Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Merincuh Iblis maba kiniseran man bangsa Israel. Erkiteken si e iajukna Daud erbahan sensus.
2 Iperentahken Daud Joap ras peminpin-peminpin Israel nina, "Laweslah ku belang-belang Israel i bas ujung negeri ku ujung si deban jenari beligai rayat e, gelah kueteh beliganna."
3 Erjabap Joap nina, "Ntah mawen itambahi TUHAN beligan kalak Israel seratus kali nari asang si genduari! O Tuanku Raja, suruh-suruhenndu kap kalak e kerina. Ngkai maka isensusndu atendu, janah e erbahanca kerina bangsa ersalah?"
4 Tapi iusahaken raja maka Joap ngikutken perentahna. Lawes Joap ndalani kerina negeri Israel; kenca bage mulih ia ku Jerusalem.
5 Ilaporkenna man Raja Daud beligan kengasupen meliter eme: 1.100.000 i Israel janah 470.000 i Juda.
6 Perbahan la cocok iakap Joap perentah raja e, emaka la isensusna suku Lewi ras Benyamin.
7 La meriah ukur Dibata kerna kai si nggo ilakoken, erkiteken si e IukumNa Israel.
8 Nina Daud man Dibata, "Nggo mesangat dosa si kubahan alu erbahan sensus e! Alemi min dosangku. Motu kal perbahanenku e."
9 Kenca bage nina TUHAN man Gat, nabi si Daud,
10 "To dahi Daud janah kataken man bana maka Kubereken man bana telu si man pilihenna. Kulakoken si apai si ipilihna."
11 Lawes Gat ndahi Daud nurikenca man bana kai si nggo ikataken TUHAN nina, "Si apai si IpilihNdu?
12 Telu tahun kelihen? Ntah telu bulan kami kiam i bas adep-adepen tentera musuh-musuhndu nari? Ntah telu wari dekahna TUHAN ngelawan kam alu PedangNa, make MalekatNa maba kematen ku belang-belang taneh Israel? Apai jabapndu man TUHAN?"
13 Erjabap Daud man Gat, "Aku i bas keadan sulit kal! Tapi la ateku manusia si ngukum aku. TUHAN jinelah si ngukum aku. Sabap Ia perkuah ate.
14 Jenari ibereken TUHAN penakit sampar man bangsa Israel, emaka mate 70.000 kalak bangsa e.
15 Kenca bage IsuruhNa MalekatNa ngkernepken Jerusalem, tapi IobahNa UkurNa, jenari nina man malekat e, "Ngadi! Nggo bias!" Malekat e sanga tedis i ingan pengeriken si Arauna kalak Jebusi.
16 Idah Daud malekat e sanga tedis nahena la seh ku taneh, ncikep pedang, nggo ersikap ngkernepken Jerusalem. Kenca bage Daud ras peminpin-peminpin -- kerina make baju guni tanda ate ceda -- erjimpuh ayona seh ku taneh.
17 Ertoto Daud nina, "O TUHAN Dibata, aku si sada nge si ersalah. Aku me kalakna si merentahken sensus. Kai kin si nggo ibahan rayat si musil enda? O TUHAN Dibatangku, akulah ukum ras keluargangku ula BangsaNdu."
18 Malekat TUHAN ngatakenca man Gat maka iperentahkenna Daud lawes jenari mbangun sada batar-batar man TUHAN i ingan pengeriken Arauna.
19 Ipatuhi Daud perentah TUHAN emaka lawes ia bagi si nggo ikataken Gat man bana.
20 I jah i bas ingan pengeriken Arauna ras empat anakna dilaki sanga ngerik gandum. Sanga idahna malekat e kiam ia empatna cebuni.
21 Minter kenca idah Arauna Raja Daud reh, itadingkenna ingan pengeriken e jenari erjimpuh ayona seh ku taneh.
22 Nina Daud man Arauna, "Kutukur ingan pengerikenndu enda, gelah banci kubangun i jenda sada batar-batar man TUHAN, maka ngadi penakit sampar e. Kubereken man bandu asa ergana!"
23 "Buatlah, Tuanku Raja," nina Arauna, "bahanlah uga iakapndu mehuli." I jenda lit piga-piga lembu man tutungen jadi persembahen i babo batar-batar. Janah enda pasangen gereta lembu ras kayu pengerik man rantingna, janah enda kubereken gandum jadi persembahen; kubereken e kerina man bandu."
24 Tapi nina raja njabapsa, "Ula bage. Kugalari ateku asa ergana. La kubereken persembahen man TUHAN kai pe sikerajangenndu, si dat aku alu la nggalar."
25 Jenari igalari Daud man Arauna enem ratus duit emas man tukur ingan pengeriken e.
26 Ibangunna i je sada batar-batar man TUHAN, jenari ipersembahkenna persembahen tutungen ras persembahen persadan. Ertoto Daud jenari ibegiken TUHAN pertotonna, alu mereken api i langit nari nutung persembahen-persembahen e i babo batar-batar.
27 Isuruh TUHAN malekat e nembungken pedangna janah patuh malekat man TUHAN.
28 Alu e idah Daud maka TUHAN nggo megiken pertotonna, emaka ipersembahkenna persembahen i babo batar-batar i bas ingan pengeriken Arauna e.
29 I bas paksa si e, Kemah Perjumpan TUHAN, si nggo ibahan Musa i taneh si mesawang ras batar-batar ingan nutung persembahen lit ingan persembahen i Gibeon;
30 tapi Daud la pang lawes ersembah man Dibata ku jah erkiteken mbiar ia pedang malekat TUHAN.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA