Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Melkisedeg gin, kaba, en edag leng se cinogo Salem meren mougt mera medam. Dara en edag Adehsud Gedig En Moho Eb Taiba Augwan men Gembala Gesa Taij Moho Agas touohob. Dangga hang, sug Abraham en ecicugb dau sug en aiyan mougt mera medam merug hogu an meren lusud laugwanohob, kaba, Melkisedeg agaseni. Hanoba en ocuncum dou Allah aga en, dauntoba Allah eic geigouhw dou en.
2 Dauwohob, kaba, Abraham ekeba hom dau ara sisa dau areg en ogod mougt mera medam an graga ingma dou Melkisedeg en toua. (Melkisedeg men meijouhw dag mougt mera medam gedag beim namcir. Dara sug en edag leng Salem meren mougt mera medam dag gini touohob, kaba, len leija en moho toua dag mougt mera medam gedig en eic gesgigouhwesa dou lusud dougwo areg gecgu augwan toua namcir. Anai moho Salem gin, kaba, men meijouhw dangga.)
3 Dara Melkisedeg gin, kaba, Surad Injil Meb emens dau en mena, dara en mem, dara en meijemouwer, dara sug mem ouwadan en, era sug en omom dou maman touwero. Dangga se aremer augwan gin, kaba, en mog aninim dag Allah Meisi Yesus gini touohob. Hang en emarges dau sug en edag gembala gesa taij ginero. Doba en eicara baimo dag gini beb huhugb namcir. Aninim dag Yesus emarges dau sug en edag gembala gesa taij gin touwero. Doba en eicara baimo dag gin toua beb huhugb terimda. Anai Allah enin eng eigdoumesa Melkisedeg en moho naugb ginohob.
4 Yen youman areg graga augwan deigeigouhw namcirahabi. Anai Abraham, kaba, en edag maman mamjemouwa mebin. Hang en moho agas medam namcirohob. Doba sug en agasa Melkisedeg gini, hanoba en ekeba hom dau ara sisa dau areg en ogod mougt mera medam merug hogu anohob dou en toua, kaba, gini ens ainyes dou maman dag Melkisedeg en moho agas medam edreg dau Abraham en moho touohob.
5 Dangga toua, Musa men gomnomna ogod an Lewi medebeitor gedig len ledag gembala gesa taij, kaba, dag len lacgeij hom dau ara sisa areg leng Israel lesma dau len toua. Doba areg len lacgeij gin, kaba, len lemacgeij dau leng lugmahara touwero. Doba len lacgeij dau len meraguner dara len merdamouwer leng Israel lenin gedig len ledag Abraham medebeitor len touohob.
6 Doba Melkisedeg gin, kaba, en emedag gembala gesa taij dau Lewi medebeitor ginero. Doba inggaida, sug en agasa dara Abraham sug nosa, kaba, Abraham en ekeba hom dau ara sisa dau areg en ogod mougt mera mera medam merug hogu anohob dou Melkisedeg toua. Sug Abraham eic hom dau ara sisa augwan dou Melkisedeg dauwohob, kaba, Melkisedeg en ocuncum aga Abraham dou Allah. Dauntoba Allah eic geigouhw dou en toua. Doba Abraham en, kaba, Allah eigdoumesa en moho agas touohob. Anai areg Allah esedeb naugb en eic geigouhw dou lusud se cinogo augwan, kaba, en eng Allah os gin augwan dou en dous.
7 Dangga hang, augwan gin, kaba, ens ainyes dou maman dag Melkisedeg en moho agas edreg dau Abraham en moho toua namcirohob. Anai sud hom areg en acgeij Allah naugb en eic geigouhw dou sud hom, kaba, en eng moho agas edreg dau sud hom areg en acgeij Allah naugb en eic geigouhw dou en touohob. Hang sud hom ingma dau yen, kaba, en emenara ucucugb an gin touwero.
8 Dara gembala gesa taij gedig len lacgeij meraguner dara meragtor leng Israel naugb len leic hom dau ara sisa dou len sug nosa, kaba, len laugwan ledag lusud gedig len lomom dous. Doba eisaugb Melkisedeg gedig lusud leic hom dau ara sisa dou en gin, kaba, Surad Injil Meb Mohon ouma debin en dag en emomom touwero, doba en eis huhugb namcir.
9 Dangga hang, sug Abraham ekeba hom dau ara sisa dou Melkisedeg sug nosa, kaba, maman manara dag Abraham medebeito Lewi enin ekeba hom dau ara sisa dou Melkisedeg. Aninim dag Lewi medebeitor len lacgeij hom dau ara sisa dau leng Israel sug nosa touohob.
10 Anai sug Melkisedeg agasa dara Lewi meijemouwa Abraham sug nosa gin, kaba, Lewi mem emouwadan en touebma. Doba maman manara dag en eb se Abraham en maga ginaba. Hang gini aninim dag en eic hom dau ara sisa ogdoc Abraham dou Melkisedeg gin touohob.
11 Doba sug Allah eigdoumesa Lewi medebeitor len ledag gembala gesa taij naugb leng Israel dag ginohob, kaba, dagiro, naugwe hang, en eigdoumesa gembala gesa taij susugb dau len naugb maman deita? Anai sug en eigdoumesa Lewi medebeitor len meroho dag gin, kaba, en eic men gomnomna ogdoc Musa debin gin dou leng Israel len laugwan toua. Dangga sug Lewi medebeitor len laimo Musa men gomnomna augwan bedeinyum an lenohob, kaba, Allah eigdoumesa gembala gesa taij menau dou maman toua deitei? Naro, en emeigdoumesa gembala gesa taij menau dou maman deitero. Dobnaro. Lewi medebeitor gin, kaba, len ledreg dau Musa men gomnomna gin terimdohob. Hang Allah emeigdoumesa gembala gesa taij menau naugb maman deit. Dara gembala menau gin, kaba, men geicara emedag Harun medebeitor meren geicara gin touwero. Doba men geicara augwan, kaba, esogwa deisa Melkisedeg men geicara an maman dous.
12 Sug Allah eigdoumesa gembala gesa taij menau hom naugb maman dag ginohob, kaba, Musa men gomnomna mohon emeb naugb en toua deitero. Anai sug gembala gesa taij menau agunyen, kaba, esloulougb dag gomnomna menau agunya oucan en naugb en aimo an maman toua.
13 Dara maman Adehsud gin, kaba, en emedag gembala gesa taij dau Lewi medebeitor dousero. Doba eni dau meijouhuda gus toua. Anai areg Surad Injil Meb Mohon enara eisaugb gembala gesa taij menau gini, kaba, en enara eisaugb maman Adehsud en gin dous. Dara dau men meijouhuda gin, kaba, sud hom ingma en emedag gembala gesa taij mougwa hom touebma.
14 Anai maman maugwan macinaga dag maman Adehsud gin, kaba, eni dau meijouhuda Yehuda. Hang Musa en toua sug en enara eisaugb gembala gesa taij dou leng Israel sug nosa, kaba, en emenara eisaugb Yehuda medebeitor hom dou len touwero. Doba en enara eisaugb Lewi medebeitor dou len dous.
15 Doba sug maman Adehsud en agunyen debin maman dag gembala gesa taij menau dag ginohob, kaba, gini ens ainyes dou maman dag gembala gesa taij mohon an meren geicara, kaba, augwan obsara namcirohob. Anai maman Adehsud gin, kaba, en emedag Lewi medebeitor ginero. Doba en mog toua aninim dag Melkisedeg teiteiyohob.
16 Dangga sug Allah eigdoumesa en moho dag gembala gesa taij naugb maman, kaba, en emaimo Musa men gomnomna eisaugb meijouhuda dara gousanara an en touwero. Doba sug maireseb menau geb huhugb eb se en dag gin namcirohob, kaba, en edag gembala gesa taij, aimo men goubesa gini an maman beb huhugb terimda toua. Anai maireseb menau gin, kaba, emouwedoc touwero, doba eb huhugb namcir.
17 Augwan gini esogwa deisa areg Allah os dou maman Adehsud gin se Surad Injil Meb Mohon deb sug nosa touohob, endagai: Dan deigdoumesa ban aboho dag gembala gesa taij beb huhugb terimda. Dara aban geicara augwan, kaba, esogwa deisa gembala gesa taij, moho Melkisedeg, men geicara augwan toua namcir.
18 Sug Allah eigdoumesa gembala gesa taij menau naugb maman dag ginohob, kaba, Musa men gomnomna mohon emeb naugb maman toua deitero. Doba Allah oguc dougwo gin augwan dau mamanohob. Anai gomnomna mohon gin, kaba, emebehnehino maman dougwo sesarero. Hang emedeinyum naugb sug maman mamera mera geigouhw, dara emahwan maman aud usi naugb sug Allah eic gesgigouhwesa dou maman touwero. Sug Musa men gomnomna men goubesa emedeinyum naugb areg graga augwanero, kaba, Allah eic men gos dou menau dou maman deit. Anai gomnomna mohon gin, kaba, emeic dag maman mamod mamina Allah an ara ara touwero. Doba men gos dou menau gin, kaba, eic dag maman maod mamina debsa en an ara ara terimda. Hang gini edeinyum naugb sug ahwan maman aud Allah toua.
19 (7:18)
20 Dara Allah men gos dou menau gin, kaba, emousa maman naugb maman maod mamina debsa en an ara ara dousero. Doba Allah ouwara debin men gos dou menau gin dou maman touohob. Anai sug en eigdoumesa Lewi medebeitor len ledag gembala gesa taij naugb maman mamjemouwer sug nosa, kaba, en emou enin moho debin dou lenero.
21 Doba sug en eigdoumesa Yesus dag gembala gesa taij naugb mamanohob, kaba, en ou enin moho debin en an gin toua. Hanoba en erba Ugwaremer deb se Surad Injil Meb Mohon deb an gin sug nosa touohob, endagai: Dang Adehsud demeigdoumesa ban aboho dag gembala gesa taij beb huhugb namcir. Dara dan demeperwei dan indoc mes an gin touwero. Doba dan daimo augwan gin an ban terimda. Anai dan dou dan indoho debin gin touohob.
22 Dangga sug Allah ou enin moho debin Yesus dag ginohob, kaba, maman macinaga dag Allah men gos dou menau gin, kaba, emediyebeiya dau maman touwero. Doba Yesus aimo augwan gini an maman toua terimda. Hang gos dou menau gin, kaba, eigouhw edreg dau gomnomna mohon augwan toua namcir.
23 Dara aremer hom susugb deit toua, kaba, dag gini: Lewi medebeitor gin, kaba, leinyana gougwa ledag gembala gesa taij naugb maman mamjemouwer touohob. Anai len lemaimo meren geicara gin bemeb huhugwero, doba len lomom dauwohob. Hang len lemeperweiyim ucucugb terimda toua.
24 Doba Yesus, kaba, en emomomero, doba en eis huhugb terimda. Dangga hang, sud hom ingma, kaba, en emeperwei en mohw dag gembala gesa taij naugb maman toua deitero. Doba en edag gembala gesa taij beb huhugb an maman namcir.
25 Sug en omom deit dag ginero, kaba, men goubesa edeinyum namcir naugb en eigdoc gareg en edebeij Allah ogdoc en len laugwan dau sesar men gogom augwan aud maireseb menau geb huhugb gin toua. Anai sug en maireseb huhugb dag gin, kaba, en einoisa maman an maman aremer augwan deseino Allah beb huhugb toua namcir.
26 Dangga se aremer augwan, kaba, en edag gembala gesa taij moho agas bedeinyum naugb mamanohob. Anai en, kaba, en emaimo lusud aud meren sesar. Dara en emauwam an areg gecgu mougwa hom touebma. Doba en asid enin dau namcir. Sug en aimo areg gecabeci dag ginohob, kaba, Allah asid en dau leng lebesesar se cinogo gini. Hanoba en eigdoumesa en dig bogo naugb en eigtou sungga toua terimda. Anai men geicara gin, kaba, eic dag Allah medoc eigouhw an enohob.
27 Hang men geicara emedag gembala gesa taij gedig len meroho agas sug nosa meren geicara touwero. Anai sug len leic aremeta mogwihi astesda lona dag lauwaharo dou Allah naugb lusud meren sesar dag gin, kaba, len leic aremeta mogwihi bauwaharo dou Allah naugb lusud meren sesar dousero. Doba len leic aremeta mogwihi lauwaharo dou en naugb lenin meren sesar nosahabi. Hanoba len lemeic aremeta mogwihi naugb lusud meren sesar ucan dou Allah toua. Doba sug Yesus eic enin mogwihi bauwaharo dou Allah naugb maman sesar gin, kaba, en eic enin mogwihi bauwaharo mougwa cum dou Allah naugb maman sesar dous. Hanoba en arges dau gin toua, anai gini edeinyum naugb maman sesar augwan beb huhugb namcirohob.
28 Dara Musa men gomnomna gin, kaba, eigdoumesa gembala gesa taij moho agas gedig len lemaimo areg Allah arougb len an ginohob augwan asesa touwero. Doba len ledreg mougwa einyana dau gin toua terimdohob, anai leni toua dag lusud misen dous. Hang meren goubesa naugb sug len les agadgeij, kaba, toua ingmaro. Doba sug Allah eigdoumesa en Meisi Yesus dag Gembala Gesa Taij Moho Agas naugb maman, kaba, en ou enin moho debin gin. Hang enin eng edag Sud Hom Geigdoc Maman Dau Sesar Men Gogom aud maireseb menau geb huhugb gini beb huhugb namcir. Anai en emedreg dau areg Allah arougb en an eisaugb maireseb huhugb gini mougwa hom touwero. Doba en aimo augwan gini an maman terimda edebeij sug ouwedoc touohob. Dara Allah men gouwara gin, kaba, aimo ucan Musa men gomnomna gin toua. Dangga hang, gomnomna gin, kaba, emeb naugb maman toua deitero, doba ediyebeiya dau maman namcir. Anai gomnomna menau gin, kaba, en baihiron dougwo areg mohon augwanohob.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA