¹ Timotius hun kim Makedonia mo e darena Amfipolis ne Apolonia neka ertamanka, ki zep Tesalonikak erhataka. Zewe hen Yahudi mo but srem gola ki.
² Paulus ki zep but srem gola in san dep song gweka– men kirekam zena gwe gwekake. Dekam dan-ahare Hari Sabatnak Alap mo epba ola kore naka zep klis gul gwizimꞌinka.
³ Zen anakan ze srip gulsuk gwizimꞌinka, “Alap mo epba olak man dam gwesik, ‘Nesa de ngaya tabin hip de zere mo zer sonen Zini, Zen nonol kareksa sa goltowera, ki sa hwena tin nikon etan ngaya gwera.’ Ëe in zebe emsa Yesus hup dena ansa anakan tawa tabiꞌin: Zen eiwa Zen tangan– nesa de ngaya tabin hip de zer sonen Zi niye.”
⁴ Dekam zep Paulus ne Silas neka Yahudi zini in ahakon daiblizimk hen ang neizimk. Beyakam Yunani kore zi ang neizimk– Alapsa men zen betek ne gweblakke. Ahakon hen bose nabare we wal.
⁵ Hwena ahakon mae hap husus neizimꞌik, “Ano mae mo but srem gola kon kim hli nil inꞌin.” Dekam zep pasarak e-ensa de zauk gweblan zi hip te-alasa neirzimk– zen dikim eilman gwennak mas gwibiridan hap. In kim eilman gweꞌak, dekam zep Yason mo gola dot dasizik– Paulus ne Silas neka dikim zi tra mo nwenak ziwet son hap.
⁶ Hwena kim ze nohwenzimzik, Yason zenaka zep il dihak, hen ahakore Yesussu de taibliblan zi niban ena iwe de teipsin-teipsin zi sin dep il dibirhak. Anakan zep ze boton ol blo-blokam nenbiridak, “Tingare okamanak men zen zini yasik da gwibiꞌin, zen mes angkam awe yaing gwezal.
⁷ Hwena Yason an mes zini insa zere mo gola kon lup gul inki. Zeno mae mo tawa tabinni, zen Roma mo irik gin nikon dikim wet so gwen hap titi da gwibirin, sap zen anakan tawa da gwibirin, ‘Aha teipsinni ki– bosena Yesus.’”
⁸ Kirekam kim nasalbiridak, dekam zep zi trana in teipsin-teipsin wenya in mae han ejal gwek.
⁹ Dekam zep Yason maesa wal bose wal zeban nenbiridak, “Te-alasa nongka ap olzimk, ki neik sek gwek.” Kim nolzimk, dekam zep nenbiridak, “Angkam sap esa sek gwer.”
¹⁰ Orapna kim tiꞌinzak, dekam zep Paulus ne Silas neka Timotius mae han ena Bereya san dep lup nul sonek. Kim ze yaing gwek, dekam zep Yahudi mo but srem gol san dep sek gwek.
¹¹ Zewe de zini enlala ngatanna. Zen Tesalonikak de zi mo kim hom. Zen zep aha-ere enlalakam Paulus mo mo tawa tabinni insa nulin gwek, hen zen dekam mwin-mwankam Alap mo epba olsa anakare hap karatda nul gwek, “San ha eiwa denaka nesa tonbirida gweꞌara?”
¹² Zen zep beyakam Yesussu daibliblak. Zen ahakon Yunani kore zi, hen Yunani kore bose nabare we wal.
¹³ Hwena Tesalonikak de Yahudi zini in zen Yesussu daiblibla srem gwek, Zen kim Paulussu anakan nasalblak, “Zen angkam Bereyak tawa ta gwibiꞌira,” zen dekam zep yaing gwezak, dekam zep ze hwena zewe de zisi olkam se dyabiridazak.
¹⁴ Dekam zep, Bereyak de zini men zen Yesussu daibliblak nabakam Paulussu hi san dep zon dak. Hwena Silas ne Timotius ne zen nama ki ze eka.
¹⁵ Men zen zon dak, hendep Atenak nerhatak. Zen kim lwan dahak, zebon mae zep Silas ne Timotius neka anakan gu sonezimki, “Nabakam de asa ertrozak.”
¹⁶ Atena kon kim nama Silas ne Timotius neka eiszimꞌinka, enlalana man tangan anakare hap dowebla hanaka, “An ba hap ena ansa yang tabin dowal-dowal enkam al dasik?”
¹⁷ Zen in zep Yahudi mo but srem gol san song gwe-gweka– zao dikim Yesus hup denaka Alap mo epba ola kon ziklis gul gwen hap. But srem gola iwe, Yahudi srem zi niban siri gwe-gwek. Paulus mwin-mwankam hen pasar san song gwe-gweka. Men zen zewe ba mae hap yaing gwe-gwezak, desa zewe zep Yesus hup de ol dawemkam tawa ta gwibirki.
¹⁸ Ëna iwe de zini ahakon Epikuros Bak mo tawa tabin sin de ang ta gwenna, hen ahakon Stoakam de gubirida gwen wenya. Zen dekam zep Paulus hun nerkeisa-keisa gwek. Ahakon man nenblak, “Ol beyam-bya zini an man zenaka tim tiꞌara, ‘Ano tawa tabinni an airis!’” Hwena ahakon man nenblak, “Zini an san ha ese yang tabin alap san de ang ta gwen hap nesa titi tabiꞌira?” Zen mae hap ki eguk: Sap zen Yesus de tin nikon ngaya gwen hap denaka tawa ta gwibiꞌinka.
¹⁹ Dekam zep Paulussu zere mae mo egolek de gwe-gwen kwatap san dep nersong gwek. Kwatapna in “Areopagus”kum nen gweblak. Zao zep nenblak, “Ëe ama edwam gweꞌan– eno tawa tabin esena insa de asa tonbiridan hap.
²⁰ Sap eno tawa tabinni ano mae mo inik au hlobin makan tangan lwaꞌan, zebe dawemkam de emsa sane tan hap edwam gweꞌan.”
²¹ Sap tingare Atenak de zini hen aha lang nakore zini men zen zewe lowehe gwek man esam gwesik gwek– ol esesa de esane gwe-gwen hap, hen kire hap de ekeisa-keisa gwe-gwen hapye.
²² Paulus ki zep luweka, ki zep gubiridaka, “Atenak de zi, ee ama emsa tame tabirin, ‘Em in alap-alapsa dawemkame blikip eisibirida gwenan.’
²³ Ëe kime eno mae mo enak te nasen gweꞌak, dekam zebe eno mae mo yang tabin alap-alap hap de kire-kirena kara ta gwibiꞌik. Dekam zebe hen tweran nin tru tasik gweblan hap de kalsna hlauk. Zewe ema ale uk, ‘An neno mae mo tame tan srem alap hap dena.’ Zep men zebe hap tame tan sremkam tru lasik gweblanan, ee ama Desa emsa tonbiridaꞌan.
²⁴ “Alap men zen okamana ansa yang gulsuku, hen tingare kirekam-kirekamna yang tabirki, Zen Zen ngli naban kama naban bi gwizimꞌira. Zen zi mo gol taublun dannak hom gwe gwenda.
²⁵ Hen Zen hom zi de banakare maesa golblan hap dwam gwe-gwenda, sap Zen tahalha naka hom. Sap Zen Zen kitak zi hip gol gwizimnira– angna, ensasana, hen tingare kirekam-kirekam naye.
²⁶ Nonol lone sennak Zen aha-ere zi nikon tingare zi ausuna yang tabirki. Hen dekam zep zebe mae hap okamasa de bi gwibin hip dena golzimki. Zen Zen kitak okama tek-tekna kae gwibir-zim niraka, hen Zen Zen auhu-kamanak de teipsin-teipsinni anakan dam tasik gwibirida, ‘Angkam em teipsik. Angkam em ati gwen.’
²⁷ Alap mes kirekam syal gwibirki– Zenaka dikim te gweblan hap, mae hap, ‘Wehe asa nertoweꞌak?’ Hwena Zen sap nebon mae onakon langanak hom–
²⁸ men kirekam egu gwenanke, ‘Nen an zeno taha terenake lowehe gwenan hen ete nasen gwenan. Ensasana hen Zebon onak.’ Ebon mae onakon men zen terya ale dabik, zen hen ki anakan egu gwek, ‘Nen an kitak zeno walas.’
²⁹ “Zen in zep, nen de Alap mo walas gwenkam, nen bap nen anakan tim tin, ‘Alap mo nwe-masena zen zi mo tahakam de yang tasin makarena’– men kirekam zi mo enlalakam emas nakon, ahaksa perak nakon, hen kaso nakon yang da gwibirinke.
³⁰ Orep Alap nwe enkam ze kara ta gwibirki– kirekam de Zenaka teblannakye. Hwena angkam zep okamanak de tingare zini gubiridaꞌara, ‘Angkam dekam ehalek.’
³¹ Zen mes yaklana dam tasiki– dekam de tingare zisi zere mae mo enlalasa de hla tazimdinkim klis gun hup denaye. Men Zen de klis gun hup dena, Desa hen mes dam tasiki. Hen dekam de tingare zi taibliblan hap, Alap mes tin nikon ngaya taka.”
³² Hwena tin nikon de ngaya gwen hap dena insa kim sane daꞌak, ahakon dekam zep swre daꞌak. Hwena ahakon man nenblak, “Neik etan aha yaklakam kire hap dena asa tonbirida.”
³³ Paulus ki zep kon song gweka.
³⁴ Hwena dekam ahakon man zeno ola kon Yesussu daibliblak. Zen dekam zep zebon ang ta gwek. Ahana bosena Dionisius. Men zen kwatapna iwe egolek de gwe-gwek, zen zeno mae mo aha mamna. Ahana we, zeno bosena Damaris. Ahakorena hen ki.