Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Lalang ruan taung sallona tena pa’bundukang ri Israel siagang Siria.
2 Mingka ri makatallun taung, a’lampami Yosafat karaeng Yehuda, angkunjungi Ahab karaeng Israel.
3 Rioloangannaya anjo le’ba’mi nakana Ahab mae ri sikamma perwira tantarana, "Nuasseng ngasengi angkanaya anjo kota Ramot ri Gilead, ikatte pata! Angngapa natena nirampasaki ammotere’ battu ri karaeng Siria?"
4 Ri wattunna battu Yosafat, akkuta’nammi Ahab angkana, "Erokko nakia’lampa siagang mange ambunduki kota Ramot?" Appialimi Yosafat angkana, "Baji’mi! A’lampaki’ siagang. Tantaraku siagang pasukang a’jarangku lasse’rei siagang tantaranu siagang pasukang a’jarannu.
5 Mingka bajiki punna nipakkuta’nangngang rolong ri Batara."
6 Jari napa’rappungammi Ahab kira-kira nia’ 400 na’bi, nampa akkuta’nang ri ke’nanga angkana, "Maka akkulleja’ mange ambunduki Ramot yareka tena?" Appialimi ke’nanga angkana, "Akkullei! LaNapassareangi Batara anjo kotaya mae ri katte."
7 Mingka akkuta’nammi pole Yosafat angkana, "Maka tenamo anrinni na’bi maraeng akkullea akkuta’nang ri Batara untu’ ikatte?"
8 Appialimi Ahab angkana, "Nia’ ija se’re, Mikha ana’na Yimla. Mingka birisika’ ri ia, nasaba’ tena le’bakai natappuanga’ apa-apa baji’; tuli apa kodia." Appialimi Yosafat angkana, "Teako akkana kammai!"
9 Jari nakio’mi Ahab sitau pagawena nasuro linta’ mange ambuntuli Mikha.
10 Anjo wattua Ahab siagang Yosafat, lalang pakeang kalompoanna, ammempoi ri empoang kakaraenganga ri tampa’ panggilingang gandunga ri dallekang pakke’bu’ lompona Samaria, nampa battu sikamma na’bia andallekang siagang ampabattui tappuna ke’nanga.
11 Kalase’renna battu ri anjo na’bi-na’bia, ia niarenga Zedekia ana’na Kenaana, appareki tanru’-tanru’ bassi nampa nakana ri Ahab, "Iaminne Nakananga Batara, ‘Tanru’-tanru’ sangkammaya minne lakitunrungangi Siria sa’genna ancuru’ ke’nanga.’"
12 Situjumi sikontu na’bi maraenga na nakana ngaseng, "Bundukimi Ramot, lammetaki’. LaNasareki’ pammetang Batara."
13 Lalanna anjo wattua nakanamo anjo tunisuroa mange ambuntuli Mikha, "Sikontu na’bi maraenga natappui pammetanna karaenga. Maka baji’ tonji tapputa sangkamma natappua ke’nanga bapa’?"
14 Mingka appialimi Mikha angkana, "Lanri Batara mattallasaka, iaji bawang lakupau apa le’baka Nakanang Batara mae ri nakke!"
15 Battuna Mikha mange ri dallekanna Karaeng Ahab, akkuta’nammi karaenga angkana, "Maka akkulleja’ siagang Karaeng Yosafat mange ambunduki Ramot, yareka tena?" Appialimi Mikha angkana, "Bundukimi! Mattantu lammetaki’. LaNasareki’ pammetang Batara."
16 Appialimi Ahab angkana, "Punna a’bicarako ri nakke lanri arenNa Batara, paui sitojennaya. Pissiapa mako kupakainga’ ri anjo passalaka?"
17 Appialimi Mikha angkana, "Kuciniki tantara Israel tassiara’ tena silolongang ri moncong-monconga. Sanrapangi ke’nanga gimbala’ tenaya pakalawakinna, siagang Nakana Batara ri sesena ke’nanga, ‘Anne taua ngaseng tena pamimpinna. Lappassammi ammotere’ ke’nanga siagang salama’.’"
18 Nampa nakana Ahab ri Yosafat, "Sai annabai kanangku? Tena le’bakai natappuanga’ apa-apa baji’. Tuli kodiaji bawang!"
19 Nakanamo pole Mikha, "Kamma-kamma anne pilangngeri apa Napaua Batara! Kuciniki Batara ammempo ri empoang kala’biranNa ri suruga, siagang sikontu malaekaka ammentengi ri ampi’Na.
20 Akkuta’nangi Karaeng Allata’ala, ‘Inai lanynyonyoki Ahab sollanna ero’ a’lampa mange a’bundu’ siagang mate ri Ramot ri Gilead?’ Tena nasangkamma-kamma pappialinna anjo malaeka’-malaekaka.
21 Kale’bakkanna nia’mo maju se’re roh. A’reppese’mi ri Batara na nakana, ‘Inakkemi lanynyonyoki.’
22 Akkuta’nammi Batara angkana, ‘Antekamma carana?’ Appialimi anjo roh angkana, ‘La’lampa’ nampa kupa’jari a’balle-balle ngaseng na’bi-na’bina Ahab.’ Nakanamo Batara, ‘Baji’mi, gaukammi anjo, lakkulleko antu anynyonyoki.’"
23 Nampa nakana pole Mikha, "Jari iaminjo kajarianga! Nipa’jari a’balle-balle ngasemmi ri Batara anjo na’bi-na’bita, nasaba’ le’ba’mi Napattantu Batara angkana laNapitujuiki’ bala!"
24 Jari majumi Na’bi Zedekia nampa a’reppese’ ri Mikha na natempa ka’rang rupanna siagang nakana, "Antekamma olona laNabokoia’ RohNa Batara nampa a’bicara ri kau?"
25 Appialimi Mikha angkana, "Sinampe’ nuciniki buttina, ri wattunnu antama’ ri se’reang kamara’ untu’ accokko."
26 Naparentakammi Karaeng Ahab angkana, "Jakkalaki! Nampa erangi mange ri Amon walikotaya, siagang mange ri Yoas.
27 Suroi ke’nanga ampantamaki ri tarungkua, siagang sike’de’mo kanre siagang je’ne’ inung sareangi, sa’gengku ammotere’ siagang salama’."
28 Nakanamo Mikha, "Punna ammoterekki’ siagang salama’, battuanna tena Na’bicara Batara tete ri nakke! Sikamma hadereka anrinni a’jari sa’bi ngasengi."
29 Nampa Ahab karaeng Israel, siagang Yosafat karaeng Yehuda, a’lampami siagang mange ambunduki kota Ramot ri Gilead.
30 Nakanamo Ahab ri Yosafat, "Lammake palusukka’ siagang amminawang a’bundu’, mingka ikau parallui nupake pakeang kalompoannu." Kammaminjo nammake palusu’mo karaeng Israel ri wattunna a’lampa a’bundu’.
31 Anjo wattua anjo tallumpuloa panglima pasukang kareta pa’bundu’na Siria le’ba’mi niparentakang ri karaenna untu’ ambunduki karaeng Israel bawang.
32 Jari, ri wattunna nacini’ ke’nanga Karaeng Yosafat, nakana ngaseng ke’nanga iaminjo karaeng Israel. Lanri kammana anjo namajuimi ke’nanga. Mingka ammarrammi Yosafat,
33 sa’genna naassemmo ke’nanga angkanaya teai karaeng Israel. Jari ammarimi ke’nanga ammajui.
34 Sitabangi nia’ sitau tantara Siria allappassangi ana’ panana, natena nakunjungi angkana nai lanapitabai. Mingka anjo ana’ panaya natabai Ahab na natarrusu’ baju pa’bundukanna ri bageang sambunna. Ammarrammi Ahab mae ri paerang karetana angkana, "Nitaba’! Putaraki nanueranga’ assulu’ ri anne tampa’ pa’bundukanga!"
35 Mingka lanri sanna’na ija anjo pa’bundukanga, tuli ammantammi Karaeng Ahab nita’gala’ lalang ri karetana andallekangi tantara Siria. Assolommi ceraka battu ri loko’na naung ri dapara’na karetaya. Narapiki karueng, matemi.
36 La’birinnamo labu alloa, niparentakammi sikontu pasukang Israel ammotere’ ri kotaya siagang massing mange ri daerana,
37 lanri matemi karaenga. Jari ammotere’mi ke’nanga nampa natarawang maya’na Ahab ri Samaria.
38 Ri wattunna nitangkasi karetana ri kollang Samaria, sitabangi nia’ sikamma bai’-baine pasundala’ anjoreng a’je’ne’, siagang konkonga allepaki ceraka ri anjo karetaya, coco’ le’baki siagang apa le’baka Napau Batara.
39 Riwaya’ maraengannaya ri sesena Karaeng Ahab, ri sesena balla’ kakaraengang gadinga, kammayatompa sikontu kota le’baka nabangung, le’ba’mi nicata’ lalang ri kitta’ Riwaya’na sikamma karaeng Israel.
40 Le’ba’namo mate Ahab, Ahazia ana’na ansambeangi a’jari karaeng.
41 Ri taung makaappa’ pamarentahanna Ahab karaeng Israel, Yosafat ana’na Asa a’jari karaeng ri Yehuda.
42 Anjo wattua umuru’na tallumpulo allima taung. Ammarentai ri Yerusalem ruampulo allima taung sallona. Amma’na iamintu Azuba ana’na Silhi.
43 Sangkamma Asa, manggena, nagaukangi apa bajika Yosafat ri dallekanNa Batara. Napa’lanynyaki battu ri kakaraenganna sikamma pasundala’ bura’ne bainea, ia tugasaka ri tampa’-tampa’ panynyombanga ri barhalaya, ia niakaija tassesa ri jammanna Asa, manggena. Mingka kalenna anjo tampa’-tampa’ panynyombanga tena naancuruki. Tuli assareiji ra’yaka koro’bang siagang kamanynyang anjoreng. Yosafat appareki kappala’-kappala’ Tarsis untu’ angngalle bulaeng battu ri Ofir, mingka anjo kappala’-kappalaka tena nanjari assombala’ lanri panraki ri Ezion-Geber. Napalaki Karaeng Ahazia battu ri Israel sollanna ana’-ana’ kappala’na a’lampai siagang ana’-ana’ kappala’na Yosafat assombala’. Mingka taerokai Yosafat, manna pole nabaji’ passisambunganna siagang karaeng Israel. Nampa matemo Yosafat na nitarawang ri jera’na karaeng-karaenga ri Kota Daud. Yoram ana’na ansambeangi a’jari karaeng. Riwaya’ maraengannaya ri sesena Yosafat, ri sesena kabaranianna, siagang sikamma pa’bundukang le’baka nagaukang le’ba’mi nicata’ lalang ri kitta’ Riwaya’na sikamma karaeng Yehuda. Ri anjo jammanga tena karaenna pa’rasangang Edom. Ammarentaya anjoreng iamintu sitau kapala daera.
44 (22:43)
45 (22:43)
46 (22:43)
47 (22:43)
48 (22:43)
49 (22:43)
50 (22:43)
51 (22-52) Ri taung makasampulo antuju pamarentahanna Karaeng Yosafat battu ri Yehuda, Ahazia ana’na Ahab a’jari karaeng Israel, nampa ammarenta ri Israel ruan taung sallona.
52 (22-53) Dorakai mae ri Batara siagang naturuki panggaukanna manggena siagang amma’na, kammayatompa panggaukanna Yerobeam a’jari passabakkanga na’gau’ dosa tu Israel.
53 (22-54) Anynyombai ri Baal siagang mannuruki ri ia. Siagang sangkamma manggena ammarentaya rioloanganna, napakabattu tongi larroNa Batara, Allata’ala nasombaya tu Israel.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA