¹ Ki zebe hwena Domba Tanena insa hla tak– Zen kim nonol dokot topna buku lak gulsunnu in kon hil gil soneka. Ki zebe hen ola sak dan-ner dan-nerkam de otweranna in kim ahanik gu aneka, “Haen!” Zeno ol aukuna in men kiye– ngli glung aukuna.
² Ki zebe hwena hla tak– kuda ngap-ngapna kim te sokin ziꞌanka. Zini men zen zersong gweꞌan zaka janasa gwirenka. Gwerbonna hen man ala nosoblak, sap Alap mes zebe hap golblaka– zen de eijannak yei-yek gwen hap denaye. In zep eijannak dep ati gwe ine zaka.
³ Ki zep etan Domba Tanena in aha dokot topna hil gil soneka. Dekam zebe etan sak– aha otweran nwe-mase makare zini in kim gu aneka, “Haen!”
⁴ Aha kudana hen dekam zep etan te sokin zika. Kudana in zeno alana kal-kala. Zini in zen zersong gweꞌan zaka zebe hap hen man Alap sosonsa golblaka– dekam de auhu-kama nakon umlaesa gulsun hup denaka, zi dikim zenaka tamera gwen hap. Zebe hap zep nebokna serkam de blal tangan naka nolblak.
⁵ Domba Tanena in ki zep etan dokot topna dan-ahanna hil gil soneka. Dekam zebe hen otweran nwe-mase makare zini insa ahanaka salblak– kim gu aneka, “Haen!” Dekam zebe hen etan kuda kakakna hla tak– kim te sokin ziꞌanka. Zini men zen zersong gweꞌan zaka zen kire-kire dohonsa dikim timbang gul gwensa gwirenka.
⁶ Etan ki zebe ola sak– dan-ner dan-nerkam de otweran ngirinnik iwe, san de zi tangan mo ol. Zen man mamkam kuda tahannak de zini insa anakan takenblaka: “Beras mo hargana emki gulkꞌnen tan: Beras dawemna angkam, aha-ere litera, aha-ere yakla blalkam de syal gwenkam de zen. Beras karekna, dan-ahare litera, zen hen aha-ere yakla blalkam de syal gwenkam de zen. Hen minyak goreng naban ho mamak naban, zen hen sa serkam hargana gulkꞌnen ner, hendep dekam zini bakam dep? – lop ta gwen naye.”
⁷ Ki zep hwena etan Domba Tanena in dokot topna dan-ner dan-nera hil gil soneka. Dekam zebe etan sak– otweran dan-ner dan-nera in kim ahanik gu aneka, “Haen!”
⁸ Hwena ki zebe etan hla tak– aha kudana kim te sokin zika. Zen hwena mes tangan sang-sang hap sopna lengse gweka. Zini men zen zersong gweꞌan zaka bosena “zi tamera gwen hap de Zini.” Lun kon hen ahanik ang gweblan daꞌanka. Zeno bosena “juwen zi mo langnak de Teipsinni.” Alap dekam zep zebe nikip golzimki– zen dikim okamanak de zisi aha hlik en naka lamera song gwen hap. Zini dan-ner dan-nerkam de aitbir song gwenkam, ahanik de tin, dan-ahan de lowehen– kirekam de aitbir song gwenkam. Ahakon eijankam de juwen, ahakon tembane srem hap de juwen, ahakon sang-sang yawala kon de juwen, hen ahakon otweran jal-jal de gwidre gwen nakon de juwe gwen.
⁹ Zen kim has eisiki, dekam zep Domba Tanena in dokot buknu aha-ere taha-tapna hil gil soneka. Dekam zebe zini hlauludak, Alap hap irase dawem nabare te kil tru tasik gweblan hap de meja iltikinnik ezauꞌuk. Zen men desa Yesus hup de ol gol halada gwen jal hap damera gwekke– zeno mae mo angna.
¹⁰ Zen ol mamkam egu ine gweꞌak, “Are Bian, teipsin tangan Zini, Em-en tangan lalakna, hen taibliblanna Em-en. Auhu-kamanak de zisi de heip gun hup dena, etan holona banakaꞌen? Sap zen zen asa damera gwek.”
¹¹ In zen ki egu gweꞌak, zebe mae hap pakean ngap-ngapsa alala dazimk. Hen man nenbiridak, “Emki engka en eeissin. Kim de Kristen wal bose wal omka tamerankam su nul soneꞌak, zen dekam sa ki lwal. Men kirekam emsa damera gwek, kirekam sa hen desa tamerankam su nul soner– men kire enkam beyana Bian Alap dam gulsun dakake.”
¹² Hwena ki zebe etan Domba Tanena insa hla tak– kim dokot buknu enamna hil gil soneka. Dekam zep serkam de jingil yawala tailki, hendep yakla nwena man kakak gweka– kaen glaing-gling kakak makan. Hen benna man kal-kal gwek– san de kala kiye.
¹³ Keisni dekam zep ngli nakon kama san dep lanna hlaka– san de asese yawal de tainkim de tetan dan lanna hlanna kiye.
¹⁴ Nglina man esek gweka, hendep man jek-jak gweka. Hen tingare kwatap-kwatapna hen kama-tek kama-tekna man langa san dep eese-sek gwek.
¹⁵ Dekam zep tingare zini eani-ning gwek– kaso-hul kaso-hulak hen kwatap-kwatapnak de kaso kles-kles san. In zen ani-ning gwek, zen sap auhu-kamanak de teipsin-teipsinni, hen nol-nolkam dena, sap jana nabare nik mo mam-mamna, hen kire-kire beya wenya, hen sap soson nabare wenya, hen sap zi mo tana iltikinnik de lowehen wenya, hen kirenak de lowehen srem wenya.
¹⁶ Kwatap-kwatapna hen kaso-hul kaso-hula insa man naherhebirida gweꞌak, “Asa em kei-king gun! Asa em ani-ning gun– Teipsin Zini Alap ne Domba Tane nik mo jal hil inni an kon!
¹⁷ Sap angkam Alap mo yakla yawalak mes zaul– dekam de zere nik mo jalsa hil in hip denakye. Hen nara zi molya zeno nik mo nwenak tatem zauku?!”