Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kon wakutu intua oyuíon intau nodia kon habar ko'i Yesus soaáḷ intau mita ing Galilea, inta duguí monia pinoyobauk i Pilatus in duguí im mahaḷuk inta pinosumbah monia ko'i Allah.
2 Nokodongogmai kon natua, ki Yesus noguman ko'i monia, "Kai monimu kamai daí intaubií mita ing Galilea inta ilimod monia tua im mobayo-bayong in dosa nongkon intau mita ing Galilea ibanea?
3 Diaía! Ta'e pokotoropdon im mo'ikow: aka mo'ikow bo diaí mogogai mogaid kon dosa, yo mo'ikow im moputuíbií komintan, naíonda bo mosia.
4 Andeka kai monimu kamai yo intaubií inta mopuḷuh bowaḷu inta kino'umpagan im menarah kon diug in Siloam im moḷobe-ḷoben dosa, poyo'bandingon in intau mita inta nogutun kon Yerusalem?"
5 Diaía! Komintanpa doman poguman-Ku ko'i monimu, "Aka mo'ikow bo diaí mogogai im mogaid kon dosa, yo mo'ikow im moputuíbií doman naí mosia."
6 Nopaḷut makow kon tua ki Yesus nongonguman kom porumpama'an, nana'a, "Oyuíon intau inta gobaínya kino'biagan pangkoi in ara. Sia namangoi notayak kom bungai im pangkoi ara tatua, ta'e diaí noko'ulií.
7 Daí sia noguman kom moḷoḷukad kong gobaí in anggurnya tatua, 'Aindon toḷu notaong in aku'oi umuran mamangoi motayak kom bungai im pangkoi ara tana'a, ta'e diaí kon dodai onda aku'oi noko'ulií kom bungainya. Daí pupuḷdon manií im pangkoinya na'a, sin diaíbií im baraguna kobiagannya kom butaí tana'a!'
8 Ta'e moḷoḷukad kon anggur tatua noguman nana'a, 'Pomayakpa makow ing kobiagannya taong tana'a, bain pasoḷanku bo pupukan im pangkoinya.
9 Sapataubií bo taong mo'iduduimai na'a momungai in sia. Ta'e aka diaípa doman yo pupuḷonkubií domandon.'"
10 Kon singgai in Sabat, ki Yesus minayak im baḷoi pososambayangan bo notunduí.
11 Kon tua oyuíon in tobatuí bobay inta aim mopuḷuh bowaḷu notaong notakit. Bobay tatua nobungkutdon sahingga in diaídon motulid in sosindognya.
12 Naonda inontong i Yesus in sia, ki Yesus noguman, "Inaí, nopia bidon in takitmu!"
13 Bo pinotudu-Nya in lima-Nya kon uḷu im bobay tatua, daí kon dodaipa doman intua sia sinimindog notulid bo poḷat nodayow ko'i Allah.
14 Ta'e itoi im baḷoi pososambayangan kon tua sinumoruí totok in noko'ontong ko'i Yesus nongundam kon singgai in Sabat. Itoi im baḷoi pososambayangan tatua noguman kon intau moaíntoí kon tua, "Onom nosinggai im mota'au pogaidan monimu, manangka intua angoidon ko wakutu in singgai mita tatua bo moki'undam, dikabií aka kon singgai in Sabat!"
15 Ta'e ki Tuhan noguman ko'inia, "Hoi intau mongomunapik, degaí diaíbií kinota'auan monimu kom mo'ikowpa momuli doman kon sapi andeka keledai monimu nongkon kurungannya aka kon singgai in Sabat sim bayaían po'inumon?
16 Kon na'a oyuíon im bobay inta mopuḷuhdon bowaḷu notaong in umuran kino'kodan makow in Ibilis. Ibilis tatua musti inggamaían nongkon inia. Sin sia tua ing katurunanbií doman i Abraham!"
17 Nokodongogmai kon singog i Yesus natua, bayongan intau kon tua inta mosaturu ko'i-Nia komintan nongo'oyak; ta'e ibanea makow totokbií in nosanang gina in noko'ontong kon oaíid mokoherang inta inaidan-Nya tatua.
18 Ki Yesus bui noliboí, "Onu degaí im mota'au-Ku popo'umpama'an aka ki Allah mamangoi momarentah saḷaku Raja? Naíonda degaí ing ka'ada'annya?
19 Ka'ada'annya tua in naíonda bo batoḷ in sesawi, inta ginamaí in intau bo pinomuḷa kong gobaínya. Batoḷ tatua nobiag simimpangkoi, daí angoian in ḷagapan bo ponompogadan im pangkoinya."
20 Onda intua ki Yesus noliboí bui, "Onupa doman in mota'au-Ku popo'umpama'an aka ki Allah mamangoi momarentah saḷaku Raja?
21 Sia naíonda bo ragi inta ginamaí in tobatuí bobay bo pino'ba'uk kon topong opat nopuḷuh noliter, bo kinaui nodapot ing kinumutad komintan."
22 Onda intua ki Yesus minayak ing kota-kotaían bo lipu-lipuíannya bo sindaḷan mopoyaput in Habar Mopia mopobayak naí Yerusalem.
23 Bo oyuíon intau noliboí nana'a ko'i-Nia, "Tuhan, tongaí topilik degaí in intau posaḷamaton?" Daí ki Yesus notubag,
24 M"Poramijidon tumu'ot kong ngara inta mosisií! Sim poko'ingat! Mobarongdon totok in intau moramiji tumu'ot kon daḷan tatua ta'e diaí mokotu'ot.
25 Aka ki togi baḷoi bo simindogdon molingkop kon ḷolingkop im baḷoinya, yo mo'ikow in dongka bidon simindog makow kon ḷuai bo umuran monangkokoí bo moguman, 'Tuang, bukataipa in ḷolingkop sin tu'otan nami!' Ta'e ki togi baḷoi tatua motubag ko'i monimu nana'a, 'Diaíbií kota'auan-Ku mongo nongkon onda im mo'ikow!'
26 Daí mo'ikow moguman doman nana'a, 'Kami inta ain nonga'an bo nonginum noyotakin i Tuang, bo ki Tuang doman inta ain nopoyaput in Habar Mopia kon kotaí mita nami!'
27 Bo Sia bui notubag ko'i monimu, 'Diaíbií kino'ta'aun-Ku mongo nongkon onda im mo'ikow. Bayakdon nongkon na'a, mo'ikow intau mita inta nogaid kom mongora'at!'
28 Ko wakutu im moko'ontong im mo'ikow ko'i Abraham, ko'i Ishak bo ko'i Yakub takin nabi mita mogaid kon rame kom bonu in dunia mobagu i Allah, yo mongombaḷbií im mo'ikow sim moaíjar ing gina monimu sin aindon inuntun pinoḷuai.
29 Intau mita inta nongkon Timur, Barat, Utara bo Toḷatan komintan mamangoi sim morame kom bonu in dunia mobagu i Allah.
30 Bo totu'ubií kon oyuíon intau inta no'i'tontumi, mobalií mo'i'una totok, bo intau inta no'i'una totok mobalií mo'i'tontumi."
31 Ko wakutu intua tongonumai degaí intau im Parisi namangoi bo noguman ko'i Yesus, "Bayakdon! Taḷa'aidon in tampat tana'a! Bayakdon tampat ibanea makow, sing ki Herodes moroncana molimod ko'i-Nimu."
32 Ta'e ki Yesus noguman ko'i monia, "Bayakdon bo poguman kon intau tatua inta mo'ibog momoguya'at kon roncana i Allah, 'Singgai na'a bo ikoḷom aku'oi moguntun kon dimukud mora'at bo mongundam kon intau mita notakit, ta'e kon singgai intoḷunya, Aku'oi im mongingguputdon kon oaíidan-Ku.'
33 Ta'e umpakah natua yo Aku'oi im mustipabií mongingguput kom bobayaían-Ku in singgai na'a, ikoḷom bo to'umaí, sin diaíbií mopia in tobatuí nabi limodon kon ḷuai in Yerusalem.
34 Yerusalem, Yerusalem! Nabi mita sinoko'limodmu, totabaí mita i Allah sinokoaírab monimu im batu nodapot im minatoi! Aindon kotongonu degaí Aku'oi mo'ibog mosipun kon intau mita inta kong kotaímu, naíonda bo ki inaí im manuk mogo'ob ko'i adiínya mita, ta'e mo'ikow in doiíbií.
35 Tuamai taḷaían i Allah im mo'ikow. Simbaí kota'auan monimu, nongkon tana'a makow mo'ikow in diaí bidon moko'ontong ko'i-Nakoí bui, modapot im mo'ikow mosingog nana'a, 'Binarakatan Sia inta namangoi kom bonu in tangoi i Tuhan.'"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA