Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E bakto jareya pottra lake’na Yerobeyam se anyama Abiya nganglo.
2 Dhabuna Yerobeyam ka rajina, "Kassa’ ba’na entar ka Silo ka compo’na Nabbi Ahiya se sabbanna adhabu ja’ sengko’ reya daddiya rato Isra’il. Tape ba’na nyamar me’ olle tadha’ oreng se tao sapa ba’na se sabendherra.
3 Ngeba’agi le-olle roti sapolo meggi’, jajan sakone’ ban maddu sabutol. Tanya’agi ba’ baramma’a daddina tang ana’ reya. Bi’ nabbi jareya ba’na tanto ebalai."
4 Daddi rajina Yerobeyam laju mangkat ka compo’na Nabbi Ahiya e Silo. Nabbi jareya la ta’ ngoladi polana la ce’ seppona.
5 Tape bi’ PANGERAN eparenge oneng ja’ rajina Yerobeyam rabuwa ka jadhiya atanya’a parkara pottrana se nganglo. Nabbi Ahiya jareya bi’ Pangeran la eparenge oneng keya apa se kodu edhabuwagi. Sanapa’na ka jadhiya rajina Yerobeyam tha-kantha ngako oreng laen.
6 Tape bakto meyarsa monyena tendagga e labang, Nabbi Ahiya adhabu, "Ngereng eatore lenggi, abdidalem oneng junandalem rajina Yerobeyam. Aponapa junandalem me’ kadhik nyamar? Badha kabar juba’ kaangguy junandalem.
7 Junandalem gubar saos pas atorragi ka Yerobeyam ja’ PANGERAN, Allahna Isra’il adhabu sapaneka, ‘Bi’ Sengko’ ba’na la epele dhari antarana ra’yat ban epangobasae Tang ommat Isra’il.
8 Bi’ Sengko’ ba’na la eberri’i karaja’an se bi’ Sengko’ ekala’ dhari toronanna Daud. Tape ba’na ta’ akantha Daud Tang abdi rowa. Daud ce’ estona ka Sengko’ ban atoro’ ka Tang parenta. Se elakone coma sabarang se eanggep bendher bi’ Sengko’.
9 Tape ba’na ngalakone kajahadan se araja’an dhari sabarang se tao elakone sakabbinna se marenta sabellunna ba’na. Ba’na mongkore Sengko’ ban mapeggel Sengko’ polana ba’na agabay brahala ban ca-arca dhari logam se esemba’a.
10 Daddi Sengko’ madhatengnga balai ka toronanna ba’na. Sakabbinna toronanna ba’na se lalake’, bi’ Sengko’ epateyana kabbi, ta’ parduli apa’a bai pangkadda. Kalowargana ba’na epatadha’a karena akantha rombu se esapowe epaberse.
11 Kalowargana ba’na se mate e kottha bakal ekakana pate’, ban se mate e lowar kottha bakal ekakana mano’. Senga’, Sengko’ PANGERAN se ngoca’ reya!’"
12 Saellana jareya Nabbi Ahiya adhabu ka rajina Yerobeyam, "Samangken junandalem gubar! E bakto junandalem buru maso’ ka kottha, pottrana bakal seda’a.
13 Ra’yat Isra’il sadajana bakal nangesa sareng ngoburragiya pottraepon junandalem ka’dhinto. Namong settong gapaneka anggotana kalowargana Yerobeyam se badhi ekoburragi sacara hormat, sabab namong pottra gapaneka saos se masenneng panggaliyanna PANGERAN, Allahna Isra’il.
14 Sareng PANGERAN Isra’il bakal eparengngana rato se ngaherana kadhudhugannepon toronanna Yerobeyam menangka rato. Arena ampon dhapa’! Ngabidi samangken
15 PANGERAN badhi ngokoma Isra’il kantos ga’ongga’an akadi galagas e dhalem aeng. PANGERAN badhi nyabuda ra’yat Isra’il dhari nagara se sae ka’dhinto, se ampon eparengngagi PANGERAN ka bangatowana bangsa Isra’il. Sadajana badhi epasalebbudana ka bara’na Songay Efrat lantaran mapeggel PANGERAN polana abadhi ca-arcana Dewi Asyera.
16 PANGERAN badhi adinggallagi Isra’il lantaran Yerobeyam abadhi dusa sareng andaddiyagi oreng Isra’il abadhi dusa jugan."
17 Saellana jareya rajina Yerobeyam laju mangkat ka Tirza. E bakto maso’ ka dalemma, pottrana seda.
18 Ra’yat Isra’il nanges noduwagi kasossa’anna, sarta laju ngoburragi jinazana pottrana Yerobeyam jareya akantha se la edhabuwagi PANGERAN kalaban parantara’anna Nabbi Ahiya, abdina.
19 Careta laenna parkara Rato Yerobeyam, iya areya pamarenta’anna ban paperrangan se epimpin salerana, la ecathet e dhalem ketab Sajarana To-rato Isra’il.
20 Dhu lekor taon abidda Yerobeyam jumenneng rato, saellana jareya laju seda terros esareyagi, pas egante pottrana se anyama Nadab.
21 E bakto Rehabeyam, pottrana Sulaiman, jumenneng rato Yehuda, yuswana pa’ polo settong taon. Se marenta abidda petto bellas taon neng e Yerusalim. Dhari sanagara Isra’il kottha jareya bi’ PANGERAN ekusussagi epadaddi kennengnganna abakte ka Salerana. Ebuna Rehabeyam iya areya Na’ama dhari bangsa Amon.
22 Bangsa Yehuda ngalakone barang se jahat e dhalem pangoladanna PANGERAN. Tengkana reng-oreng jareya lebbi mapeggel Pangeran etembang ban sabarang se tao elakone bangatowana.
23 E attassa mo’-gumo’ ban e babana ju-kajuwan raja, reng-oreng jareya maddek kennengngan panyemba’anna brahala, ban maddek gu-tugu sarta ca-arcana dewi Asyera se esemba’a.
24 Se paleng parana, e sakabbinna kennengngan jareya apabadha lalake’an ban babine’an se daddi sondel menangka kabakteyan ka dibana. Oreng Yehuda ajalannagi sabarang se juba’ se la elakone sa-bangsa se eojuk PANGERAN e bakto oreng Isra’il maso’ ka nagara jareya.
25 E taon se kapeng lema’ e dhalem pamarenta’anna Rehabeyam, Sisak, rato Messer nyerrang Yerusalim.
26 Rang-barang se arga se badha e dhalem Padalemman Socce ban e karatonna rato, bariya keya meng-tameng emmas gabayanna Sulaiman, erampas kabbi.
27 Daddi menangka gantena Rato Rehabeyam abadhi meng-tameng paronggu, se eparcaja’agi ka para parwira se ajaga labang sakethengnga karaton.
28 Sabban rato meyos ka Padalemman Socce, para pangawal ngeba meng-tameng jareya, saellana pas epabali ka kamar jaga.
29 Careta laenna parkara Rehabeyam la ecathet e dhalem ketab Sajarana To-rato Yehuda.
30 E dhalem jaman pamarenta’anna Rehabeyam, ros-terrosan badha perrang e antarana Rehabeyam ban Yerobeyam.
31 Saellana jareya Rehabeyam seda sarta laju esareyagi e pasareyanna to-rato e Kottha Daud. Se agante daddi rato iya areya pottrana se anyama Abiyam.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA