¹ In kim Alap okamana ansa yang gulsuku, Zini in mes Alap han e gweka. Zeno bosena “Alap onakore engaya gwen hap de Ol.” Hwena okamanak kim hata zaka, ee ama Desa sane la gwek, hen ere mae mo nwekam kara la gwek. Ëe ama ere mae mo tahakam hen olk la gwek. Zebe hendep dawemkam tangan tame lak.
² Nesa de hendep denaban ngaya tabin hip de Zini in kim hata zaka, ee ama Desa ere mae mo nwekam hla la gwek. In zebe angkam ebe mae hap eiwa ulzimꞌin, “In eiwa Zen tangan– nesa de ngaya tabin hip de Zi niye, Bian zere han men Zen e gwekake. Bian Desa ner hom abe mae hap damnak zertreizimki.
³ Zeno bose tanganna Kristus Yesus.” Sap ee insa esane gwe-gwek hen hla kul gwek, in kim asa golelowehe gweka, in zebe desa ebe mae hap eiwa ulzimꞌin– Eirzi-Bia dekakim nesa aha-ere enlalakam isrip-sri naban olelowehe gweka.
⁴ Zen in zebe ebe mae hap ale gulzimꞌin– aha-ere enlalakam de lowehe gwenkam dikim neno mae mo isrip-sri taman kini gwen hap.
⁵ Ëe ama emsa tawa labiꞌin– aena mensae Kristus hon esane gwe-gwekke: Alap Zen lalak enna. Zeno enhonak kawesinni hom tangan.
⁶ Zep men zen anakan egu gweꞌan, “Ëe an Alap hane aha-ere enlalakam zergwe gweꞌan,” hwena zen de nama kawesinnik de lowehe gwen zi mo kim gwenna, ki zen boton tamna hen sap de ora san gwe haꞌara.
⁷ Hwena nen de ngatannak de lowehen zi mo kim enho nakon elalak gwe zahe gwenkam, men kirekam ngatan zini Alap Zena enho lalak en nik gwe gwenda, nen hen esa tangan aha-ere enlalakam isrip-sri naban lowehe gwer. Dekam hwena nen de banakare karek maenak zarankam, Alap man neno mae mo karekna insa Tane Zem Yesus mo kalkam nep ngan gulsuk gwizimnira.
⁸ Zi de anakan zabenna, “Ano karekna hom,” zen hwena zenaka anakan boton ta gweꞌara, “Ëe an zini dawemna.” Kirekam men zen egu gwenan, zebon mae onak eiwa de enlalana hom tangan.
⁹ Hwena nen de Alap hon anakan ekira gwe-gwenkam, “Ëe mese kirekam karek gwek,” dekam sa Alap neno mae mo karekna insa nep tap gulsuk gwizimdi, hen neno mae mo kareksa de gon hap de enlala dowe hananna insa sa nep hom ta gwizimdi. Alap zere mo gu-gubiridanna Zen man tangan sul sone gwizimnira. Zep nen de nere mae mo karek-kareksa zere hon ekira-kla gwe-gwenna, Zen bejen nep tap gulsuzim srem gwen.
¹⁰ Alap mo olak anakan lwak, “Tingare zini kareksa nol gwenan.” Zep zi de anakan zabenna, “Ano karekna hom,” dekam hwena man nwe-mase gwenan– san de Alapsa de anakan gublunna, “Alap Zen boton tamna.” Kire zinik Alap mo ola man jawe guk hana gwenan.