¹ Petrus ne Yohanis ne in kim kirekam tawa labiꞌinka, ki zep hen Alap mo golak de syal tan zini, zewe de jana nabare zi mo teipsinni, hen Sadukikam de gubirida gwen zini yaing gwezak.
² Zen zep ze jal neizimꞌik, sap zen man tawa labiꞌinka, “Nen tin nikon esa engaya gwer, sap Yesus ki ner hom tin nikon ngaya gweka.”
³ Zao zep hendep balk nosok, ki zep hendep bwinak se nosoink– kaknak de hwena taken-taken gwizimdin hip. Sap dekam man kaweꞌak.
⁴ Hwena men zen zeno nik mo tawa labinni insa esane gwek, dekam beya tangankam Yesussu etan daibliblak. Dekam Yesussu de taibliblan wenya, zi ensa de aitbinkim, san ha lima ribunak mes yap hatak.
⁵ Kaꞌankam zep hwena Yahudi mo teipsin sinodenak dena Yerusalemk etagam gwek. Teipsin sinodenak dena in, zen ahakon Yahudi mo nol-nolkam dena, bong-bongkam dena, hen Musa mo titi tabin olsa de tawa ta gwibin wenya.
⁶ Alap mo golak de syal tan zi mo teipsinni, Hanas Bak, man hen iye zemka tagal gulsuku– Kayafas, Yohanis, hen Aleksander maesa.
⁷ Ki zep hwena Petrus ne Yohanis neka de teisya halzan hap nenbiridak. Zao zep taken-taken nei gwizimꞌik, “Em nara mo bosekam hen nara mo sosonkame zi lekna ansa dawem lala?”
⁸ Petrussu ki zep Alap mo Enhona ing gwe heblaka. Zen zep ding gulzimki, “Ano mae mo teipsin-teipsinni hen bong-bongkam dena,
⁹ zi lekna ansae mo kwasang eblalke, em in zebe namen asa taken-taken eizimꞌin, ‘Em banakane dawem lala?’
¹⁰ Angkam desae ebe mae hap srip gulsuzimꞌin– hendep kitak Israelk de lowe gwen wenya kip: Zen Nazaret walya Kristus Yesus mo sosonkam dawem gwera– mensa ena te-lidak sonnak makan la inkke. Hwena Alap mes Desa tin nikon etan ngaya taka. Zen in zep tangan zini an zeno sosonkam dawem gwera.
¹¹ Yesus Zen Zen– ngirin bol Tenyaye, men kirekam Alap mo olak lwakke, ‘Gol tenya men desa em gol tauk gwen wenya baes eibik, hwena Bian Alap zep desa bolak ik gilki.’
¹² Zen Zebon en onakon esa engaya gwer. Sap Alap hom aha zisi dam tasiꞌira– zeno bosekam de okamanak de zi engaya gwen hap denaye.”
¹³ Kim ze nakek, ki zep ze tame nosok, “Zi darena an totore zi. Zen hom sekola eka.” Hwena zen mae hap denggwanzimꞌik, “Zen udobe naban aisil eꞌara.” Dekam zep ze tame nosok, “O an Yesus mae han zen am apdenak ete gwek.”
¹⁴ Hwena zini in desa dawem laka, deban ze apdekam erzauꞌunka. Zep ding nulzim srem gwek.
¹⁵ Ki zep e nakon de eissili boran hap nenzimk– dekam de ze-en olsa aha-en gun hup.
¹⁶ Ki zep ze zenaka dakensibiridak, “Nen banakan esa zi darena in eizim? Sap tingare Yerusalemk de zini mes zeno nik mo serkam de owas syal gwibinni insa etawa gwendal. Hen nen banakan molye anakan ulsuk, ‘Owasna in hom jowek.’
¹⁷ Hwena dekam de langa san gol haladan srem hap, nen esa jalse eizim: Zen bap zen etan zeno bosekam tawa la gwibin.”
¹⁸ Ki zep etan lilzin hap nenzimk. Zao zep jalse neizimk, “Etan bahem Yesus hup dena lonbirida nasen gwen, hen zeno bosekam bahem tawa la gwibin.”
¹⁹ Hwena Petrus ne Yohanis ne ki zep ding ulzimki, “Emki dam gulsun: San ha dawemna ee asa eno mae mo dwam gwibin sin ang er? San ha Alap mo dwam gwibin sin asa?
²⁰ Sap in desae Yesus hon sane e gwek hen kara landa gwek, ee molye desa lonbirida srem gwe-gwek.”
²¹ Kim ze etan anakan jalse neizimk, “Em de etan kirekam lonbirida naserankam, ki asa emsa karek osol,” ki zep wet oson hap nenzimk. Zen mae hap kirekam nenzimk: Zen hom dam nulsuk, “Kirekam esa karek osol.” Sap tingare zini zeno nik mo owas syal gwibinni in hap man Alap mo bosena teip nulsubluꞌak.
²² Sap zi lekna insa dawem laka, tahunna mes 40kam tamanblak.
²³ Petrus ne Yohanis neka kim tapbla nosok, dekam zep wal bose wal zebon osan dep ola halka. Zao zep lonbiridaka– in desa jalse neizimkye.
²⁴ Zen kim esak, dekam zep apdekam enlala zon tasiblin naban Alapsa anakan nen soneblak, “Bian, Em ano mae mo teipsinni. Nglina, kamana, hen hina Eme yang tabirki, hen tingare kirekam-kirekamna.
²⁵ Orep ano mae mo auyanna Daud, men zen ere mo ola ayang gul gwekake, zebon ere mo Enhona man ing gwe heka, dekam zep anakan ayang gulzimki, ‘Zen ba hap waba hap Alapsa de jal gweblan hap eilman gwe-gwenan, hen zi trana ba hap zereijan hap kalang ne gweblanan?
²⁶ Okamanak de teipsin-teipsin wenya zen olsa aha-en nul gweꞌan, hen mam-mam wenya man etagal gwe-gweꞌan– Bian, Ere han hen ere mo dam tasin Zini in han dikim zieijan hap.’
²⁷ Zen eiwa mes ki kirekam neno mae mo ngirinnik lwak! Sap Herodes ne Pontius Pilatus ne ena awe mes Yahudi srem zi niban hen Yahudi zi niban ola iaha-en ulki– dekam de ere mo dam tasin lalak Zini Yesussu tan hapye.
²⁸ Hwena zen dekam ere mo dwam gwibin sin ki syal neibik– men kirekam ena hamal hap kalang gwe gukuke.
²⁹ Zep Bian, emki enlala gwibin– insa anakan asa nenbiridalke, ‘Ëe asa emsa karek labir– em de zeno bosekam tawa tabinkimye.’ Hwena sosonna E-en esa ki abe mae hap gol gwizimdi– ee dikim ere mo olsa udobe naban tonbirida gwen hapye.
³⁰ Zep Emki ere mo dam tasin lalak Zini Yesus mo bosekam zi sang-sangsa dawem ta gwibin, hen owas-owassa syal gwe-gwibir-zimdin– dekam deka tingan daibliblak.”
³¹ Kim nen sonesiblik, Alap ki zep gola men zao tagal gwek ewak taka. Zere mo Enhona dekam zep ing gwe hebiridaka. Zen dekam zep udobe naban Yesus hup de Alap mo ola donbirida gwek.
³² Tingare Yesussu de taibliblan wenya dekam enlala aha-erekam lowehe gwek, hen enho aha-enkam. Zen hom zere mae mo kire-kirena zere en hap inik neblanda gwek, hwena kitak apdekam bi neblanda gwek.
³³ Dua-blaskam de dam tasibin zinik dekam zep sosonna mam gwizimk– zen dikim anakan gol halada gwen hap, “Yesus mes etan tin nikon ngaya gweka.” Alap mo kwasang-kwasangna dekam kitak zebon mae onak lwa gwizimꞌik.
³⁴ Dekam Yesussu de taibliblan wenya hom mae etahalha gwe-gweꞌak, sap dekam zini zere mae mo kamasa ahaksa gol maesa te-ala hap lirak da gwibiꞌik.
³⁵ Te-alana desa zep dua-blaskam de wenya in hap kap da gwizimzik. Zen desa zep hwena tahalha wenya kip kae neblanda gwizimk.
³⁶ Dekam zep hen lang tekna Siprus kore zini, Yusup, ngasa te-ala hap lirak taka. Te-alana desa zep kitak dua-blaskam de wenya in hap zerzim zika. Zini in Lewi Bak mo ausu nakorena. Dua-blaskam de wenya in man hen desa bose dak Barnabaskam. Bosena in mo enlalana, “Zi mo enlalasa de tatete ta gwizimdin hip de zi.”
³⁷ (4:36)