¹ Zen in zep, ee Bian Yesus hup de jal hap de bwinak gwen zini ama emsa titi tabiꞌin: Em Alap mo hlil irin zi mo kim lowehe gwek, sap Zen eiwa mes emsa hen hlil inki.
² Enlala betekkam hen sae-saekam lowehe gwek, hen bahem nabakam jal ta gwen. Zi mo gwensa de sin-sin gwen naka hlaulblunna, desa kwasang naban em zergwe gwen.
³ Dawemkam em ealp gwe-gwen– aha-ere enlalakam eka lowehe gwek. Sap em mese Alap mo Enho de emsa ing gwe hebiridankam enho nakon eaha-en gwek.
⁴ Sap nen angkam aha-ere tim makane lowe heꞌan, hen Alap mensa zere mo Enhona zerzimki Zen aha-en. Hen mensa Alap nesa de kwang gulu dankam gu-gubiridaka, dawemsa de lamkam golzimdin hip dena, nen desa kitak esa hla kul.
⁵ Hen neno mae mo Teipsinni Bian Yesus, Zen aha-en. Hen neno mae mo taiblibinni aha-en. Hen baptis tabinnik, nen mese kitak ang tak.
⁶ Hen nen kitak aha-ere Alapsae Biankam en gweblanan. Zen kitak nesa teipsibiridaꞌara, hen kitak golesyal taꞌara, hen kitak nesa nere mae mo enho nakon golegwe gweꞌara.
⁷ Hwena Kristus mes zere mo serkam de kae-kaekam nebe mae hap kitak sosonna sren-srenkam hli yulzimki.
⁸ Kirekam man tangan Alap mo epba ola ban dakastiꞌin, in zen anakan lwakye, “Zen kim teipsin hip gulk sun sewe seꞌanka, Zen zere mo jal zini beyakam tahalebirki, hen dekam zep zere korena kip heꞌho gwibin nika hli yulzimki.”
⁹ Alap mo olak insa kirekam lwak, “Zen gulk sun sewe seka,” zeno dam gulsunnu, Zen nonol otde tangan san ati gwe ineka– hendep okamana an mo otde tangan san.
¹⁰ In Zen ati gwe ineka, Zen mes etan ngatan zi mo langnak de teipsin tangannak dep sewe seka– dekon de tingare lang yala ansa kara gul ine gwen hap.
¹¹ Zen Zen sosonna nebe mae hap sren-srenkam kae gwe-gwibir-zimnira. Ahakorena kip zere mo olsa de aha zi mo lang san gol halada gwen hap denaka gol gwizimnira. Ahakorena kip Alap mo Enho nakore olsa de ayang gul gwizimdin hip denaka gol gwizimnira. Hen ahakon zisi de halen ora san dep dam tasik sone gwibin hip de wenya. Ahakon jemat-jematsa de nol gwibirida gwen hap de wenya. Hen ahakon Alap mo olkam de tawa ta gwibin hip de wenya.
¹² Zeno mae mo syala in, zen Kristus mo timni nesa dikim syal gwibin hip hen tatete gun hup dena– Alap mo bi gwibiridan wenya nen ekakim dawemsa Kristus mo bose hap syal ei gwibik.
¹³ Zep zeno mae mo syala, zen Kristus mo timnik de biti gwen zini nesa dikim anakan titi ta gwibin hip dena– Alap mo Tanesa de taibliblankam ekakim eaha-en gwek, hen tame tankam ekakim sowehek, hen zeraha-en gwennak ekakim ezise gwek. Zen dekam esa hendep zeno kim lowehe gwer.
¹⁴ Zep nen bap nen walas betek mo kim auhu-kama zi mo derek en san de yasik tabin sin ang ta nasen gwen. Sap men zen kirekam ang ta nasen gwenan, zen hi mo kim men-san an-sankam de ngep gwe naseran makan egwe gwenan.
¹⁵ Diki dawemna, eiwa de tangan naka nen kyang-kyang gulsuk gwen, hen deban nen nenaka kwasang gwibirida gwen– Kristus mo kim ekakim nabakam eliwehe song gwek. Sap Zen Zen neno mae mo nola. Nen an zeno tim makane lowe heꞌan.
¹⁶ Zen de nesa golesyal ta gwenkam, neno mae mo lowe henna dekam san de aha-ere tim de syal gwen makan lwa gwenan. Sren-srenkam hom. Sap aha-ere timni, zeno sana, danna, hen kala, zen man zenaka mas neibirida gwenan– dekam dikim timni in dawemkam mam gwen hap hen tatete gwen hap. Nen zebe nenaka dawemkam kwasang eibirida gwenan, hen Kristus mo timni zep tatete gwe zahe gwenan.
¹⁷ Zen in zebe Bian Yesus mo bosekam emsa gubiridaꞌan: Em bahem Alapsa de tame tan srem zi mo kim lowehe gwen. Sap kire zini enlalana mes ehai gwek.
¹⁸ Sap zeno mae mo enhona mes kawesiki, hen ngaya gwen hap dena insa Alap gol gwizimꞌira, zen desa hom tame nuꞌin. Sap zen zere mae mo enho lilikinni mes Alap hap dayalsiblik, zep hendep Alap osan de ang tan hap nola mes edrak-drak gwek.
¹⁹ Zen mes anakan de lik gwibinni baes tak, “An dawemsae oꞌan. An kareksae.” Zere mae mo tim nikore hole-hlesa mes anakan blol neibik, “Sap asa desan en ang ta gwer.” Hen zere mae mo timni mes sosok nuk– dekam de hole-hlesa mam gulsuk gwen hap.
²⁰ Hwena Kristus hup dena insa ena esane gwek, zen kire san dep hom–
²¹ men kirekam sap emsa tawa da gwibikye. Hen em kime Deban eraha-en gwek, em mese sap anakan tame lak, “Zen eiwa lalak enna.”
²² Zen in zebe etan emsa gubiridaꞌan: Emki ere mae mo epba lowe henna insa hole-hle naban hiri son. Zen in san de ble nabare kire-kirena kiye– ase naban. Sap epba lowe henna in, zen zewe beya gwek– boton hap dena, hen swi soson hap dena.
²³ Diki eno mae mo enhona hen enlalana zen kitak eese gwen.
²⁴ Ere mae mo lowehen esena insa emki aha zi hip goltrei gwizimdin– baju esesa de ala son makan. Sap Zen Alap angkam emsa ese tabiꞌira– san de aha zisi de yang tasibinni kiye, hendep zere mo nwe-mase tangan makan, dam-dam enkam de lowehe gwen hap, hen eiwakam de zere en onak etal gwesin hip.
²⁵ Zen in zep, aya-wal oso-wal, boton olkam bahem tangan enaka tonbirida gwen. Kristen bose omka eiwa de ol enkam em tonbirida gwen, sap nen apdenak mese Kristus mo timnik biti gwek.
²⁶ Em de jal ta gwenkam, jala in bap zen karek san dep emsa kang gul gwen. Yakla nwena bap zen dum gwehen– em de nama jal gwe tinennakye.
²⁷ Dowal mo kigi hap bahem orana kles tyasik gweblan.
²⁸ Sowe tam wenya, em sowesa baes tan. Diki ere mo irse gwen en nakon em gulin gwen, hen dekam em tahalha wenyaka mas gwibirida gwen.
²⁹ Eno mae mo ek nakon bap zen karek-karek ola hen swi ol maena te so gwen. Diki wal bosyansa dikim tatete tabin hip de olsa em ton gwibin– men kire enkam zebe mae hap dakastilzimꞌinke. Kirekam de ol aisili zen dawemsa esa kim ol gwizim.
³⁰ Dawem enkam lowehe gwek. Kareksa de gol gwenkam bap nen Alap mo Enhona ja-ja ta gwen. Sap Zen mes neno mae mo enhonak anakan ale gulku, “An Alap mo bi gweblan zi.” Enho mo alena in, zen dekam esa aumwa hap de yaklanak yaing gwer– men dekam tangan de nesa kawesin nikon gwiswe soneꞌankaye. Zep bap nen ja-ja ta gwen.
³¹ Enlala ennak de jal-jalsa em jek-jak gun. Bahem enaka u sal-sal gwibirida gwen. Bahem tangan enaka nop-nop gwibirida gwen, hen bahem enaka lamang ta gwibin. Tingare kareksa em hli yun.
³² Diki em enaka kwasang gwibirida gwen, hen sae-sae enlala enkam em lowehe gwen. Emki hwe-hwekam wal bose wal oban ere mae mo karek-karekna eititi gwe-gwibin– men kirekam hen Alap eno mae mo karek-karekna ep eititi gwibir-zimkike. Sap Kristus Zen kire hap te-lidak sonnak tilki.