Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lebih dua tahun dekahna Israel ras Siria la siperangen.

² Tapi i bas tahun si peteluken, Josapat raja Juda, lawes ndahi Ahap raja Israel.

³ Nina Ahap man pegawaina, "Ma itehndu nge kita empuna kota Ramot i Gileat? Ngkai maka sinik saja kita, janah la si rebut i bas raja Siria nari?"

⁴ Jenari isungkun Ahap si Josapat nina, "Nggit kam ras kita merangi Ramot?" Erjabap Josapat nina, "Aku bali nge kap ras kam; bangsangku bangsandu, kudangku-kudandu.

⁵ Tapi sisungkun lebe TUHAN."

⁶ Emaka ipepulung Ahap nabi-nabi kira-kira empat ratus kalak teremna, janah isungkunna kalak e nina, "Kuserang nge ndia Ramot, ntah lang?" "Seranglah," nina nabi-nabi e ngaloi. "Ibereken TUHAN kemenangen man bandu."

⁷ Tapi nungkun Josapat, "La kin lit nabi si deban dalanta nungkun man TUHAN?"

⁸ "Lit sekalak nari, Mikaya anak Imla," nina Ahap njabapsa. "Tapi segat ateku ia, sabap la pernah inubuatkenna si mehuli man bangku; si la mehuli saja ngenca rusur." "Ula min bage nindu, raja," nina Josapat.

⁹ Kenca bage idilo Ahap sekalak pegawai istana, jenari isuruhna minter ngelegi Mikaya.

¹⁰ Tupung si e Ahap ras Josapat make paken kemulianna sangana kundul i kursi kinirajan, i bas ingan ngerik gandum, deherken pintu gerbang kota Samaria, janah kerina nabi-nabi e ernubuat i lebe-lebena.

¹¹ Sekalak i bas nabi-nabi e, Sedekia anak Kanana, erbahan tanduk besi, jenari nina man Ahap, "Enda si ikataken TUHAN, 'Alu tanduk besi enda iperangindu bangsa Siria e, janah ikernepkenndu ia.'"

¹² Kerina nabi-nabi si deban pe bage ka nge nina. "Serbulah Ramot, menang nge kam. TUHAN mereken kemenangen man bandu."

¹³ Tupung e nina pegawai si ngelegi Mikaya ndai, "Kerina nabi-nabi si deban nggo ernubuat si mehuli man raja; erkiteken si e kam pe ulin ka nge bage nubuatndu."

¹⁴ Tapi erjabap Mikaya nina, "I bas gelar TUHAN si nggeluh erpadan aku maka kai si isuruh TUHAN, e ngenca kukataken!"

¹⁵ Kenca ia seh i lebe-lebe Raja Ahap nungkun raja man bana nina, "O, Mikaya, iserang kami nge ndia kota Ramot, ntah lang?" "Seranglah!" nina Mikaya ngaloi. "Tentu kam menang, sabap TUHAN si mereken kemenangen e man bandu."

¹⁶ Tapi erjabap Raja Ahap, "Adi kam ngerana man bangku i bas gelar TUHAN, katakenlah si tuhuna! Piga kali kin arus kukataken si e man bandu?"

¹⁷ Ngaloi Mikaya nina, "Teridah man bangku tentera Israel marpar-merap i datas uruk, desken biri-biri si la erpermakan. Janah nina TUHAN, 'Kalak enda la lit peminpinna, pelepaslah ia mulih alu mejuah-juah.'"

¹⁸ Nina Ahap man Josapat, "Ma nggo kukataken man bandu, nabi si enda la pernah ernubuat kerna si mehuli man bangku? Si la mehuli saja ngenca rusur inubuatkenna!"

¹⁹ Iterusken Mikaya ngerana nina, "Genduari dengkehkenlah kai si ikataken TUHAN: Kuidah TUHAN kundul i bas kursi KemulianNa i Surga, dingen kerina malekat-MalekatNa tedis i DeherNa.

²⁰ Nungkun TUHAN nina, 'Ise si ngendik-ngendik Ahap gelah lawes erperang ku Ramot dingen mate denggo i je?' Deba malekat e si ngataken bage, deba ka si ngataken bagah.

²¹ Dungna reh me kesah, ideherina TUHAN, jenari nina, 'Aku ngendik-ngendiksa.'

²² 'Uga ibahanndu?' nina TUHAN nungkun. Ngaloi kesah e, 'Lawes aku jenari kubahan kerina nabi-nabi Ahap nuriken kata guak.' Nina TUHAN, 'To dage, ugapa pe ngasup kam nipu ia.'"

²³ Jenari idungi Mikaya cakapna nina, "Si enda nggo jadi. Nggo ibahan TUHAN maka kerina nabi-nabi erguak man bandu, sabap nggo itetapken TUHAN maka kam la banci la jumpa cilaka!"

²⁴ Kenca bage reh Nabi Sedekia ndeheri Mikaya, iparapna ayona, jenari Isungkunina "Ndigan nai kin Kesah TUHAN nadingken aku janah ngerana man bandu?"

²⁵ "Si e sempat nge pagi idahndu tupung kam lawes ku kamar-kamar belakang lako cebuni," nina Mikaya njabapsa.

²⁶ Kenca bage iperentahken Raja Ahap sekalak kepala tenterana nangkap Mikaya nina, "Tangkap ia! Endesken man Amon, pengulu kota enda, ras man Joas, anak raja.

²⁷ Suruh ia namakenca ku bas penjara janah sitik saja ban nakanna ras inemenna ngayak aku mulih alu mejuah-juah."

²⁸ "Adi mejuah-juah kin kam pagi mulih, e tandana TUHAN la tuhu ngerana arah aku," nina Mikaya alu sora megang. Tole nina, "Begikenlah katangku enda, o kerina bangsa."

²⁹ Kenca bage Ahap, raja Israel, ras Josapat, raja Juda lawes merangi Kota Ramot i Gileat,

³⁰ Nina Ahap man Josapat, "Asum kita lawes erperang, kusambarilah pakenku gelah ula itandai kalak, tapi kam pakelah paken kemulianndu." Emaka berkat me raja Israel ku bas perang alu la itandai kalak sabap nggo isambarina pakenna.

³¹ Tupung e nggo iperentahken raja Siria man telu pulu dua kalak tenterana si ergereta perang gelah ula iserangna ise pe seakatan raja Israel.

³² Emaka asum idah kalak ndai Raja Josapat, iatekna maka ia me raja Israel. Emaka minter ia iayaki kalak ndai, iserangna atena. Tapi asum nderkuh Josapat,

³³ tereteh man kalak ndai maka labo kepe ia raja Israel. Erkiteken si e ingadiken kalak ndai nerang Josapat.

³⁴ Tapi lit sekalak tentera Siria manahken panahna alu la ertujun, rembang ngkenai Raja Ahap i bas perdemun baju besina. "Nggo kena aku," nina man sais gereta perangna. "Ota mulih, baba aku ndarat i bas pertempuren enda nari!"

³⁵ Pertempuren e terus reh hebatna, Raja Ahap tetap tedis alu itatang i das geretana ngalaken kalak Siria e. Dareh si ndarat arah lukana maler ku teruh ngelitapi lante gereta e. Berngina mate ia.

³⁶ Nandangi sundut matawari kerina tentera Israel iperentahken gelah mulih ku kota ras daerahna sekalak-sekalak.

³⁷ Bage me perpate Raja Ahap. Maitna ibaba ku Samaria, jenari ikuburken.

³⁸ Gereta perangna ibersihken i bas kolam Samaria, i bas ingan ridi diberu-diberu si pendahinna erlua-lua, darehna idilati biang sue ras si ikataken TUHAN.

³⁹ Kerina si debanna si ilakoken Raja Ahap, subuk turi-turin kerna istanana si ihiasi alu gading ras kerina kota si ipajekkenna, isuratken i bas Sejarah Raja-raja Israel.

⁴⁰ Kenca Ahap mate, anakna Ahasia nggantiken ia jadi raja.

⁴¹ Josapat anak Asa, jadi raja Juda i bas tahun peempatken pemerentahen Ahap, raja Israel.

⁴² Tupung e umur Josapat telu pulu lima tahun, janah ia jadi raja Juda i Jerusalem dua pulu lima tahun dekahna. Gelar nandena Asuba, anak Silhi.

⁴³ Bali ras Asa bapana, si jadi raja ope ia, ibahan Josapat si mehuli i lebe-lebe TUHAN; tapi ingan-ingan ersembah man berhala-berhala la icedakenna. Emaka bangsa e terus mpersembahken persembahen-persembahen gelehen ras nutung kumenen i je.

⁴⁴ Josapat pe erbahan perdamen ras Israel.

⁴⁵ Kerina si debanna si ilakoken Josapat, kerna kerina kinirawanna i bas pertempuren-pertempuren, isuratken i bas Sejarah Raja-raja Juda.

⁴⁶ Imasapkenna kalak si pendahinna erlua-lua i bas batar-batar persembahen man berhala-berhala, subuk dilaki bage pe diberu, si lit denga tading i bas masa pemerentahen Asa, bapana.

⁴⁷ Negeri Edom la lit rajana, emaka negeri e iperentah wakil raja si itetapken raja Juda.

⁴⁸ Guna ngelegi emas ku negeri Opir, ibahan Raja Josapat kapal mbelin. Tapi ceda kapal e i Esion-Geber, emaka lanai pernah erlayar.

⁴⁹ Kenca bage isampati Raja Ahasia, atena Josapat nina, "Ras anak buahku saja suruh anak buahndu erlayar." Tapi Josapat la nggit ngaloken penampatna e.

⁵⁰ Kenca Raja Josapat mate, ia ikuburken i bas kuburen raja-raja i Kota Daud, janah anakna Jehoram nggantiken ia jadi raja.

⁵¹ Ahasia, anak Ahap jadi raja Israel i bas tahun pesepuluh pituken pemerentahen Josapat, raja Juda. Dua tahun ia dekahna jadi raja Israel i Samaria.

⁵² Ia pe jahat perbahanenna i lebe-lebe TUHAN, bali ras bapana Ahap, nandena Isebel, ras Raja Jerobeam, si mabai Israel erdosa.

⁵³ Isembahna dingen erdahin ia guna Baal, janah bali ras bapana si jadi raja ope denga ia, ipekekena rawa TUHAN, Dibata Israel.

1 Raja-raja

Video 1 Raja-raja 22

Ikuti Kami:

KONTAK | PARTISIPASI | DONASI