Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nalangngereki karaeng bainena pa’rasangang Syeba ri passala’ kacara’dekanna Salomo. Jari battumi mange ri Yerusalem untu’ anso’ri Salomo siagang pakkuta’nang sukkara’-sukkaraka.
2 Battui a’rurung siagang jai parurunna siagang unta battalaka napakamma lurang rampa-rampa, batu paramata, siagang sanna’ jaina bulaeng. Ri wattu assibuntulu’na siagang Salomo, sangka’ rupami napakkuta’nangngang akkullea napikkiri’.
3 Yangasenna anjo pakkuta’nanga akkullei napiali Salomo, tena manna se’re sukkara’ dudu mae ri ia.
4 Jari nasa’bimi kalenna anjo karaeng bainea antekamma tinggina pangngassenganna Salomo. Naciniki balla’ karaeng nabangunga Salomo,
5 cara-carana pagawena anjama-jama ri balla’ kakaraenganga, pakeang sirupana ke’nanga, kammayatompa pa’ballakanna ke’nanga. Naciniki kanrea siagang je’ne’ inung nipatalaya, cara-carana palayanga allayani ri passua’-suarranga, siagang koro’bang-koro’bang nipassareanga ri Salomo lalang ri Balla’Na Batara. Yangasenna anjo napakalannasa’mi siagang takkonta’mi nyawana anjo karaeng bainea battua ri pa’rasangang Syeba anciniki.
6 Jari nakanamo ri Karaeng Salomo, "Sikontu kabara’ kulangngereka ri pa’rasangangku ri sesena ikatte siagang kacara’dekanta, memang kammatojengi!
7 Riolo tena kukkulle tappa’, mingka battukumo mae siagang kusa’bikang ngasemmi sikammaya anjo siagang mata kalengku, nampama’ a’jari tappa’. Sikontutojenna sikontu anjo apa le’baka kulangngere’ tenapa natawaruanna battu ri anjo apa kucinika kamma-kamma anne. Ma’nassana bella jaina anjo pangngassenganta siagang kakalumanynyanganta naia anjo kabara’ nipabattua mae ri nakke.
8 Teai sipato’ upa’na ngaseng anjo bainenta! Siagang teai sipato’ upa’na sikamma pagawe-pagawe tuli anjamaya untu’ ikatte sa’genna akkulle nalangngere’ battu ri kalenta sikontu pangngajarang pangngassengang tinggia mabajika.
9 Nipujimi Batara, Allata’alata! Lalang Naangkatta a’jari karaeng Israel, Napappicinikammi Batara antekamma mangngaiNa mae ri katte. Tena le’ba’-le’ba’na Nakamaseang bansa Israel; Iaminjo saba’na na Naangkakki’ a’jari karaenna ke’nanga, sollanna akkulle kipaenteng hukkunga siagang kaadelanga."
10 Nampa anjo karaeng baine battua ri pa’rasangang Syeba assaremi hadiah mae ri Salomo ia naeranga, iamintu la’bi 4.000 kilo battala’na bulaeng siagang jai batu paramata, kammayatompa rampa-rampa. Tena le’bakami ribokoangannaya Salomo annarima kammaya anjo jaina rampa-rampa sangkamma anjo napassareanga anjo karaeng baine battua ri pa’rasangang Syeba mae ri ia.
11 (Kappala’-kappala’na Hiram angngeranga bulaeng battu riOfir untu’ Salomo angngerang tongi jai batu paramata siagang kayu cendana.
12 Anjo kayua napakei Salomo untu’ appare’ tarali-tarali ri Balla’Na Batara siagang ri balla’ kakaraenganga; kammayatompa untu’ appare’ kacapi siagang gambusu’ untu’ sikamma pakelonga. Anjo kayu-kayua iami kayu cendana kaminang baji’ ia le’baka nipabattu mange ri Israel; tena le’bakami ribokoanganna accini’ taua kayu kammaya anjo baji’na.)
13 Pantaranganna hadia-hadia biasaya napassareang Salomo, nasare tongi anjo karaeng baine battua ri pa’rasangang Syeba iamintu sikontu apa napalaka. Nampa ammotere’mo anjo karaeng bainea mange ri pa’rasanganna siagang tau niaka anrurungangi.
14 Taung-taungi Salomo annarima a’biring 23.000 kilo battala’na bulaeng,
15 tena nirekengi passawallang-passawallang nagappaya a’danggang, siagang sima-sima battua ri sikamma padangganga, karaeng-karaeng Arab siagang guburnur-guburnurna Israel.
16 Salomo appareki 200 pannangkisi’ lompo battu ri bulaeng nide’deka. Bulaeng nipake untu’ massing-massing anjo pannangkisika nia’ kira-kira tuju kilo battala’na.
17 Kammayatompa appare’ tongi 300 pannangkisi’ bulaeng ca’diangnganga. Bulaeng nipake untu’ massing-massing anjo pannangkisi’ ca’dia nia’ kira-kira rua kilo battala’na, yangasenna bulaeng nide’de’. Sikontu anjo pannangkisika naboliki lalang ri kamara’ niarenga Kamara’ Romang Libanon.
18 Appare’ tommi se’re empoang kakaraengang lompoa ia nilapisika siagang gading siagang nibelo-beloia siagang bulaeng ti’no’.
19 Ammakei pattungkulang, nampa pimbali-balina nia’ patung singa. Ri bokona anjo kaderaya nia’ patung ulu sapi. Anjo kaderaya ammake tongi annang baringang tuka’.
20 Ri massing cappa’ kairina siagang cappa’ kananna anjo baringang tukaka nia’ patung singa — yangasenna nia’ sampulo anrua jaina. Tenanniakka nale’ba’ nia’ empoang karaeng kammaya anjo manna pole na ri kakaraengang kemae.
21 Yangasenna pakkakasa’ pangnginunganna Salomo sangnging bulaeng nipare’, kammayatompa sikontu pakkakasa’ ri Kamara’ Romang Libanon, sangnging bulaeng ti’no’ todong nipare’. Tena nania’ nipare’ battu ri pera’, nasaba’ ri jammanna Salomo tena anggaranna peraka.
22 Jai kappala’ lompona Salomo assombalaka siagang kappala’-kappala’na Hiram. Tattallun taung sikali ammotereki anjo sikamma kappalaka angngerang bulaeng, pera’, gading, dare’ siagang jangang-jangang cenderawasih.
23 Karaeng Salomo la’bi kalumanynyangangi siagang la’bi tinggiangngangi pangngassenganna na karaeng maraengannaya ri sikontu linoa.
24 Sikontu taua ri sikontu linoa usahai untu’ angngagangi assibuntulu’ Salomo untu’ ampilangngeri pangngajara’ pangngassengang mabajika, ia nisareangiai ri Allata’ala.
25 Massing battui ke’nanga angngerang hadia untu’ Salomo. Massing assarei ke’nanga barang-barang pera’, bulaeng, pakeang, sanjata, rampa-rampa, jarang siagang keledai. Kammaminjo taung-taung.
26 Appaentemmi Salomo pasukang tantara, iamintu 1.400 kareta pa’bundukang siagang 12.000 tantara a’jarang. Sipa’gang natampakkangi ri Yerusalem na la’binnaya napamangei ri a’rupa-rupa kota maraeng.
27 Lalang jammang pamarentahanna Salomo, ri Yerusalem anjo peraka sangkammaji barang-barang biasa sangkamma batua. Siagang kayu camara Libanon alla’bi-la’bi jaina sangkamma kayu ara biasaya.
28 Tete ri padanggang-padangganna karaenga, nipabattui jaranga battu ri Mesir siagang Kilikia,
29 siagang kareta-kareta pa’bundukanga nipabattui ri Mesir. Ballinna tassikayu jaranga iamintu 150 doe’ pera’, na ballinna tasse’rea kareta pa’bundukang iamintu 600 doe’ pera’. Nampa tete ri anjo sikamma padangganga todong nibalukammi pole anjo sikamma jaranga siagang kareta-kareta pa’bundukanga mae ri karaeng-karaeng Het siagang karaeng-karaeng Siria.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA