

²⁰ Dob ai itangihon si Benhadad ma hata ni Raja Asa, gabe isuruh ma pambobai ni balani mandorab huta-huta ni Israel, italuhon ma huta Iyon, Dan, Abel-Bet-Maahat, ganup tanoh Kinerot pakon ganup tanoh Naftali.

²¹ Dob ibogei si Baesa na masa ai, maronti ma ia mambatar-batari Rama, gabe mulak ma ia hu Tirsa.

²² Dob ai iharah Raja Asa ma ganup Juda, sahalak pe lang na halaosan, jadi iusung sidea ma batu ni Ramah pakon parhayuni, na dob pinakei ni si Baesa ai, anjaha ipadear ma huta Geba-Benyamin pakon Mispa marhitei ai.

²³ Barita na legan ai pasal si Asa, kuasani haganup pakon ganup na binahenni ampa huta na pinajongjongni, ai lang tarsurat do ai ibagas buku Barita ni Raja-raja Juda? Tapi dob matua ia maborit do naheini.

²⁴ Dob ai modom ma si Asa rap pakon ompungni, anjaha itanom ma ia rap pakon ompungni i huta ni si Daud, ompungni ai. Jadi si Josafat, anakni ai ma manrajai gantihni.

²⁵ Tapi si Nadab, anak ni si Jerobeam do bangkit raja i Israel, paduatahunkon dob raja si Asa i Juda, anjaha dua tahun do ia manrajai i Israel.

²⁶ Anjaha ihorjahon do sogam ni uhur ni Jahowa, anjaha songon parlahou ni bapani do parlahouni pakon pardousaonni, na mambahen Israel mardousa.

²⁷ Dob ai martahi-tahi ma dompaksi si Baesa, anak ni si Ahia, hun bani ginompar ni si Isasar, anjaha ibunuh si Baesa ma ia i Gibeton, ai ma huta na masuk hu bani halak Palistim; tudu sanggah mangkubu huta Gibeton ai si Nadab pakon ganup halak Israel.

²⁸ Ibunuh si Baesa do ia, patolutahunkon dob si Asa raja i Juda, anjaha si Baesa ma bangkit raja manggantihsi.

²⁹ Dob bangkit raja ai, isiapkon ma ganup ginompar ni si Jerobeam; seng dong tading age sahalak na marhosah hun bani si Jerobeam ipaturut, sabonar isiapkon do ganup, romban hu bani hata ni Jahowa, na dob nilumbahon-Ni hinan marhitei juakjuak-Ni si Ahia, na hun Silo,

³⁰ halani dousa ni si Jerobeam na hinorjahonni ai, pakon halani na pinadari-darini ai halak Israel mambahen dousa, pakon halani na pinuhoanni ai ringis ni Jahowa, Naibata ni Israel.

³¹ Barita na legan ai pasal si Nadab pakon ganup binahenni ai, ai lang tarsurat do ai ibagas buku Barita ni Raja-raja ni Israel?

³² Sai tong do adong porang i tongah-tongah ni si Asa pakon si Baesa, raja hun Israel, sadokah manggoluh bei sidea.

³³ Patolutahunkon dob raja si Asa i Juda, bangkit raja ma si Baesa, anak ni si Ahia, manggomgom ganup Israel i Tirsa dua puluh ompat tahun dokahni.

³⁴ Ihorjahon do sogam ni uhur ni Jahowa, anjaha songon parlahou ni si Jerobeam do parlahouni pakon pardousaonni, na mambahen Israel mardousa.

1 Raja-raja

Video 1 Raja-raja 15

Ikuti Kami:

KONTAK | PARTISIPASI | DONASI