¹ Aha yaklakam ki zep Farisi walya Yesussu zini ta zaka, bosena Nikodemus. Zen Yahudi zi mo aha mamna.
² Zen kam zini taka, ki zep ze gubluka, “Guru, ee mese emsa anakan tame lak, ‘Emsa Alap zer soneka– asa de tawa ta gwibin hip.’ Sap Alap de zisi zergwen sremkam, zen bejen owas-owassa syal gwe-gwibin– in kirekam em syal gwe-gwibiꞌiraye.”
³ Yesus ki zep ding gulbluka, “Eiwa denakae emsa gubluꞌan: Emsa de etan jaha gweblan sremkam, em bejen em Alap mo irik ginnik hatan.”
⁴ Ki zep ding gulbluka, “Zi mamna banakan de etan jaha gweblan hap? San ha maka ki bongna etan an zik mo sopnak ing gwe heꞌara?!”
⁵ Yesus ki zep ding gulbluka, “Eiwa denakae emsa gubluꞌan: Zini etan de jaha gwibiridan sremkam, hokam de jaha gwibiridanna, hen Alap mo Enhokam dena, zen molya Alap mo irik ginnik yaing gwek.
⁶ Zi mo jaha gweblanna, zen tim en naka, hwena Alap mo Enho nakore jaha gweblanna, zen ang hap dena.
⁷ Em ba hap de tenggwaran hap? – sap Ëe ama emsa gublul, ‘Etan de emsa jaha gwibiridan sremkam, em kitak bejen Alap mo irik ginnik yaing gwen.’”
⁸ Yesus ki zep ola gulk sun blaonblaka, “Asesena ki totoresa tailisen gwenda. Auku enna kie asal gweblanan, hwena anakare tame gunnu hom, ‘Asesena in dekon jowe gwenda,’ ahaksa, ‘Desan dep song gwera.’ Zen hen ki kirekam, Alap mo Enho nakore jaha gweblan naye.”
⁹ Nikodemus ki zep takensiblika, “Ëe home tame guꞌun. Zen kirekam banakan sa jower?”
¹⁰ Yesus ki zep ding gulbluka, “Em dwan Israelk de zi mo aha guru yawal sake, zep em ba habe insa tame gul srem gwera?
¹¹ Eiwa denakae emsa gubluꞌan: Ëe ere hon de ang ta gwen wenya ban ere mae mo tame gun nuka hen nwekam de hlaun nukae tawa la gwibirin. Hwena em ere mae hon de ang ta gwen wenya ban em molye ulink.
¹² Ëe kime auhu-kamanak denaka emsa tawa ta gwibirin, em hwena dekam home ano ola laibli gwibirin. Zep Ëe de ngatan zi mo langnak denaka emsa tawa tabinkim, em banakan dep? – taiblibin niye. Ebe mae hap gwa-gwa tangaranna.
¹³ Sap zini hom ngatan zi mo lang san dep sesek gwesek, hen dekon hom atiti gwezak– zen de emsa tawa tabin hipye. Hwena Ëe ngatan zi mo lang nakore Zi Tanganna, Ëe dekone ati gwezak.
¹⁴ Men kirekam Musa Bak tembagakam de yang gulsun wanyana tenyak gulk makan gul inkike, sasa langnak in kim golelowehe gwekake, zen kirekam sa hen ngatan zi mo lang nakore Zi Tanganna Asa gulk makan dain–
¹⁵ dekakim tingan men zen Asa daibli gweblaꞌak, hendep de gwen hap denaka hla nuk.”
¹⁶ Alap man okamanak de zisi serkam kwasang gwibirida gweka, hendep zep zere mo Tane aha-erena zer sonezimki– dekakim tingan men zen Desa daibli gweblaꞌak hendep denaban juwe srem gwek, hwena hendep de engaya gwen hap denaka sa hla nul.
¹⁷ Alap zere mo Tanena in nesa de karek tabin hip hom zer soneka, hwena dekam de Zebon onakon nesa ngaya tabin hip.
¹⁸ Zini men zen zere mo Tanena daibliblaꞌan, desa Alap hom karek tabin hip kalang gwibiridaꞌara. Hwena men zen daiblibla srem gweꞌan, desa mes kareknak de kang gun hup kalang gwibiridaka, sap zen hom zere mo Tane aha-erena daibliblak.
¹⁹ Zep a kire nakon sa Alap klis gulu: Zere mo ngatansa de golzimdin hip de Zini mes sap okamanak hata zaka, hwena okamanak de zini kawesinsi dwam nei gwibirin. Zen ngatan san dep de wet so gwe kinin hap man baes ta gwenan, sap zen karek-kareksa nol gwenan.
²⁰ Sap kareksa de gol gwen zini ngatansa man husus nei gwibirin. Zen bejen ngatannak ewet so gwe kinin– zeno mae mo syal karekna insa de tame gulzimdin srem hap.
²¹ Hwena men zen Alap mo dwam gwibin sin ang ta gwenan, zen Alap mo ngatannak ewet so kinzi gwenan, dekam zep anakan noltre gwenan, “Ano gwenna eiwa Alap mo dwam gwibin sin lwaꞌan.”
²² Dekon aha yaklakam, Yesus zere hon de ang ta gwen wenya aban mae Yerusalem mo zi srem lang san dep golesek gweka. Zao holo tolkam asa golelowehe gweka, hen zini dekam baptis ta gwibin hip yaing gwe-gwezak.
²³ Dekam baptis ta gwibin zini Yohanis Swesa nama hom bwinak tak da inꞌik. Zen dekam Aenonk hen baptis ta gwibi'inka– e yala Salim golek denak, sap zewe hona beyana. Zep zini nama zebon dep yaing gwe-gwezak– zen de ze baptis ta gwibin hipye.
²⁴ (3:23)
²⁵ Ki zep Yohanis hon de ang ta gwen wenya Yahudi wal bose zeban auyan-aza zik mo epba ola kon nerkeisa-keisa gweꞌak– mae hap: Diki a kire enkam nen taha maena su tablanda gwen– dekam de Alap mo nwenak ekun gwen srem hapye.
²⁶ Ki zep etan Yohanis osan dep lwan dahak, zao zep nenblak, “Guru, zini men zen weyana Yordan mo yakla hatase zannak eban eꞌanka, mensa em asa gubirida gwekake, ‘Zen Zen tangan,’ zen hwena angkam zisi beyakam baptis ta gwibi'ira. Angkam zini zebon en dep tingan gweꞌan. Nebon mae hwena man dan-en gweꞌan.”
²⁷ Yohanis ki zep ding gulzimki, “Zini bejen banakare syal maena gul irin– Alap de golblan sremkamye.
²⁸ Ena kie asa sane la gwek– kime anakan gu gwekye, ‘Ëe an Israelsa de ngaya tabin hip de Zisi hom, hwena ee an Desa de ngeir gubluzan hap de zi.’
²⁹ Yesus Zen we gon hap de zini men kiye. Hwena wenya mensa Zen goꞌara, zini men zen angkam Zebon dep biti gwe-gweꞌan, zen zen. Ëe hwena men kiye– we gon hap de zini in mo wal bosena. Zep ee ama sam gwesinin– anakan de akenkam, ‘We-zi darena in dawemkam e gweꞌan,’ hen ee ama isrip-sri gwe-gwenan– ano wal bosena in mo olsa de sane gwe-gwenkamye.
³⁰ Zen diki Zen sa abon onakon teipsik zahera, hwena ee asa dowehe tiner.”
³¹ Zini in zen gulk kon ati gwe zaka, Zen teipsinni. Hwena okamanak de esaltin zini, zeno mae mo enlalana hen ol toranna okama en hap dena. Ngatan zi mo lang nakore Zini in man tingan kwei-kwik guꞌura.
³² Zen mensa Zena zewe hlaul gweka hen sane gwe-gweka, desa zep nesa tonbirida gweꞌara. Hwena okamanak de zini zeno ola man hwa nulsuk gweꞌan.
³³ Hwena men zen en zeno ola nulin gwenan, zen en zep anakan eiwa nul gwenan, “Yesus Zen Alap mo Zer Sonenna.”
³⁴ Alap mo zer sonen Zini, Zen eiwakam Alap mo olsa ayang gul gwenda, sap Alap zebe hap zere mo Enhosa kitak zerblaka.
³⁵ Bian man Tane zemka dang tini ta gwenda, in zep Zen de tingan bi gwibin hip gubluka.
³⁶ Men nara Tane zem insa taibliblanna, zen mes hendep de engaya gwen hap dena nulin. Hwena Tane zemka men zen de betek nebla srem gweꞌak, zen molya engaya gwek. Zen hwena Alap mo jalak sa hendep denaban lowehe gwer.