1 Nana'a im makusudnya: kon wakutu in adií inta sinantuí mogogabat kong kapunya'an ing guyanganya no'intokpa, sia naípabií onda bo ata, umpakahbií sia tua ing kitogi im bayongan yagi-yagi inta sinaḷaían ing guyanganya. Sia in umuranpabií ḷukadan makow in intau ibanea modapot momangartidon in sia andeka bain motompod umurnya inta ain sinantuí.
2 (4:1)
3 Natua doman ing kita, ko wakutu in diaípa moguyang im pirisaya, yo kita im mobaliípabií ata in Ibilis mita kon dunia na'a.
4 Ta'e naonda im motompodon wakutunya, potabaídon i Allah ing ki Adií-Nya mamangoi in dunia na'a. Ki Adií-Nya tatua pinononggadií in tobatuí bobay inta nobiagpa kom bonu ing kawasa hukum i Musa.
5 Sia na'a pinotabaí sim mobogoi ing kabebasan kon intau mita inta umuranpa nobiag kom bonu ing kawasa in hukum i Musa; simbaí kita mobalií ki adií mita i Allah.
6 Mo'ikow nion ki adií mita i Allah, da' pinotabaí-Nyadon in Roho i Adií-Nya mamangoi ko'i naton inta tantuí mokuani; Amaí, oh Amaíku.
7 Bo mo'ikow in de'eman bidon ata, ta'e nobalií bidon adií, daí ki Allah im mobogoibií koi monimu im bayongan yagi-yagi inta ain sinadia-Nya ko'i adií-Nya mita.
8 Tungkuḷ intua mo'ikow diaípa nonota'au ko'i Allah, tuamai mo'ikow nobalií ata ing kawasa mita inta inanggap monimu ki allah, ta'e sabanarnya in de'emanbií ki Allah.
9 Tongaí masa in tana'a, mo'ikow aindon nopirisaya ko'i Allah, ande singogon makow mopoḷok, ki Allah ain nonota'au ko'i monimu. Ta'e nongonu sim mo'ikow buipabií mosumbah kon dimukud mita inta mora'at tatua?
10 Mo'ikow tantuípa moḷukad makow kon singgai mita, ande buḷan mita bo taong inta ain sinantuí monimu.
11 Molia-liaubií totok ing ginaku ko'i monimu, dika bo onu inta ain iramijiku ko'i monimu mobalií diaí im baragunanya.
12 Utatku mita! Po'igumonku ko'i monimu simbaí mo'ikow mo'ibog mobalií naí aku'oi. Sin aku'oi ain domandon nobalií naí mo'ikow. Bo kinota'auanku im mo'ikow in diaípabií kon dodai onda in nogaid kon inta diaí mopia ko'inakoí.
13 Tantuí kotoropanpabií monimu nongonu sin aku'oi namangoibií nopoyaput in Habar Mopia ko'i monimu tungkuḷ intua. Tua in lantaranbií aku'oi notakit.
14 Bo wakutu intua mo'ikow diaí morongoí mamangoimai ko'inakoí, umpakahbií ka'ada'an awakku tungkuḷ intua nobalií totungkuḷ ko'i monimu. Malahan sinarima monimu in aku'oi naíonda bo notarima kon tobatuí malaekat i Allah, sedang no'iliupa doman kon tua, sinarima monimu in aku'oi naonda bo notarimadon ko'i Yesus Kristus.
15 Mosanang totok mo'ikow tungkuḷ intua, yo tana'a ondadon ing kasanangan monimu tatua? Kinota'auanku bidon ing kopopia ing gina monimu, sim mota'aukubií poguman kon tungkuḷ intua mo'ikow mokobaliíbií monguil kom batoḷ im mata monimu bo ogoi ko'inakoí, aka paraḷuonku doman intua.
16 Yo degaí saturuondon monimu in aku'oi tana'a makow sim moguman kon totu'u ko'i monimu?
17 Intau mita ibanea moramiji totok motayak ko'i monimu, ta'e diaíbií mopia im makusud monia. Mosia tua in tongaíbií mo'ibog momontow kon hubungan monimu takin i nami, simbaí mo'ikow mo'ibogdon dumudui ko'i monia.
18 Memang mopiabií aka intau morajing mogaid kon inta mopia, asaḷ bo umuran natua bo dona'ai tongaí aka aku'oi kon yuaí-yuaík monimu.
19 Ule adiíku mita inta kinotabiku! Tana'a aku'oi bui notakit sin umuran morai ko'i monimu. Takitku na'a in naonda bo takit im monononggadií. Moaíjar totok im porasa'anku, aka sipat mita i Kristus bo diaípa no'itonop kom bonu ing gina monimu!
20 Aku'oi mo'ibogdon totok moyodungkuḷ monimu in tana'a makow, simbaí aku'oi mota'auadon moyosingog moyogintayowan makow, sin diaídon kota'auanku mongo onupa in aidanku mo'indoimai kon oaíid monimu naniíon.
21 Utatku mita inta mo'ibog nobiag kom bonu ing kawasa hukum i Musa, indongogaipa in aku'oi! Pogumankudon ko'i monimu onu inta sabanarnya pinais kom bonu in hukum i Musa.
22 Kon tua aim pinais kong ki Abraham kogadií kon doyowa: Inta tobatuí no'uliínya ko'i atanya, yo tobatuí in no'uliínya ko'i ibuḷoinya.
23 Adií inta nongkon bobay ki atanya, oyuíon sim pinodoyon kon ibog in intau na'a. Ta'e aka adií inta nongkon i buḷoinya, oyuíon sim pinodoyon kon dandi i Allah.
24 O'uman tana'a mobalií olinow naton. Bobay doyowa tatua naí bií onda bo dodandian i Allah doyowa: tobatuí nongkon buḷud in Sinai tua inta adií ko'i Hagar, ki adiínya inta pinononggadií saḷaku ata.
25 Daí ki Hagarbií tua in sinangoian buḷud in Sinai kom butaí in Arap. Sia naonda bo Yerusalem tana'a makow, inta nobiagdon ata.
26 Ta'e Yerusalem inta kon soroga tuata in Yerusalem inta nobebas, bo siabií tua ing ki inaí naton.
27 Sing kom Buk Mosuci pinaisdon nana'a, "Koḷungangadon ing ginamu bobay bantoí, inta diaí dodai onda nononggadií! Kosanangdon bo kopia-piadon ginamu ule ikow inta diaí dodai onda nokorasa kon roriga monononggadií! Sim bobay inta sinaḷaían i buḷoinya im moko'uliíbií kom mobayo-bayong in adií. nongkon bobay inta nobiag takin i buḷoinya."
28 Utatku mita, mo'ikow nion naonda bo ki Ishak inta pinonongadií pinodoyon kon dandi i Allah.
29 Kon wakutu intua adií inta pinononggadií podudui kon ibog in intau, nomogutuí kon adií inta pinononggadií podudui in ibog i Allah, daí natua doman tana'a makow.
30 Ta'e tarukirabií inta pinais kom Buk Mosuci, nana'a: "Poguntundon im bobay ata tanion takin ki adiínya, sin adií inta nongkon bobay ata tatua diaíbií mota'au mogogabat kong kapunya'an moyotakin adií inta nongkon bobay nobebas tua."
31 Daí pogumanku utat mita, kita na'a in de'emanbií ki adií im bobay ata tatua, ta'e ki adiíbií im bobay inta nobebas.

Studi Alkitab lengkap, silahkan lihat Alkitab SABDA :: Galatia 4
Studi Alkitab mobile, silahkan lihat Alkitab Mobi :: Galatia 4

Download Aplikasi Alkitab Karaoke (BETA) Android:
https://play.google.com/store/apps/details?id=org.sabda.alkitabkaraoke