¹ Zao kim lwa seꞌak, Yesus ki zep etan abon mae Ho Gutuna Galileak jowe zaka. Ho gutuna in mo aha bosena Tiberias. A kirekam mo ze lwakye:
² Zao kim lwa seꞌak, ee Yesus hon de ang ta gwen wenya tuju enkame lowe heꞌak– anaka-en: Petrus, Tomas– mensa nen gweblanan “dan de we son walas”kam, hen Galilea mo ena Kana walya Natanael, hen Zebedeus Bak mo walas darena, hen ahana dan-dan– Yesus hon de ang e gwen wenyaye.
³ Petrus ki zep asa gubiridaka, “Ëe hogwe tahyon habe song gweꞌan.” Ki zebe ding ulblik, “Ëe asa ang tal.” Ki zebe bulkum sek gwek. Hwena kam blale sap jalana ho gutuna iwe os ul tinek. Hwena hogwena hom mae tehek.
⁴ Kim hleng gwek, Yesus dekam zep ho gutu alpnak zauꞌunka, hwena ee home anakan tame lak, “Wakin Yesus.”
⁵ Zen zep asa gubiridaka, “Wal sei-siwir, em wehe hogwena lahyol?” Ki zebe ding ulblik, “Ëe home.”
⁶ Ki zep asa gubiridaka, “Dam taha san de bul alp san emki os gun. Dekam esa lahyol.” Ki zebe desan os uk, hwena dekon zep hogwena beya enkam biti gwek. Etan gul inenna ama sap akabik.
⁷ Mensa Yesus kwasang gwe-gweblaka, zen zep Petrussu gubluka, “Wakin Bian!” Kirekam kim salblaka, ki zep tahan baju zemka ala soka. Ki zep honak heya gwe ineka.
⁸ Ëe ahakore wenya sangankam zebe bulkum alp san dep ertro kinik– hogwe beyam-bya nabare jalana insa de bail song gwen naban, sap ee home dekam alp nakon elanga gwe haꞌak. San ha 100 meter enkam mes yap.
⁹ Kime atiti gweꞌak, ki zebe ze hogwe auhlu gun berya akek. Syauk debala man ze auk gweꞌanka. Hogwe naban roti naban zewe nola ineꞌak.
¹⁰ Yesus ki zep asa gubiridaka, “Hogwena insa lahyol emki da-en teisya halzan.”
¹¹ Petrus dekam zep buluk sewe seka, ki zep jalana insa alp san dep il gilhal zaka. Hogwena yawal-yawal en nik ze biti gwek, beyana 153 enkam. Sap man ki ze beyakam biti gwek, hwena owas hap jalana in kalk ne srem gwek.
¹² Yesus ki zep asa gubiridaka, “Haen, nen tembane tan.” Ëe hwena ama anakan de takensiblin hap baes tak, “Bian, em nara?” Sap ee mese tame lak, “An Bian sake.”
¹³ Ki zep Yesus asa golek de tabir zika, hen rotina insa ap kae gwibir-zimki– hogwe taiblinni in han.
¹⁴ Zep ho gutu alpnak iwe, zen dan-ahanna kim zere hon de ang ta gwen wenya abe mae hap Zenaka zertreizimkike– tin nikon de ngaya gwen hyanak.
¹⁵ Kim tembane tasik, Yesus ki zep Simon, aha bosena Petrussu, takensiblika, “Yohanis Bak mo tanena Simon, em san eiwa dawemkam Asa enna lwa gweblaꞌara? – wal bose wal om onakonye.” Ki zep ding gulbluka, “In kirekam, Bian, Ena tawana: Ëe ama Emsa enna lwa gweblanan.” Yesus ki zep hwena ding gulbluka, “Ki amki ano domba zahosa kara ta gwibir.”
¹⁶ Hom holo gweꞌak, etan ki zep takensiblika, “Yohanis Bak mo tanena Simon, em san eiwa Asa enna lwa gweblaꞌara?” Ki zep etan ding gulbluka, “In kirekam, Bian, Ena tawana: Ëe ama Emsa enna lwa gweblanan.” Ki zep hwena ding gulbluka, “Ki amki ano domba zahosa kara ta gwibir.”
¹⁷ Etan ki zep dan-ahanna takensiblika, “Yohanis Bak mo tanena Simon, em san ema Asa enna lwa gweblaꞌara?” Dan-ahanna in kim kirekam takensiblika, enlalana dekam zep dowebla hanaka. Dekam zep ding gulbluka, “Bian, Ena kitak tawana. Ena tawana: Ëe ama Emsa enna lwa gweblaꞌan.” Ki zep hwena ding gulbluka, “Ki amki ano domba zahosa kara ta gwibir.
¹⁸ Eiwa tangan nakae emsa gubluꞌan: Em kime nama seiwirik gweka, em ene pakeanna ala so gweka, hen men desan dep ena enlala gwe-gweka, em ene desan song gwe-gweka. Hwena bogolak, em ere mo tahana esa in sosulu, hen eno tahana sa nahaler, hendep ere mo dwam gwibin srem san dep sa emsa nerhal.”
¹⁹ Yesus mo kirekam de gublunna in, Zen anakan kim goltreblaka, “Em kirekam esa Alap mo bosesa dikim teip gulsublun hap tili.” Yesus ki zep etan gubluka, “Asa em zertron.”
²⁰ Petrus kim lero gweka, ki zep wal bose zemka hwena hla taka– mensa Yesus Zena kwasang gwe-gweblakake. Zini in men zen aumwa hap de tembane tannak Yesus zere mo golek denakon nikinꞌinkake, hen in zen anakan takensiblika, “Bian, nara sa emsa kirekam zergulu?”
²¹ Petrus ki zep Yesussu takensiblika, “Bian, zini an zen neno nik mo alp nakon nikinꞌira, zebe hap dena banakan sa lwal?”
²² Ki zep ding gulbluka, “Em ba hap de zebe hap dena tawa gwen hap? Ëye desa dwam gweblaꞌanam, ngaya naka de etan jap tazan hap, zen san eno syal? – kire hap denaye. Em diki Asa em zertron.”
²³ Dekam zep Kristen zinik ola anakan nol halasenk, “Zini zen na-en molya tilki– Yesus de lwa halzan sremnakye.” Hwena Yesus anakan hom guku, “Ëe ama desa kirekam dwam gweblaꞌan.” Zen diki man gubluka, “Ëye desa dwam gweblaꞌanam, ngaya naka de etan jap tazan hap, zen san eno syal? – kire hap denaye.”
²⁴ Ëe an zen– mensa Yesus kirekam gubluka. Zen in zebe ebe mae hap bukuna ansa ale gulzimk. Ano ola an eiwa tangaranna, hen men zen aban mae lowehe gwenan, zen hen man ano ola ansa eiwa nul gwenan.
²⁵ Yesus mo syala nama beya tangankam lwa kiniꞌan– ano ale gun sremkam. Zeno syalsa de aha-en aha-enkam ale gunkum, dekam bukuna maka serkam ebeya gweꞌan. Okamana an molya sowehek– bukuna insa de ze kang ta gwen hapye.