Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dhu taon lebbi tadha’ perrang e antarana Isra’il ban Siria.
2 Tape e taon se kapeng tello’, Yosafat rato Yehuda meyos ka Ahab rato Isra’il.
3 Sabellunna jareya Ahab la adhabu ka para parwirana, "Ba’na kabbi tao ja’ kottha Ramot e Gileyad rowa andhi’na Isra’il! Daddi arapa me’ ta’ erebbu’ pole dhari Siria?"
4 Daddi e bakto Yosafat rabu ka jadhiya, Ahab atanya, "Sampeyan ba’ kasokana nyerrang Ramot asareng bangsa Isra’il?" Saodda Yosafat, "Enggi, sae! Ngereng manabi asarengnga. Tantara sareng pasukan jaranna kaula pagabung sareng tantara sarta pasukan jarannepon sampeyan.
5 Namong langkong sae atanya dhimen ka PANGERAN."
6 Daddi Ahab pas makompol para nabbi bannya’na ra-kera pa’ ratos oreng, dhabuna Ahab ka bi-nabbi jareya, "Sengko’ ba’ olleya entar nyerrang Ramot apa enja’?" "Kengeng!" ca’na para nabbi jareya. "Pangeran badhi massra’agi kottha gapaneka ka junandalem."
7 Tape Yosafat atanya, "Ponapa e ka’into tadha’ nabbi laen se bisa nolong sampeyan sareng kaula atanya ka PANGERAN?"
8 Saodda Ahab, "Gi’ badha kasorang, Mikha pottrana Yimla. Tape kaula baji’ ka nabbi ganeka, polana ta’ oneng aramal parkara se sae parkara kaula; ramalanna masthe barang se ta’ sae." "Ba, ampon ja’ adhabu sapaneka!" saodda Yosafat.
9 Daddi Ahab adikane ponggaba karaton, epakon duli ngone’e Mikha.
10 E bakto jareya Ahab ban Yosafat ngagem rasogan kabessaran, padha alenggi e korse karaja’an e pagebba’anna gandum e adha’na labang sakethengnga Samaria, dineng para nabbi padha ngadhep, notorragi ramalanna bang-sebang.
11 Badha settong e antarana se anyama Zedekiya, pottrana Kena’ana, agabay dhu’-tandhu’ besse pas mator ka Ahab, "Dhabuna PANGERAN kadi ka’dhinto, ‘Mon aperranga ban Siria ba’na ngangguy dhu’-tandhu’ reya, ba’na tanto mennang.’"
12 Bi-nabbi laenna padha panemmona, pas ngoca’, "Ngereng serbu Ramot, junandalem tanto ahasel. PANGERAN tanto apareng kamennangan ka junandalem."
13 Sabatara jareya otosan se ngone’e Mikha ngoca’ ka Mikha, "Bi-nabbi se laen aramallagi ja’ rato badhi mennanga. Kadiya panjennengngan apareng ramalan se sae jugan akadi se laen."
14 Tape Mikha nyaot, "Bit asmana PANGERAN se odhi’, sengko’ pera’ ngoca’agiya se edhabuwagi PANGERAN ka sengko’!"
15 Sanapa’na Mikha ka ajunanna Rato Ahab, rato atanya, "Apa sengko’ ban Rato Yosafat olle nyerrang Ramot?" "Kengeng!" saodda Mikha. "Junandalem bakal ahasela. PANGERAN badhi apareng kamennangan ka junandalem."
16 Saodda Ahab, "Mon ba’na acaca ka sengko’ bit asmana PANGERAN, mara ngoca’ pabendher. Barampa kale ba’na kodu epaenga’ parkara jareya?"
17 Saodda Mikha, "Abdidalem nengale tantara Isra’il car-kalacer e nong-gunong akadi dumba se tadha’ oreng ngowanna. PANGERAN adhabu kadi ka’dhinto, ‘Reng-oreng reya tadha’ pamimpinna; dina me’ olle mole sampe’ salamet ka bengkona.’"
18 Dhabuna Ahab ka Yosafat, "Gu ta’ lerres ca’epon kaula? Ramalanna parkara kaula ta’ oneng sae! Juba’ terros!"
19 Atorra Mikha pole, "Samangken ngereng peyarsa’agi ponapa se edhabuwagi PANGERAN! Abdidalem nengale PANGERAN alenggi e tahtana e sowarga, para malaekat ngadek e seddi’annepon.
20 PANGERAN mareksane, ‘Sapa se nyaca’ana Ahab sopaja Ahab jareya endha’ aperrang ban mate e Ramot e Gileyad?’ Saodda kat-malaekat gapaneka acem-macem.
21 Dhi-budhina badha settong erroh se maju, nyander ka seddi’annepon PANGERAN, laju mator, ‘Abdidalem se nyaca’ana.’
22 ‘Baramma carana?’ dhabuna PANGERAN. Saodda erroh gapaneka, ‘Sareng abdidalem para nabbi epangoca’a ta’ salerressa sadaja.’ Dhabuna PANGERAN, ‘Iya, kassa’ lakone, ba’na tanto ahasel nyacae Ahab.’"
23 Mikha pas mator pole, "Ka’dhinto se salerressa! Sareng PANGERAN bi-nabbi ka’dhinto epalecek ka junandalem sabab PANGERAN ampon nantowagi neba’agiya balai ka junandalem!"
24 Nabbi Zedekiya maju ka seddi’anna Mikha, Mikha pas etamper mowana, ca’na Zedekiya jareya, "Masa’ Errohna PANGERAN adinggallagiya sengko’ ban abu-dhabu ka ba’na?"
25 Saodda Mikha, "Dhaggi’ sampeyan oneng dibi’ ka buktena mon sampeyan entar ngetek ka settong kamar."
26 "Tangkep oreng jareya!" dhabuna Rato Ahab, "pas giba ka Amon, walikota, ban ka Pangeran Yowas.
27 Kabala soro pamaso’ ka penjara, soro pakane sakone’, berri’i ngenom sakone’ bai sampe’ sengko’ dhateng salamet dhari paperrangan."
28 Dhabuna Mikha, "Manabi junandalem salamet gubar dhari paperrangan, artena PANGERAN ta’ abu-dhabu sareng abdidalem! Sadaja se badha e ka’dhinto samangken menangka saksena!"
29 Saellana jareya Ahab rato Isra’il ban Yosafat rato Yehuda, mangkat nyerrang kottha Ramot e Gileyad.
30 Dhabuna Ahab ka Yosafat, "Kaula noro’a aperrang tape nyamara, sampeyan ngagem rasogan kabessaranna." Daddi rato Isra’il jareya nyamar entar aperrang.
31 E bakto jareya panglima pasukanna kareta perrangnga Siria se tello polo dhuwa’ oreng, bi’ ratona eparenta’agi nyerrang rato Isra’il malolo.
32 Daddi, e bakto nangale’e Rato Yosafat, para panglimana pasukan Siria nyangka jareya rato Isra’il; Yosafat laju eserrang. Tape Yosafat acerreng,
33 daddi para panglima jareya pas apangrasa ja’ jareya banne rato Isra’il, daddi pas ambu se nyerrang.
34 Kabendherran badha parjurit Siria ngocol panana ban-saromban, tadha’ se etojju. Pana jareya ngenneng ka Ahab terbas e bagiyan sambunganna pangangguy perrangnga. "Sengko’ ekenneng!" cerrengnga Ahab ka kusirra karetana. "Poter, giba sengko’ kalowar dhari paperrangan reya!"
35 Tape sarrena paperrangan gi’ ta’ ambu, Rato Ahab paggun ngadek e karena perrangnga sambi etagenne ngadhep ka tantara Siria. Dharana agili dhari lokana, ngambang e dhasarra karetana. E baja asar Ahab seda.
36 E bakto para’ compet are pasukan Isra’il eparenta’agi mole kabbi ka kotthana ban dhaerana bang-sebang,
37 polana ratona la seda. Reng-oreng Isra’il padha mole pas nyareyagi jinazana Ahab e Samaria.
38 E bakto karetana eberse’e e taman Samaria, del-sondel babine’an teppa’na padha mandhi e jadhiya, dharana Ahab e karetana ejilat te’-pate’, cocok akantha se la edhabuwagi PANGERAN.
39 Careta laenna parkara Rato Ahab, parkara karaton gaddhing ban tha-kottha se epaddek salerana, la ecathet e dhalem ketab Sajarana To-Rato Isra’il.
40 Saellana Ahab seda, pas egante pottrana se anyama Ahaziya.
41 E taon se kapeng empa’ pamarenta’anna Ahab rato Isra’il, Yosafat pottrana Asa jumenneng rato e Yehuda.
42 E bakto jareya yuswana tello polo lema’ taon. Se marenta e Yerusalim sagame’ taon abidda. Ebuna iya areya Azuba pottrana Silhi.
43 Akantha ramana, Asa, Yosafat, alampa’agi pa-apa se bagus e dhalem pangoladanna PANGERAN. Del-sondel lalake’an ban babine’an se atugas e man-dhimman e kennengnganna panyemba’anna brahala re-karena dhari jamanna Asa, ramana, epatadha’ dhari karaja’anna. Tape kennengnganna panyemba’an jareya dibi’ padha tadha’ se epaancora. Ra’yat gi’ ngeba kurban ban ngobbar mennyan ka jadhiya. Yosafat abadhi pal-kapal Tarsis epangala’a emmas dhari Ofir, tape pal-kapal jareya burung se alajara polana rosak e Ezion-Geber. Rato Ahaziya dhari Isra’il matabar para bandhigana kapal Isra’il epalajara abarengngana bandhigana kapalla Yosafat, tape Yosafat nolak maske hubunganna bagus ban rato Isra’il. Saellana jareya Yosafat seda laju esareyagi e pasareyanna to-rato e Kottha Daud. Se agante jumenneng rato iya areya pottrana se anyama Yoram. Careta laenna parkara Yosafat, parkara kapahlawananna ban paperrangan-paperranganna, ecathet e dhalem ketab Sajarana To-rato Yehuda. E jaman jareya nagara Edom ta’ andhi’ rato. Se marenta e jadhiya kapala dhaera se eangkat bi’ rato Yehuda.
44 (22:43)
45 (22:43)
46 (22:43)
47 (22:43)
48 (22:43)
49 (22:43)
50 (22:43)
51 (22-52) E taon se kapeng petto bellas pamarenta’anna Rato Yosafat dhari Yehuda, Ahaziya, pottrana Ahab jumenneng rato Isra’il, laju marenta Isra’il dhu taon abidda e Samaria.
52 (22-53) Ahaziya agabay dusa ka PANGERAN, nero rama ebuna ban Rato Yerobeyam se daddi lantaranna oreng Isra’il alako dusa ka PANGERAN.
53 (22-54) Ahaziya nyemba ban ngabdi ka Ba’al. Ban akantha ramana se marenta sabellunna, rato jareya andaddiyagi keya dukana PANGERAN, Allah se esemba oreng Isra’il.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA