1 Zen in zebe ee, Paulus, bwina an kon Yahudi srem zini ebe mae hap Alapsa abe ta gwenan. Sap asa Kristus hup de jal hap bwinak awe tak daink, sap ee ama zere onakore ol dawemna insa ebon mae osan dep gol halada gwek.
2 Ena mese ki anakan esak, “Alap Zen ki zere mo serkam de kwasang-kwasangkam asa dam tasiki,” zep ki syala insa abe hap wei yul soneblaka– emsa dikim mas gwibirida gwen hapye.
3 Men kirekame lure nakon suratnak awe betek enkam ale gul– Alap mo kalangna mensa menkam aning gul gweka, desa mes ki abe hap goltreblaka.
4 Suratna ansa de baca gunkum, esa ki hen dam ulsul– Kristus hup de ol aning gunnu insa, men kirekame aena dam gulsukye.
5 Orep Alap Zena hom goltrei gwizimki, hwena angkam zere mo Enho goltrei gwizimꞌira– Kristus mo dam tasibin zi hip, hen zere mo Enho nakore ol ayang gul gwen zi hip.
6 Zen a desa mo tingare zi hip aning gulzimkiye: Yahudi srem zini ol dawemna an san de hen ang tankam, zen dekam sa hen heꞌho gwibin tanganna nulin– mensa Alap zere mo hlil irin zi hip golzimꞌinkaye. Zep angkam Yahudi zi niban Yahudi srem zi niban aha-ere tim makane lowe heꞌan. Zen angkam apdenak Alap mo gu-gubiridan ola Kristus onakon nulinꞌin.
7 Zen zep Alap zere mo kwasangna serkam abe hap golblaka– ol dawemna ansa de Yahudi srem zini ebon mae osan gol halada gwen hap de syala kim abe hap wei yul soneblakaye. Hendep dekam zep zere mo sosonna abon onak serkam syal gwe-gwek. Tingare Alap mo irik gin zi nikon, ee an zen tangan– otde tangannak de zi niye. Hwena Zen ki owas hap zere mo kwasang-kwasangkam syal yala ansa abe hap wei yul soneblaka. In zebe anakan de gol halada gwen hap syal-syal gwe-gwenan, “Kristus onakon de heꞌho gwibinni, zen serkam de yawal tanganna, hendep zini nen bejen sul sonenkam tame gun.”
8 (3:7)
9 Asa hen man dam tasiki– ee dikim anakan tawa tabiridanda gwen hap, “Alap men Zen tingan yang tabirki, men kirekam orep kalang gwe guku, angkam man Kristus onakon goltreizimꞌira.”
10 Alap man orep kalang gwe guku– dekam de ngatan zi mo langnak de teipsin-teipsin wenya kip zere mo serkam de enlala blalsa zertreizimdin hip. Zep hendep angkam nesa man anakan goletreizimꞌira, “Emki hlauludan. Yahudi zi niban Yahudi srem zi niban angkam aha-ere jematkam lowe heꞌan.”
11 Alap zere mo nonol lonesen nakore kalangna kirekam lwak, in zep hendep nere mae mo Bian Yesus onakon nesa kirekam ahaꞌen gulku.
12 Zen zep Yesussu de taibliblankam zeraha-en gwenkam, nen dekam zebe airin sremkam Alapsa abe la gweꞌan. Sap nen ema hen anakan tame ul gweꞌan, “Zen eiwa sa asa dokwak tala.”
13 Zen in zep ee ama emsa gubiridaꞌan: Ëe ansa jalom ek tihinak awe gweꞌan, zep bahem enlalana edowe hanan. Sap ee Kristus hup de ol dawemsa de golasas gwe-gwen habe bwinak awe gweꞌan. Hen em mese ola insa laiblibik, zep ee an hen eno mae mo dawem habe ze gweꞌan.
14 Zen in zebe Bian Alap hap zere mo nwenak boklena kom so gweblanan,
15 men Zebon onak tingare zi ausu mo ausuna lwaꞌanke– sap ngatan zi mo langnak de wenya, hen sap okamanak de wenya.
16 Ëe zebe anakan abe ta gwenan, “Bian, Emki ere mo ngatan zi mo lang nakore serkam de kae-kaena gol gwizimdin– dekakim ere mo Enho naban de zergwe gwenkam enho nakon etatete gwe zahek.
17 Zen man Kristussu daibli gweblanan, in zep dikire Zen enho nakon golegwe gwek. Zeno kwasang-kwasangna dikire hen dawemkam tame nuk, hen dikire zao en tatem ezauk gwek.
18 Bian, dikire Efesusk de wenya hen tingare ere mo hlil irin wenya Yesus mo kwasang-kwasangna insa tame nuk– yakna, blala, olk san dep, hen gulk sun dep. Zen serkam de yawal tanganna.
19 Ëe sap zini ama kwasangna insa de kitak tame gun hup ealp gwe-gweꞌan, hwena molye kitak tangan tame uk. Hwena Bian, dikire Kristus mo kwasangna zeno mae mo enhonak beya gwek, hendep zep ere mo Enho naban soson naban dikire zeno mae mo enhonak sowe henkam nola gwek.” Ëe kirekame ebe mae hap Alapsa abe ta gwenan.
20 Zep dikire kitak Alapsa boltere dak, sap zeno sosonna nebon mae onak serkam tangan syal gwe-gwenan. Nen sap betekkame hen tame gun sremkame zere mo soson hap abe la gwenan, hwena Zen mam tangankam nep gol gwizimnira.
21 Dikire tingare Kristus hun de zeraha-en gwen wenya Bian Alap mo bosena hendep denaban teip nulsuk gweblak– sap angkam de zeraha-en gwen wenya, sap hen lun kore wenya. In eiwa tangan!

Studi Alkitab lengkap, silahkan lihat Alkitab SABDA :: Efesus 3
Studi Alkitab mobile, silahkan lihat Alkitab Mobi :: Efesus 3

Download Aplikasi Alkitab Karaoke (BETA) Android:
https://play.google.com/store/apps/details?id=org.sabda.alkitabkaraoke