¹ Toh tahiu panginan je inenga manjadi parapah akan dewa. Puna toto kilau koan oloh, "Itah handiai uras jari pintar." Tapi kapintar tau mawi oloh jadi balecak, tapi sinta mampahalap tirok-atei oloh.
² Oloh je manyangka ie are pangatawae, sapunae oloh te hindai mangatawan taloh en-en sampai handalem toto.
³ Tapi oloh je toto-toto sinta Hatalla, maka ie ingasene awi Hatalla.
⁴ Tuntang hal oloh kuman panginan je jari inyarah akan dewa, itah katawan hampatong-dewa te mamparahan taloh je jaton en-en ih. Tuntang itah katawan kea Hatalla baya ije; jaton je beken.
⁵ Puna are kea taloh je inyewut kambe atawa tuhan; aloh je aton intu langit atawa je aton hunjun petak.
⁶ Tapi akan itah, Hatalla te baya ije. Iete Bapa je manjapa taloh handiai. Baya Akae bewei itah belom. Tuntang Tuhan baya ije kea, iete Yesus Kristus. Mahalau Ie taloh handiai injapa, tuntang tagal Ie kea itah belom.
⁷ Aloh kalote, dia uras oloh mangatawan hal te. Belahe bihin aton oloh je manyembah dewa. Tagal te, toh ewen mahin mangkeme panginan je jari inyarah akan hampatong-dewa, jete panginan dewa. Maka amon ewen kuman panginan te, ewen mangkeme badosa; awi kapercayan ewen hindai dehen.
⁸ Sapunae panginan te kabuat dia mawi hubungan itah dengan Tuhan labih tokep. Amon itah kuman panginan te, itah dia mandino ontong en-en. Katambalike, amon itah dia kuman panginan te, itah mahin jaton rugi en-en.
⁹ Tapi bua-buah! Ela jete mawi buku sabab sampai oloh beken manjadi badosa -- awi kapercayae hindai dehen -- karana pahari bebas malalus taloh en bewei.
¹⁰ Maksudku kalotoh: Paribasae pahari, je kapercayae jari dehen, salenga mondok kuman panginan bara ancak taloh. Gawin pahari je kuman panginan ancak te gitan awi ije biti oloh beken. Amon kapercayan oloh beken te dia dehen, en jete dia mawi oloh te bahanyi kuman panginan je jari inenga akan hampatong dewa te?
¹¹ Tuntang tagal te maka kapercayan pahari mawi oloh je dia dehen kapercayae te manjadi layang. Padahal Kristus matei akan oloh te kea.
¹² Tuntang amon pahari mawi kasalan kilau te dengan kare pahari je Kristen -- iete pahari marusak kapercayan ewen je balemo -- maka pahari badosa taharep Kristus.
¹³ Jete bukue, amon panginan mawi sabab paharingku badosa, maka aku samasinde dia handak kuman daging te tinai. Basa ela-ela paharingku te badosa tagal aku.