Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Raja Daud runggu ras kerina peminpin pasuken si seribu kalak ras peminpin si seratus kalak.
2 Kenca bage imomokenna man kerina bangsa Israel nina, "Adi payo iakapndu janah adi bage peraten TUHAN Dibatanta, sisuruhlah pertenahen man temanta si sada bangsa bage pe man imam-imam dingen man kalak Lewi si ringan i bas kutana, guna ngataken man bana gelah ras kita kerina pulung i jenda.
3 Kenca bage laweslah kita ngelegi Peti Perpadanen Dibatanta si la iperdiateken sanga Saul jadi raja."
4 Payo iakap bangsa e kerina kai si ikataken Daud janah ersada arihna kerina guna ngelakokenca.
5 Ipepulung Daud rayat Israel i bas kerina negeri e nari -- menaken i perbalengen Mesir i Selatan seh kempak Dalan ku Hamat i Utara guna maba Peti Perpadanen i Kiryat Jearim nari ku Jerusalem.
6 Emaka lawes Daud ras bangsa e ngelegi Peti Perpadanen Dibata ku kota Baala, eme ku Kiryat Jearim i daerah Juda. Peti Perpadanen e maba gelar TUHAN si kundul i babo Kerubim.
7 I bas rumah Abinadap nari iangkat kalak enda ndarat Peti Perpadanen e jenari itamakenna ku das gereta si mbaru. Ussa ras Ahio mabai gereta e,
8 tapi Daud ras kerina bangsa Israel alu dem keriahen landek-landek asa gegehna guna muji Dibata dingenna rende ras make alat musik.
9 Asum kalak enda seh i bas ingan pengeriken Kidon, i je tertuktuk lembu e, emaka idadaken Ussa tanna njemak Peti Perpadanen e.
10 Merawa TUHAN man Ussa erkiteken idadapna Peti e, emaka IbunuhNa ia janah mate Ussa i adep-adepen Dibata,
11 eme sabapna ingan e igelari Peres Ussa seh wari enda. Nembeh Daud erkiteken itukul TUHAN Ussa alu pernembeh ate.
12 Kenca bage mbiar Daud kempak Dibata jenari nina, "Uga ningku mabasa Peti Perpadanen e genduari?"
13 Emaka la ibaba Daud Peti Perpadanen e ku Jerusalem. Tapi itadingkenna i bas rumah Obet Edom -- penduduk asli kota Gat.
14 Telu bulan dekahna Peti Perpadanen e tading i je. Emaka ipasu-pasu TUHAN keluarga Obet Edom ras kerina sikerajangenna.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA