¹ Ënaka de boltere tanna, zen eiwa waba hap, hwena ee asa etan ebe mae hap ayang gulzim, sap ebon mae onak zini kirekam zenaka boltere da gwibirin. Zep angkam ee ama emsa aisil gwibiridaꞌan– men kirekam Bian ano nwena ap lirisin so gweblakake, zere mo enlala aning tansa dikim abe hap zertre gweblan hap.
² Angkam tahunna mes empat-blaskam tamunk, asa dekam ngatan zi mo lang mo gulkꞌnen tangan san dep neir inehak. Aena angkam home tame guꞌun: San ha tim niban asa neir inehak? San ha enho en naka? Tawana aha-en Alap ze-en.
³ Alap zere mo golek denak kim asa nerhatahak, dekam zep Alap zere mo enlala aning tanna ap zertreblaka. Desa man asa jalse gweblaka– okamanak awe de toran hapye. San ha timni an hane ze sane gweꞌak? San ha enho en nike sane gweꞌak? Tawana aha-en Alap.
⁴ (12:3)
⁵ Sap abe hap mes kirekam de owasna lwablak, zep amaka enaka boltere ta gweꞌan. Hwena ee bejene enaka kire hap boltere tan. Diki anakare enkame enaka boltere ta gweꞌan, “Ëe an sin-sinni.”
⁶ Hen ee sap amaka mam blalkam enaka de boltere tanna etan ayang guꞌun. Dekam molye asa anakan enblaꞌanam, “Paulus in enlala joblo-topna,” sap ano ola botonna hom. Hwena ee molye etan kirekam ayang guk, sap dekam emaka asa enblaꞌan, “Paulus mo nwe lirisin neblanna man beya gwek, zep zen eiwa mamna.” Diki ee ama dwam gweꞌan, men kire enkam ena ano syala nwekam hla kul gwenan, hen men kire enkame ano tawa tabinni esane gwe-gwenan, kire en nakon emki anakan asa enlala gwe-gweblan, “Paulus zen kirena.”
⁷ Ëe dikim serkam de nwe lirisin ne gweblanna in hap enaka boltere tan srem hap, zen zep Alap sang-sang karekna abe hap golblaka. Zep ano timnik sang-sangna in ngi yawal mo kim kang tiꞌin. Zen dekam dowal mo kigina hen asa karek ta gwenda.
⁸ Ëe mese dan-ahan sonkam Bian Yesussu abe ta gwek, “Bian, ngi ben-ben makarena ansa ap mulsublu.”
⁹ Hwena man ap ding gulbluka, “Molye ep mulsubluk. Em sap esa ano kwasang-kwasang ensa de blol gwibin enkam gwe gwera– dawem gwen srem maenakye. Sap zini men zen sin-sin gwen nakon Asa en blol ne gweblanan, zen diki kire zi hibe sosonna mam gul gwizimnin.” Zen in zebe enaka anakare enkam boltere ta gwenan, “Ëe sin-sinni,” sap dekam Kristus onakore sosonna abon onak man mam gwe-gwenan.
¹⁰ Zep ee Kristus mo bose hap de banakare maesa goltowenkam, ee ama sam gwesik gwenan. Ëe sap asa sin-sin gwer. Asa sap sa lamang da gwer. Karekna hen sap asa goltowe gwer. Hen boton ol blo-blona sap sa ap mam nul gweblal. Hen jalom ek tihinak sap asa gwe gwer. Sap kime tangan serkam sin-sin gwe-gwenan, ee dekame Kristus onakore sosonna eis gwibirin.
¹¹ Ëe mese enlala joblo-top zi mo kim enaka boltere tak, hwena zen eno mae mo asa de zerzaun srem nakon ee ki enaka gweblak. Diki em emaka asa erzauk gwek– in kim yasik tabin hip de zini eno mae mo nwenak asa lamang da gwekye. Zen man asa anakan nen gweblanan, “Paulus in betekna.” Zen eiwa. Hwena “mam-mam wenya” in hom asa kwe daꞌan!
¹² Ëe kime enlala tatetekam emsa holokam golelowehe gwek, Alap dekam zep zere mo sosonna abe hap gol gweblaka– desa de ebe mae hap goltrei gwizimdin hip, hen owas-owassa dikim ebe mae hap syal gwe-gwibir-zimdin hip denaye. Zen dekon zep dam gwesinin, “Asa eiwa Alap dam tasiki.”
¹³ Zep men kirekame aha jemat naban golelowehe gwek, ee kire enkame emsa hen golelowehe gwek, hwena diki aha-en: Ëe home emsa asa de te-alakam mas gweblan hap gubiridak– in kirekam ahakore zini angkam emsa nenbirida gweꞌanye. Kwasang tol! Diki ee amaka hen kirekam emsa gweibirida gwek! Ki emaka asa sam eisibliꞌan!
¹⁴ Ëe angkam bira! Nabakam asa dan-ahanna emsa amjanbirzir. Hwena ee molye emsa te-alakam de asa mas gweblan hap gubiridak. Ëe home eno mae mo te-alasa dwam gwibiꞌin. Diki ee ama dwam gweꞌan– em de tingare enho naban asa ang gwe-gweblan hap. Ëe home emsa te-ala hap gubiridaꞌan, sap ee an eno mae mo biankam de gublunna. Sap walasna bi zik mo tahalhasa hom hla nul gwizimnin. Zen diki bi zik walas zik mo tahalhana hla nul gwizimnin.
¹⁵ Zep ee ama sam gwesik gwenan– tingare ere mo soson naban te-ala naban de emsa mas gwibirida gwenkamye, em dikim engaya gwen hap de ora san dawemkam ang tan hap. Ëe insa kirekam emsa kwasang gwibirida gwenan, em hwena ba habe asa kwasang ebla srem gwe-gwenan?
¹⁶ Hwena ebon mae onakon mes yap ahakon anakan asa nen gweblanan, “Eiwa, Paulus damkam hom te-ala hap nesa aberbe tabirki, hwena zen aningkim ki neno mae mo te-alana zerka.
¹⁷ Zen zisi lup gul sone zaka– tahalha zi hip de tagal tazimdin botonkam, hwena Paulus zen twenblaka.” Hwena ena tawana: Kirekam de ola zen boton tangan.
¹⁸ Ëe sap eiwa Titussue titi tak– emsa de amjanbin hip. Hen ee nere mae mo osona mensa dekam ama hen gubluk– zen de ang gweblan hap. Hwena dekam Titus zere hap hen hom ba mae hap emsa abe tabirki. Sap ee debane aha-ere enho naban syal e gwenan. Sren-srenkam hom.
¹⁹ Aya-wal oso-wal, em san ha ano suratna ansa ema enlala eibiꞌin? – “Paulus zere mo bose dikim karek gwen srem hap ki ap ale gulzimki.” Ki hom! Ëe hwena Alap mo nwe kara gwennake Kristus mo nganak de syal ta gwen zi mo kim ale gulzimk– em dikim Kristussu de taibliblan ennak etatete gwen hap. Sap ano syala tingan, zen kire en hap dena.
²⁰ Sap ee ama airiꞌan, san ha anakan asa emsa hlauludazal? – “Zen hom ano ol san ang ta gweꞌan.” Ahaksa san ha enlala nik esa anakare hap asa topse eblal, “Zen ba hap kirekam asa jal gwibirida tine gwenda?” Zen in zebe airiꞌan: Bap zen nama ol keisa-keisa naban lowehe gwen. Bap zen zenaka husus gwibirida gwen. Bap zen zenaka jal gwibirida gwen. Bap zen ehliwe gwen. Bap zen zenaka lamang ta gwibin. Bap zen boton ola gol halasen gwen. Bap zen bolte-boltekam lowehe gwen. Hen bap zen men-mankam lowehe gwen.
²¹ Ëe mae habe airiꞌan: Nama de karekkam lowe hennake emsa hlauludaꞌanzak, ki ee asa serkam tangan Alap mo nwenak saher gwer. Anakan de emsa hlauluda zankam, “Men zen nonol karekna nol gwek, zen nama kire enkam lowehe gwenan,” dekam ee asa tangan nwe go-ho naban enlalana dowe hanal. Karekkam asa emsa goletower– em de kahalo nakon ehalen sremkam, wesya de lirak oson nakon de ehalen sremkam, hen totore swi nakon de ehalen sremkamye.