Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ E settong are Benhadad, rato Siria, makompol tantarana kabbi, pas asareng ban tello polo dhuwa’ rato laenna se abakta kareta perrang ban jaranna, ngeppong alorok kottha Samaria.

² Saellana jareya pas ngotos oreng ka Ahab, rato Isra’il se badha e kottha jareya epakon manapa’ dhabuna kantha reya,

³ "Rato Benhadad makon junandalem massra’agi salaka sareng emmassepon junandalem, jugan ji-rajina sareng tra-pottrana se wat-kowat."

⁴ Dhabuna Ahab, "Atorragi ka Rato Benhadad ja’ sengko’ narema ka dhabuna jareya. Sengko’ ban sabarang tang andhi’ olle pondhut."

⁵ Saellana jareya para otosan gella’ abali pole ka Ahab manapa’a dhabu laenna dhari Benhadad. Atorra para otosan jareya, "Gi’ dhimen rato abdidalem makon junandalem massra’agi ka salerana emmas sareng salakana junandalem, jugan para raji sareng tra-pottrana.

⁶ Samangken Rato Benhadad ngotos para parwirana epakon nyaloksak karatonna junandalem sareng compo’epon ba-ponggabana junandalem, sabarang se eanggep aji epakon bakta. Para parwira gapaneka bakal dhatengnga ka ka’dhinto lagguepon baja mangken."

⁷ Rato Ahab pas adikane para pamimpin Isra’il pas adhabu, "Sateya ba’na padha tao dibi’ ja’ oreng reya macalaka’a sengko’ ban ba’na. Dha’-adha’na sengko’ epaksa esoro massra’agi sakabbinna tang bine ban tang ana’ sarta tang emmas ban salaka, parenta jareya bi’ sengko’ la etorodi."

⁸ Para pamimpinna ra’yat jareya padha ngoca’, "Ampon diggal ja’ parduli, guste! Ampon ja’ torodi."

⁹ Daddi Ahab adhabu ka para otosanna Benhadad, "Atorragi ka ratona ba’na ja’ sengko’ endha’ norodi papakonna se dha’-adha’, tape se nomer dhuwa’ sengko’ ta’ endha’." Para otosan jareya ondur, tape pas abali pole ka Ahab ngeba pessen laen,

¹⁰ "Rato abdidalem ngerema tantarana se talebat bannya’na malejjara kotthaepon junandalem, kantos abuna jur-gujuranna kottha ka’dhinto kengeng eangko’ kantos tadha’ namong sareng tanangngepon tantara gapaneka. Benhadad asompa mandar eokoma para dibana, la’-mala’ mandar salerana epateyana sareng ba-dibana manabi gapaneka ta’ ejalannagi sareng salerana!"

¹¹ Dhabuna Rato Ahab, "Kabala ka Rato Benhadad: Parjurit se saongguna arassa gumbira samarena aperrang, banne sabellunna."

¹² Dhabuna Ahab jareya epanapa’ ka Benhadad e bakto teppa’na nom-enoman ban to-rato laen se daddi sakutuna e dhalem parkemahanna. Meyarsa kabar jareya Benhadad laju makon para parwirana sopaja asanat entara alorok kottha Samaria. Daddi kabbi laju padha asanat.

¹³ Sabatara jareya badha settong nabbi manggi’i Rato Ahab laju adhabu, "Ca’epon dhabuna PANGERAN, ‘Ba’na nangale’e ka tantara se sabannya’na rowa? Bi’ Sengko’ ba’na epamennanga e are teya, sopaja ba’na tao ja’ sengko’ reya PANGERAN.’"

¹⁴ "Pasera se kodu nyerrang kaadha’?" ca’na patanyana Ahab. Dhabuna nabbi jareya, "Menorot dhabuna PANGERAN rit-parjurit se gi’ ngodha pangerengnga para kapala dhaera." "Pasera se kodu mimpin pasukan se aloroga paneka?" "Junandalem dibi’," dhabuna nabbi jareya.

¹⁵ Daddi rato laju makompol rit-parjuridda se gi’ ngodha se daddi pangerengnga para kapala dhaera. Kabbi bannya’na dhu ratos tello polo dhuwa’ oreng. Bariya keya para tantara Isra’il, kabbi bannya’na pettong ebu oreng.

¹⁶ Se alorok emolae ban-aban e bakto Benhadad ban rato se tello polo dhuwa’ oreng se daddi sakutuna rowa teppa’na nom-enoman sampe’ mabu’ e parkemahanna.

¹⁷ Se maju kaadha’ iya areya rit-parjurit se gi’ ngodha gella’. Reng-oreng se bi’ Benhadad epakon nyendhemme moso, areppot ka Benhadad ja’ sakalompo’ tantara nojju ka jadhiya dhari Samaria.

¹⁸ Benhadad apareng parenta sopaja tantarana moso jareya epega’ dhi’-odhi’, ta’ parduli se dhateng jareya aperranga otaba entara menta dhame.

¹⁹ Rit-parjurit se gi’ ngodha se epamangkat bi’ Rato Ahab rowa molae mangkat dhari Samaria, etoro’ bunte’ bi’ tantara Isra’il.

²⁰ Kabbi padha mate’e moso se eadhebbi bang-sebang. Reng-oreng Siria buru, eserser bi’ oreng Isra’il. Tape Benhadad ngenneng buru, netene jaranna eerengngagi pan-barampan tantara jaranna.

²¹ Rato Ahab noro’ aperrang keya laju maancor ta-kareta perrangnga moso ban mate’e ran-jaranna. E are jareya oreng Siria ngalame kakala’an se raja.

²² Saellana jareya nabbi jareya nyabis ka Ahab laju adhabu, "Samangken junandalem gubar sareng makoko partahanan, pas abadhi rancana se mateng, sabab rato Siria bakal aloroga e mosem semme se bakal dhateng ka’dhinto."

²³ Ra-parwirana Rato Benhadad mator ka ratona, "La’-alla’an se esemba Isra’il kobasa e pagunongan; ka’dhinto lantarannepon aponapa bangsa Siria me’ epakala sareng bangsa gapaneka. Namong bangsa Siria masthe mennang manabi aperrang e tana rendha.

²⁴ Samangken langkong sae rato se tello polo dhuwa’ oreng ka’dhissa’ panyese, gante’e sareng ra-parwiraepon junandalem dibi’.

²⁵ Saamponna pas pamangkat pasukan se raja akadi pasukannepon junandalem se epakala ka’dhissa’, toro’e jaran sareng kareta perrang se bannya’epon akadi se gi’ dhimen jugan. Ngereng aperrang sareng Isra’il e tana rendha, tanto Siria mennang." Rato Benhadad atoro’ ka babala’anna ra-parwirana jareya.

²⁶ E mosem semme saellana jareya laju mamangkat tantarana ka kottha Afek aloroga oreng Isra’il.

²⁷ Bariya keya tantara Isra’il padha epakalowar ban epagenna’ gagamanna. Tantara jareya laju mangkat epadaddi dhu pasukan se akemah dhep-adhebban ban reng-oreng Siria. Mon ebandhing ban tantara Siria se mencar mossa’e dhaera jareya, pasukan Isra’il katon pera’ akantha embi’ dhu ambalan.

²⁸ Pas badha settong nabbi nyabis ka Ahab laju adhabu, "Kadi ka’dhinto dhabuna PANGERAN: ‘Sarrena reng-oreng Siria rowa nyangka ja’ Sengko’ reya pera’ kobasa e tana pagunongan malolo ban ta’ kobasa e tana rendha, bi’ Sengko’ ba’na epamennanga ka tantarana Siria se talebat rajana rowa. Ba’na ban ra’yadda bakal taowa ja’ Sengko’ reya PANGERAN.’"

²⁹ Pettong are abidda oreng Siria ban oreng Isra’il paggun neng e parkemahanna bang-sebang, saleng dhep-adhebban. E are se kapeng petto’ buru molae akeket. E dhalem paperrangan jareya oreng Isra’il mate’e saratos ebu oreng Siria.

³⁰ Reng-oreng se loka buru ka kottha Afek, tape pagar alassa kottha jareya gujur, petto lekor ebu oreng Siria ekacecce’e. Bariya keya Benhadad buru ka kottha jareya, ngetek e settong bengko e kamar bagiyan dhalem.

³¹ Para parwirana nyabis sambi mator kantha reya, "Ca’epon oreng, to-rato Isra’il bellasan ka oreng. Daddi, abdidalem sadaja nyo’ona edi nyabisa ka rato Isra’il ngangguya kalambi karong menangka panyessellan sareng tale e le’er menangka tandha atellok. Moga-moga saos junandalem ta’ epateyana."

³² Daddi para parwira jareya ngangguy kalambi karong ban tale e le’erra, pas ngadhep ka Ahab sambi mator, "Benhadad abdiepon junandalem nyo’on ka junandalem sopaja ta’ epateyana." Saodda Ahab, "Apa tang taretan jareya gi’ odhi’?"

³³ Para parwirana Benhadad jareya pajat gi’ anante’ tandha se bagus dhari Ahab. Daddi, e bakto Ahab nyebbut "taretan," laju nyaot, "Lerres, Benhadad taretannepon junandalem." Dhabuna Ahab, "Kassa’ giba dha’ enna’!" Sanapa’na ka jadhiya, Benhadad eajak netene kareta.

³⁴ Benhadad laju mator, "Kaula mabaliya ka panjennengngan tha-kottha se erebbu’ rama kaula dhari ramana panjennengngan. Panjennengngan kengeng jugan maddek pusadda kennengnganna pardagangan e kottha Damsyik akadi se elampa’agi rama kaula e Samaria." Saodda Ahab, "Adhasar janjina sampeyan ganeka, bi’ kaula sampeyan epabebasa." Saellana jareya Ahab mabadha parjanjiyan ban Benhadad laju eocol.

³⁵ Kalaban dhabuna PANGERAN, sala settong e antarana sakalompo’ nabbi makon kancana se padha nabbi keya sopaja mokol aba’na. Tape kancana jareya ta’ kasokan.

³⁶ Nabbi gella’ laju adhabu, "Sarrena sampeyan ta’ atoro’ ka dhabuna PANGERAN, sampeyan bakal eceppa’a macan mon sampeyan dhaggi’ buru paleman dhari ka’iya." Bendher onggu. Buru mangkat dhari jadhiya, nabbi buru laju eceppa’ macan.

³⁷ Saellana jareya nabbi buru manggi’i oreng laen laju adhabu, "Tore kaula pokol!" Daddi nabbi jareya bi’ oreng buru laju epokol epakaja sampe’ loka.

³⁸ Saellana jareya nabbi buru mowana ebetbet bi’ kaen terro ta’ etemmowa oreng, laju meyos pas ngadek e penggir jalan anante’ rato Isra’il lebat.

³⁹ E bakto rato jareya lebat, nabbi gella’ aera’, "Guste Se Molja, e bakto abdidalem parappa’na aperrang e dhalem paperrangan, badha parjurit abakta settong moso se ekenneng tangkep ka abdidalem. Parjurit gapaneka ngoca’, ‘Jaga oreng paneka pateppa’. Mon sampe’ buru, sampeyan se kodu epate’e menangka gantena otaba majar tello ebu pesse salaka.’

⁴⁰ Namong saamponnepon gapaneka e bakto abdidalem repot, oreng gapaneka buru." Dhabuna rato, "Ba’na la nantowagi okomanna dibi’. Ba’na kodu narema okoman jareya."

⁴¹ Nabbi jareya mokka’ betbedda mowana, daddi rato pas ngagali ja’ jareya nabbi.

⁴² Nabbi jareya laju mator ka rato, "Kadi ka’dhinto dhabuna PANGERAN, ‘Oreng se bi’ Sengko’ eparenta’agi sopaja epate’e eocol bi’ ba’na. Daddi ba’na kodu mate menangka gantena. Tantarana ba’na bakal ancorra sabab tantarana moso epanneng sampe’ ngenneng buru.’"

⁴³ Rato jareya pas gubar ka Samaria, panggaliyanna duka.

1 Raja-raja

Video 1 Raja-raja 20

Ikuti Kami:

KONTAK | PARTISIPASI | DONASI