¹ Aya-wal oso-wal, ee nabakam asa dan-ahanna emsa amjanbirzir. Ëe dekam zi beyanak de sane gwen nakon asa emsa klis gulzul– men kirekam Alap mo olak lwakke, “Zini dan-dan, ahaksa dan-ahan maekam de gun sremkam, ‘Eiwa, ee ama ere mae mo nwekam karek gwennak hla lak,’ dekam bejen zisi karek tan.”
² Ëe kime dan sonna emsa amjanbik, ee dekame anakare ol tan-tanna ansa ebe mae hap golzimk, “Etane nama karek gol gwennak emsa hlauludaꞌanzak, ki asa emsa karek tabirzir.” Angkam langa nakone ol jalse gwenna inkam etan tingan emsa enlala sobiridaꞌan– sap orep men zen karekna nol gwek, hen ner hom de karek gol gwen wenya.
³ Dekam esa asa tame lal, “O hare eiwa, Kristus ki am zere mo ola Paulus hup ing gul sone gweblanda– zen dikim jala ban tonbirida gwen hap denaye.” Zep jala ban de tonbiridan nakon esa anakan dam ulsul, “Hare eiwa, Kristus sin-sinkim hom am nebon mae syal gwe-gwenda.”
⁴ Eiwa, Kristus kim te-lidak sonnak tilki, dekam Zen hen man nwe-mase gweka– san de sin-sinni. Hwena Alap mo sosonna Zebon lwa gwenan, zep angkam ngayana gweꞌara. Ëe Kristus mo nganak de syal gwe-gwen zini hen kirekam: Ëe an hen zeno kim nwe-masena sin-sinni. Hwena ebon mae osan de lwahal zankam, dekam sa sosonna Alap ne Kristus nebon onakon abon onak hatal– dekam de emsa oto tasibin hip denaye.
⁵ Emki ere mae mo enhosa anakan tame ta gwibin, “Ëe san ha eiwa ama Kristussu taibliblaꞌan? San ha home?” Em de eiwa taibliblankam, ki esa enaka anakan tame la gwibir, “Bian Yesus ki eiwa ano enhonak gwe gwenda.”
⁶ Dekam esa hen asa anakan tame lal, “Paulussu eiwa Bian abon mae osan dep zer soneka.”
⁷ Zep ee ama Alapsa abe ta gwenan– em dikim nabakam ano ol san ang tan hap. Sap ee home anakarekam emsa dwam gwibiridaꞌan, “Dikire enol drak-drak gwek, ki asa Kristus onakore sosonkam karek tabir.” Diki ano dwam gwibinni, “Dikire nabakam Kristus onak etal gwesik.” Ki hwena ee de hata zankam, sap sa asa etan enlala neblal, “Paulus mo ola sin-sin enna. Zen bejen damnak jala ban nesa tonbiridan.”
⁸ Sap em de eiwakam Kristus onak etal gwesinkim, ki ee molye emsa karek tabirzik. Sap ee desan en debe emsa titi ta gwibirin.
⁹ Zebe anakan enlala gwe-gwenan, “Ëe sap asa zi mo nwenak sin-sin gwer. Diki Korintusk de eKristen gwen wenya zen zen tangan etatete gwen.” Zen in zebe Alapsa anakan abe ta gwenan, “Zen dikire Kristus en onak etal gwesik.”
¹⁰ In zebe suratna ansa nonol aen de hata zan sremnak ebe mae hap ale gul sonezimk– anakare enlala naban, “Ëe de desa hlauludankam, ee home ki dwam gweꞌan– Bian onakore sosonkam de jala ban karek tabin hipye. Biansa de taibliblan nakon mana hwena enlala dowe hanan hap lwanda halank.” Sap Bian Yesus mensa sosonna abe hap gol gweblanda, zen eno mae mo ei nika dikim timbwas gun hup hom. Zen hwena dekam de tatete gulzimdin hip.
¹¹ Dawem, aya-wal oso-wal. Zao en zausunun. Em eisrip-sri gwe-gwen. Kristus en onak etal gwesik. Hen ano ol san ang ta gwek. Alap mo taha terenak aha-ere enlalakam lowehe gwek. Alap men Zen tahana nebe mae hap deisu guzimꞌira, Zen sa kwasang-kwasang naban emsa golelowehe gwera.
¹² Men kirekam Kristen zini etagal gwennak egwe gwenan, ansa de baca gulsun hyanak emki kwasang naban enaka tahasa goletowaran.
¹³ (13-12b) Tingare awe de aya-wal oso-walya zen dawem ensa ebe mae hap nol sonezimk.
¹⁴ (13-13) Dikire Bian Alap ne Bian Kristus Yesus nebon onakore kwasang-kwasangna eno mae mo enhonak lwa gwek. Hen dikire Alap mo Enhona emsa kitak golelowehe gwek– aha-ere enlalakam ekakim lowehe gwek.