¹ Yesus ki zep ola gulk sun ap blaonzimki, “Eiwa denakae emsa gubiridaꞌan: Zini men zen domba zaho hap de kandangnak lilikin srem san til zinna– zen sowe zi, ahaksa zere mo asaskam de alal gun hup de zi.
² Hwena lilikin sin de tilzin zini, zen zaho ta gwibin hip de zini zen.
³ Lilikinsi de kara son hap de zini sa zaho ta gwibin zini in hap talusublula. Zere mo domba zahona hen zeno ola man tame nul gwenan. Zeno mae mo bosem-sena kim gubirida gwenda, dekam zep wet noso gweblanan.
⁴ Zere en mo dena kim golewet so gwenda, zena dekam zep ngeirbirida gwenda. Zere mo domba zahona man ang ne gweblanan, sap zeno ola anakan de tame gulblunkam, ‘An zen ano mae mo bi naye.’
⁵ Aha zisi molya ang neblak. Zen sa hwena heya neblal, sap zeno ola hom tame nulbliꞌan.”
⁶ Yesus kim kirekam ola gulk sun blaonzimki, ee hen home dam ulsuk.
⁷ Ki zep etan ap srip gulsuzimki, “Eiwa denakae emsa gubiridaꞌan: Ëe an domba zaho hap de lilikinni Zen.
⁸ Nonol men zen anakare ola ban yaing gwe-gwezak, ‘Ëe an emsa de zaho ta gwibin hip de zi,’ zen hwena sowe zi hen zere mo asaskam de alal gun hup de zi. Hwena domba zahona hom kire zisi nasalbirida gwek.
⁹ Diki Ëe an Zen tangan aha-en– lilikin niye. Men nara Abon osan til zinna, zen zen sa engaya gwer. Ëe asa zebe mae hap golzim– zen dikim aha-ere enlalakam tembane hap ehakal gwen hap denaye, banakare tesen lwa jal-jal srem san.
¹⁰ Sowe zini zen mae hap yaing gwe-gwenanzal: Ësowe gwe-gwen hap, tamera gwen hap, hen timbwas gul gwen en hap. Hwena Ëe ngaya tabin hibe hatazak. Ano domba zahona zen dekam tangan sa tahalha sremkam lowehe gwer.”
¹¹ “Ëe an domba zaho ta gwibin hip de Zi tangan. Ëe zep asa ere mo angna ere mo dombasa dikim ngaya tabin hip sosok tazim.
¹² Hwena men zen te-ala en hap zaho da gwibirin, zen zaho ta gwibin hip de zi tangansa hom, hen hom tangan bi neibiridaꞌan. Tesen lwa jal-jalsa de hla ta gunkum, zen sa heya-hya gwenkam dombana insa hli nulida gwer. Tesen lwana in ahanaka sa hit tisili, hen ahakon dekam sa men-san an-sankam eheya-hya gwer.
¹³ Te-ala en hap de zaho ta gwibin zini, zen kirekam neibirida gwenan, sap zen hom kwasang neibirida gwenan.
¹⁴ “Ëe an domba zaho ta gwibin hip de Zi tangan. Ëe zep asa ere mo angna sosok tazim– ere mo domba zahosa dikim ngaya tabin hipye. Men kirekam ere mo Bian Asa tame taka, Ëe hen kirekame ere mo domba zahona tame ta gwibirin. Hen men kirekame Biansa tame tak, ere mo domba zahona hen kirekam Asa tame da gwenan.
¹⁵ (10:14)
¹⁶ Ano aha domba zahona hen ki– men zen Israel mo langnak awe lowehe srem gwe-gwenanye. Ëe asa desa hen kwang guludal. Zen sa hen Asa nasalbla halzal. Hendep aumwa hap denak aha-erenak asa ere mo zaho naban golelowehe gwer.
¹⁷ Ëre mo Bianna mae hap Asa kwasang gwe-gweblanda: Sap Ëe mese ere mo angsa de sosok tazimdin hip hohle gwek, hwena hyanak asa etan ngaya gwer.
¹⁸ Ëe de Aen gun sremkam, ‘Diki Ëe tin,’ dekam bejen Asa tan. Abe hap mes ere mo Bian sosonna golblaka– dekam de ere mo angsa gublun hap, ‘Angkam dekam timni hli yul. Angkam dekam etan gul ine.’ Ëe zebe ere mo angna ere mo dwam gwibin sin sosok tazimꞌin.”
¹⁹ Yesus insa kirekam gubiridaka, Yahudi zini in dekam zep eol tetek gwek.
²⁰ Zen ahakon man eguk, “Zini in dowal mes bi gweblaka hen mamakna. Ba hap de desa salblan hap?”
²¹ Hwena ahakon man eguk, “Dowala bare zini hom am kirekam de ola don gwibirin! San ha dowala bare zini ki zi nwe diminni dawem da gwibirin?”
²² Aha yaklakam Yesus Alap mo gol teksonnak te nasen gweꞌanka. Teksonna in man bose nuk, “Salomo Bak mo Dena.” Dekam bot-bot tamlenak, hen ee Yahudi zini dekam mese Yerusalemk delapan-enkam de yakla yalak dep tagal gwek. Yakla yawal-yawala in mae hap: Alap mo gola kim orep sam nulsukke– desa dikim enlala gwibin hip.
²³ (10:22)
²⁴ Zao zep Yahudi mo mam-mamna tagal neblazak, ki zep ze dakensiblik, “Em bawalkam esa asa dam-dam enkam ding gulzimdi? Emki eiwa de tangan naka asa gubiridan: Em an san ha Zen tangan? – Alap mo zer sonen Zini, Israelsa de ngaya tabin hip Denaye. San ha em hom?”
²⁵ Ki zep ding gulzimki, “Ëe mese sap emsa gubirida gwek, hwena em home Asa laibli gweblak. Owas-owasna mensae ere mo Bian mo bosekam syal gwe-gwibirin, zen dekon emaka anakan Asa tame laꞌan, ‘An Zen tangan.’
²⁶ Em hwena molye Asa laibliblak, sap em ano domba zahosa hom.
²⁷ Ëre mo domba zahona zen man Asa nasal gweblanan. Ëe hen ama kitak tame ta gwibirin. Zen ki Asa ang ne gweblanan.
²⁸ Ëe ama zebe mae hap hendep denaban dikim lowehe gwen hap denaka gol gwizimꞌin– zen dikim hendep denaban juwe srem gwen hap. Toton nara molya ano taha nakon alal gulku.
²⁹ Ano Bian mo sosonna man taman kiniꞌan– in zen domba zahona insa Tane zem abe hap kap gulblukaye. Desa toton nara dep? – ano nik mo taha nakon de alal gun nuye.
³⁰ Ëe an Zen– Bian han de zeraha-en gwen Zi niye.”
³¹ Ki zep mam-mam wenya in kasona lop da ineꞌak– dekam de i tiblan hap.
³² Ki zep hwena Yesus gubiridaka, “Ëe mese eno mae mo nwenak owas-owasna beya gulzimk– men kirekam de syal gwe-gwibin hip Bian abe hap golblakaye. San ha ano aha owas nakone Asa husus eblaꞌan? – in zebe Asa kasokam de i tiblan hap dwam eblaꞌanye.”
³³ Ki zep ding nulblik, “Ëe eno owas-owas nakon home kasokam emsa i liblaꞌan. Hwena ere mo Alapsa de lamang tan nakone emsa i liblaꞌan. Em in totore zi tangan, hwena ere mo gunkum em ema enaka gublula, ‘Ëe an Alap.’”
³⁴ Ki zep ding gulzimki, “Alap mo epba olak, zao man-am emsa gubiridaka, ‘Em in kitak ere mo wei-wik gun walas.’
³⁵ Men kirekam Alap mo olak lwak, zen hendep kirekam sa eiwa lwal. Dekam men zebe mae hap Alap mo ola in hatazimzik, desa Alap man gubiridaka ‘are mo wei-wik gun walas’kam.
³⁶ Zep ba hap de Asa waba hap jal gweblan hap? – sap Ëe ama sapꞌnen enaka gublunan, ‘Ëe an Alap mo Tane.’ Sap Asa eiwa Bian Zen ki dam tasiki hen zer soneka.
³⁷ Ano syal de ere mo Bian mo syala ban apde nen sremkam, ki bahem Asa taibliblan.
³⁸ Hwena Ëe de ere mo Bian mo kim syal gwe-gwenkam, ki ano syala insa emki anakan taiblibin, ‘Owas-owasna an eiwa Alap onakorena.’ Asa de taibliblan sremkam, hwena owas-owas in ensa emki kirekam taiblibin. Dekam esa hendep anakan etawa gwer, ‘Bian eiwa Desa zergwe gwenda, hen Zen eiwa Bian han de zeraha-en gwen Zi.’”
³⁹ Dekam zep sap balk tan hap alp dasik, hwena Yesus man zebon mae onakon aya gwe ine halka.
⁴⁰ Yesus ki zep weyana Yordan mo men eihya san dep asa golelwanda halka– men zewe Yohanis Bak menkam baptis ta gwibi'inkake. Zao zep asa golelowehe gweka.
⁴¹ Dekam zini beya nik zep Zebon onak dep yaing gwe-gwezak. Zen dekam zep egu gweꞌak, “Yohanis Bak sap hom owas-owasna syal gwe-gwibirki, hwena kitak mensa hamal hap zini an hap dena ayang gul gwizimki, angkam an zep ki eiwa kirekam lwaꞌan.”
⁴² Zen zao zep beya tangankam Yesussu anakan daibliblak, “An eiwa Zen tangan– nesa de ngaya tabin hip de Zi niye.”