Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 PANGERAN laju adhabu ka Nabbi Yehu pottrana Hanani, dhabuna, "Panapa’agi Tang pessen reya ka Baesa,
2 ‘Lamba’ ba’na reya banne pa-apa, tape ba’na bi’ Sengko’ la epadaddi pamimpinna Tang ommat Isra’il. Sateya ba’na alako dusa akantha Yerobeyam ban daddi lantaranna ommat Isra’il alako dusa keya, sampe’ Sengko’ peggel.
3 Daddi ba’na sabalana bi’ Sengko’ epamosna’a kabbi epakantha’a Yerobeyam.
4 La-balana ba’na se mate e kottha reya bakal ekakana pate’, ban se mate e lowar kottha bakal ekakana mano’.’"
5 Pessenna PANGERAN ka Baesa ban la-balana jareya bi’ Nabbi Yehu epanapa’ ka Baesa lantaran Baesa alako dusa ka PANGERAN, sampe’ maduka PANGERAN, banne pera’ polana Baesa la mate’e sakabbinna balana Yerobeyam. Careta laenna parkara Baesa, tamaso’ kapahlawananna la ecathet e dhalem ketab Sajarana To-rato Isra’il. Baesa seda laju esareyagi e Tirza. Ela, pottrana, epagante jumenneng rato.
6 (16:5)
7 (16:5)
8 E taon se kapeng nem lekor e dhalem pamarenta’anna Rato Asa e Yehuda, Ela pottrana Baesa jumenneng rato e Isra’il. Se marenta e Tirza dhu taon abidda.
9 Zimri, parwira se ngapalae saparona pasukan kareta, akomplot ngamoso Ela. E settong are e Tirza, Ela nom-ngenoman sampe’ mabu’ e bengkona Arza, kapalana roma tatanggana karaton.
10 Zimri maso’ laju mate’e Ela, saellana jareya pas daddi rato agante Ela. Jareya kadaddiyan e taon se kapeng petto lekor e dhalem pamarenta’anna Rato Asa e Yehuda.
11 Gi’ buru daddi Rato Zimri laju mate’e sakabbinna ana’ binena Rato Baesa. La’-mala’ la-balana ban ca-kanca lalake’anna kabbi tadha’ se epalopoda.
12 Cocok ban apa se la edhabuwagi PANGERAN ka Baesa kalaban parantara’anna Nabbi Yehu, ana’ binena Baesa epate’e kabbi.
13 Baesa ban Ela, pottrana, nyemba ba-diba ban daddi lantaranna oreng Isra’il alako dusa. Daddi reng-oreng jareya andaddiyagi dukana PANGERAN, Allah se kodu esemba oreng Isra’il.
14 Caretana Ela laenna la ecathet e dhalem ketab Sajarana To-rato Isra’il.
15 E taon se kapeng petto lekor pamarenta’anna Rato Asa e Yehuda, Zimri jumenneng rato Isra’il ban marenta e Tirza pettong are abidda. E bakto jareya tantara Isra’il teppa’na ngeppong Gibeton, kotthana oreng Filistin.
16 E bakto ngedhing ja’ Zimri akomplot ngamoso rato ban la mate’e rato jareya, e are jareya keya reng-oreng Isra’il neng e parkemahanna padha mele Omri, panglimana, epajumenneng rato Isra’il.
17 Saellana jareya Omri ban pasukanna abali dhari Gibeton, terros entar ngeppong Tirza.
18 E bakto jareya Zimri ngoladi ja’ kottha la erebbu’ bi’ Omri, daddi laju maso’ ka karatonna; karatonna jareya laju eobbar epabareng ban salerana dibi’, sampe’ seda e dhalem apoy.
19 Se kantha jareya kalakon lantaran Zimri alako jahat menorot pangoladanna PANGERAN. Padha ban Rato Yerobeyam, Zimri alako dusa ka PANGERAN keya ban daddi lantaranna ommat Isra’il alako dusa keya.
20 Careta laenna parkara Zimri, tamaso’ komplodan pangkiyanadanna se erancana’agi, la ecathet e dhalem ketab Sajarana To-rato Isra’il.
21 Bangsa Isra’il pecca dhuwa’ lantaran badha se terro sopaja Tibni pottrana Ginat se epajumennengnga rato, tape badha pole se terro sopaja se epajumenneng Rato Omri.
22 Dhi-budhina oreng se noro’ Omri mennang. Tibni seda ban Omri daddi rato.
23 Jareya kalakon e taon se kapeng tello polo settong pamarenta’anna Asa e Yehuda. Omri daddi rato se marenta Isra’il dhubellas taon abidda. Dhari dha’-adha’na sampe’ nem taon abidda marenta e Tirza.
24 Tape saellana jareya laju mondhut gunong argana nem ebu pesse salaka dhari oreng se anyama Semer. Omri laju maddek kottha e gunong jareya, se laju e nyamae Samaria, ngala’ nyamana Semer, oreng se andhi’ gunong jareya.
25 Omri agabay dusa se araja’an dhari se elampa’agi to-rato se marenta sabellunna.
26 Akantha Yerobeyam, Omri agabay dusa ban daddi lantaranna oreng Isra’il alako dusa keya ban nyemba diba. Daddi jareya maduka PANGERAN, Allah se kodu esemba oreng Isra’il.
27 Careta laenna parkara Rato Omri ban sabarang se elampa’agi la ecathet e dhalem ketab Sajarana To-rato Isra’il.
28 Saellana jareya Omri seda ban esareyagi e Samaria, sarta laju egante pottrana se anyama Ahab.
29 E taon se kapeng tello polo ballu’ pamarenta’anna Rato Asa e Yehuda, Ahab, pottrana Omri jumenneng rato Isra’il sarta marenta e Samaria dhu lekor taon abidda.
30 Etembang to-rato se marenta sabellunna, Rato Ahab jareya e dhalem pangoladanna PANGERAN dusana lebbi raja.
31 Dusana banne pera’ cara dusana Yerobeyam; Ahab jareya la’-mala’ araji Izebel pottrana Rato Etba’al dhari Sidon, sarta nyemba ka Ba’al.
32 Ahab maddek kennengnganna panyemba’an ka Ba’al e Samaria, ban e dhalem kennengnganna panyemba’an jareya epobuwi mezba kaangguy diba jareya.
33 Salaenna jareya Ahab abadhi keya arcana Dewi Asyera. Dusana alebbiyan dhari dusana sakabbinna to-rato se marenta sabellunna salerana. Daddi Ahab mapeggel PANGERAN, Allah se kodu esemba ommat Isra’il.
34 E jaman pamarenta’anna Ahab jareya, kottha Yerikho epaddek pole bi’ Hiyel, oreng Betel. Tape akantha se la edhabuwagi sabellunna bi’ PANGERAN kalaban parantara’anna Yusak pottrana Nun, Hiyel kaelangan ana’na kadhuwa: se sareyang, Abiram nyamana, mate e bakto Hiyel masang dhasarra kottha Yerikho, ban Segub, ana’ bungsona, mate e bakto Hiyel masang bang-labangnga kottha jareya.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA