¹ Kaesareak, jana nabare zi mo mamna ki gweꞌanka– bosena Kornelius Bak. Zeno irik gin walasna seratus enkam. Zen jana nabare zini mensa nen gwibik “Langna Italia korena,” zewe kitak biti gwek.
² Zen we wal walas zeban Alapsa dawemkam zibetek gweblaka. Zini in hen tahalha zisi man mas gwibirida gweka, hen Alapsa man gu sonebla tine gweka.
³ Hwena aha yaklakam, yakla nwena dan-ahan, ki zep nwena lirisin neblak. Zen eiwa de makan Alap mo dam taha nakore zisi hla ta guku. “Kornelius”kum ze gublu zaka.
⁴ Airin niban zep karatda taka, dekam zep takensiblika, “Bian, em ba hap?” Ki zep ding gulbluka, “Eno ol gu sone gwenna hen tahalha zisi de mas gwibirida gwenna mes Alap hon nwe-mase gwek– san de em de zebe hap sapisa tru tase gweblanna.
⁵ Dekam zini Yope san dep lup gul sone, zini bosena Simon, hen zeno aha bosena Petrus, desa deka kwang da halzak.
⁶ Zen hi alpnak tweran sop sam tasik gwibin zini Simon mo golak gweꞌara.”
⁷ Alap mo dam taha nakore zini in kim hli taka, dekam zep zere hon de babu gwen zi darena guzimki, hen zere mo jana nabare zini, dawemkam de Alapsa tame tan naka gubluka– zen de yaing gwezan hap.
⁸ Zao zep aisil gwibiridaꞌanka– in zen ki zere hon lwakye. Ki zep hendep Yope san dep lup gul soneka.
⁹ Zen kim Yopek egolek de gweꞌak, Petrus dekam zep gol bol tahannak sewe seka– dekon de Alapsa gu soneblan hap.
¹⁰ Ki zep ze hwena usak gweꞌanka, dekam zep tembanesa de syal gwibir-blin hap abe gweka. Zen kim tembanena syal neibir-bliꞌak, ki zep hwena nwena lirisin neblak.
¹¹ Ki zep hwena ngli san kara gwe seka. Man dalusuhuk. Desan zep hwena deyol ber-ber yawal makare naka sring nil soneꞌanhak. Top-topna man nurensihik. Ngirin en nik zep sring gwe hezak.
¹² Deyol mwana iwe zep hlauludaka– kirekam-kirekam golsriwen otweranna, tana dan-ner dan-nerkam dena, bik dankam de il gwehal gwenkam dena, hen mawana.
¹³ Ki zep hen ngatan zi mo lang nakore ola sal seka, “Petrus, em luwen. Emki tameran. Desa twenblanda.”
¹⁴ Ki zep ding gulku, “Bian! Ëe bejene. Ëe home mae golsriwen kire-kire kun nabarena twinbik.”
¹⁵ Dekam zep hwena etan ola sal seka, “Mensa Bian ngan tasibirki, desa bahem gubin, ‘Kun naban.’”
¹⁶ Zen mes dan-ahan soka– kirekam de hlaul gwenna. Ki zep etan mumuk ennak ngli nakon nul inehak.
¹⁷ Petrus kim nama dam gulsun hup teibiꞌinka, hwena Kornelius mo zi lup gul sonenna in hap mes Simon mo gola tan-tan dazimk, hendep gol teso kininnak
¹⁸ zep etakensizik, “Awe wehe Simonkam de zi bosena gweꞌara? Zeno aha bosena Petrus.”
¹⁹ Petrus kim nama dam gulsun hup teibiꞌinka, Alap mo Enhona ki zep gubluka, “Simon Bak, zi dan-aharena man emsa deblaꞌan.
²⁰ Em ati gwen. Bahem ang gwibiridan hap enlalana anakare hap beya gwen, ‘Ëe an Yahudi wal. Zen Yahudi zisi hom.’ Sap zini in ano lup gul sonenna.”
²¹ Dekam zep ati gwe zaka, zao zep gubiridaka, “Ëe an zen– em in desa leblaꞌanye. Em ba habe yaing gwezal?”
²² Ki zep ding nulblik, “Jana nabare zi mo mamna, Kornelius Bak, emsa de kwang tahan hap asa ir gubiridaka. Zen enho lalakna hen Alapsa de betek gweblanna, hen Yahudi zini man desa blikip neisik gweblanan. Alap mo dam taha nakore zini mes desa emsa de kwang tahan hap gubluka– zen dikim ebon onakore olsa sane gwen hap.”
²³ Petrus ki zep zao de apdekam goletruwen hap gubiridaka. Kaꞌankam ki zep Petrus golesek gweka. Yope kon Yesussu de taibliblan zini man hen ang neblak.
²⁴ Zeno kaꞌan kim Kaesareak yaing gwek, Kornelius man iye zeban golekara gweꞌanka– hen wal bose wal zeban, men desa tagal gulsukuke.
²⁵ Petrus kim gola iwe tiꞌin zaka, Kornelius ki zep zeno nwenak mae hap ik gwehe zaka, “Zini an Alap mo dam taha nakore zi makarena.”
²⁶ Hwena Petrus ki zep gubluka, “Em luwen. Ëe an hen zi tangan sake.”
²⁷ Ola kim lonꞌanka, Petrus ki zep gol mwa san tilki, ki zep ze hlauludaꞌan zaka, “Zi beyam-byana mes ze etagal gwesik.”
²⁸ Ki zep ze gubiridaka, “Em mese kitak etawa gwek: Yahudi zi mo ol jalse gwennak man ale nuk, ‘Yahudi srem zi niban bejen golesiri gwen.’ Hwena Alap mes ap anakan goltreblaka, ‘Ëe babe aha zi aususa gubiridan, “Zen in kun naban.”’
²⁹ In kim asa kwang dak, ee zebe takensibiridan sremkam ang gwibiridazak. Zep ee ama ki emsa takensibiridaꞌan: Em ba habe asa en soneblak?”
³⁰ Kornelius zen zep ding gulbluka, “Yaklana an zen dan-ahan damank, yakla nwena an ki angkam dan-ahannak lwaꞌarake, ee dekam gola an kon Alapsa gu soneblaꞌak. Mumuk ennak zep zini ano nwenak baju angtan-angtan naban zauꞌun zaka,
³¹ ki zep asa gubluka, ‘Kornelius, Alap mes eno ol gu sonenna salka, hen man eno tahalha zisi de mas gwibirida gwenna enlala gwibiꞌira.
³² Emki Yopek Simonsa gu soneblan. Zeno aha bosena hen Petrus. Zen hi alpnak tweran sop sam tasik gwibin zini Simon mo golak gweꞌara.’
³³ In zebe nabakam zini emsa de kwang tan hap lup gul sonek, hen ema asa sam tanda– hata zankamye. Angkam ee mese awe Alap mo nwenak tagam gwenan– dekam de emsa sane tan hap, kitak mensa Bian Alap ebe hap golblakake, desa de asa tonbiridan hap.”
³⁴ Petrus ki zep gubiridaka, “Ëe angkame tame gulun: Eiwa, Alap ahakore en naka hom nwekam goleake gwenda,
³⁵ hwena tingare zi ausuna man dokwak guluda gwenda– men zen Zenaka betek ne gweblanan hen dawemna syal nei gwibirinye.
³⁶ Em mese esal gwek– Alap mensa ol dawemna Israelk de zini anakan gu sonebiridaka, ‘Tingare zi ausu mo Teipsinni Kristus Yesus mo bosekam em aban zerumlae gwen.’
³⁷ Hen em mese esal gwek– in zen baptis ta gwibin zini Yohanis Swe mo hyanak tingare Yahudi mo langnak jowek, nonol tanganna Galileak.
³⁸ Alap dekam Nazaret walya Yesus hup zere mo Enhona hle ta soneblaka, hen soson zemka golblaka. Hen em mese zebe hap dena anakan esal gwek, ‘Zen men-san an-sankam dawemna golzimnira gweka, hen dowal mo kigi mo hulen naka hil ti sonebirida gweka, sap Alap man deban zersyal gwe-gweka.’
³⁹ Ëe an zene kara la gwek– tingan mensa Yahudi mo langnak hen Yerusalemk syal gwe-gwibirkiye. Hwena Yahudi zini Desa te-lidak sonnak de makan ta irinkim dak.
⁴⁰ Hwena yaklana dan-ahan, ki zep etan Alap tin nikon ngaya taka, hen dekam zep etan abe mae hap zertrei gwizimki.
⁴¹ Ëe ama deban etan tin hyanak ertembane gwe-gwek. Dekam Alap tingare zi hip hom zertrei gwizimki. Hwena men desa en Zena Yesus hup denaka de gol halada gwen hap dam tasibirkike, zebe mae en hap zertrei gwizimki.
⁴² Yesus mes asa dam tasibirki– zere hap de ol dawemsa dikim anakan tonbirida gwen hap, ‘Alap mes Yesussu dam tasiki– Zen de zisi klis gun hup, men zen nama lowe heꞌan, hen men zen ejuwekke.’
⁴³ Tingare Alap mo ol ayang gul gwen zini hen kirekam eton gwek, ‘Tingan men zen Alap mo zer sonen Zini insa anakan daibliblaꞌak, “Zen eiwa Zen– asa de ngaya tan hap de Zi niye,” ki Zen sa hen zeno mae mo karek-karekna tap gulsuzimdi.’”
⁴⁴ Petrus kim nama kirekam tonbirdaꞌanka, Alap mo Enhona ki zep ing gwe hebirida zaka– tingare zini men zen esane gweꞌakye.
⁴⁵ In zen Yope kon Petrus hon ang tazak, zen Yahudi hon de biti gwenna. Petrus dekam zep deban mae goletenggwanka, “Hare eiwa, Yahudi srem zinik Alap mo Enhona hen ing gwe henkamke– men kirekam hen nebon mae ing gwe hekaye!”
⁴⁶ Sap zen man owas olkam de Alap mo bosesa teip gulsublunnak sane dabiꞌik– zere mae mo tame gun srem olkam de tonbinnik. Petrus dekam zep guku,
⁴⁷ “Angkam ba en zebe mae hap lwa kiniꞌan? – zini ansa de baptis tabin hipye. Zen dwan mes-am Alap mo Enhona neir innin– men ki hen nena.”
⁴⁸ Ki zep gubiridaka, “Ëe asa emsa Bian Kristus Yesus mo bosekam baptis labir.” Ki zep hwena Petrussu abe dak– zao de golegwe inendan hap.