¹ Aya-wal oso-wal, ee kime emsa golelowehe gwek, ee home dekam emsa anakan enlala gwibirida gwek, “An kitak Alap mo Enho naban nergweꞌan. Anik olk san denaka tawa ta gwibik.” Hwena ee ama emsa enlala gwibirida gwek, “An nama okama naban noldokot gweꞌan. Kristussu de taibliblannak nama wal baizil makan lowe heꞌan.”
² Ano emsa de tawa tabinni dekam wal baizilsi de momkam taizibin makan lwa gwek. Bong hap de tembanena bejen em twinbin. Hwena angkam hen kire nike nama lowe heꞌan!
³ Sap em namae auhu-kama nakore hole-hle en san ang ta gwenan. Em namae wal bose wal oban enaka enlala eibirida gwenan, “Zeno bosena bap zen abon onakon teipsiblin.” Zen in zebe enaka husus eibirida gwenan hen edarak-darak gwe-gwenan. Zen in zep man dam gwesik gwenan: Eno mae mo auhu-kama nakore hole-hlena man emsa irik tabirida nasen gwenan– san de em eKristen gwen srem zi!
⁴ Sap anakare nakon de enaka jakal gwibirida gwenna, “Ëe an Paulussu de ang gweblan wenya,” ahaksa, “Ëe an Apoloꞌa,” dekam man dam gwesik gweꞌan: Em in nama auhu-kama enlala nabane lowehe gweꞌan.
⁵ Ëe dwan Apolos han apdenak– Alap mo nganak de syal e gwen zi dare sake. Alap mes sren-srenkam abe nikip syala wei yul sonezimki, hen em dekon zebe eei gwek.
⁶ Ëe an eiyas ta gwen hap de zini. Apolos zen hokam de hle tablanda gwen hap de zini. Hwena Alap Zen zep sipni insa gubirida gwenda, “Em esaltin, hendep eisi em eten.”
⁷ Zep ee eiyas tan hap de zini hen sap hle tablanda gwen hap de zini, ee mam dare naka hom. Diki mamna Bian Ze-en, sap Zen Zen syal gwe-gwibirida– dekam de eisi eten hap denaye.
⁸ Zep eiyas tan hap de zi niban hle tablanda gwen hap de zi niban apdenak– teipsin niye. Alap sa zeno mae mo syal hap de dawemna lamkam golzimdi– zere mae mo syal jam enkam.
⁹ Zep ee apdekam ere mo syal bosyan naban Bian mo syalsae oꞌan. Em in san de Alap mo nga. Ahaksa em in san de Alap hap de golsa de ee syal gweblanna.
¹⁰ Sap Alap zere mo kwasang-kwasang nakon asa zer inki, ee zebe zere mo gola in mo mokona eiyas tak– san de ee gol syal gwe-gweblan hap de tewesin zi. Angkam hwena aha zi ayang da ine gweꞌan. Men zen kirekam angkam syal ta gweꞌan, zen dawem enkam zen syal gwe-gweblan.
¹¹ Sap ano tawa tabin nikon, em zebe tame uk, “Neno mae mo ngirin bol te makare Zini, Zen Kristus.” Zep zini toton bejen aha tesya bolak etan ik gin– aha tawa tabinsi de ze mas gunkumye.
¹² Zep angkam zini man gol yala insa de ayang-ayang tan hap sren-srenkam ealp gwe-gweꞌan. Ahakon emaskam de syal gweblan hap, ahakon perakkam dep, hen ahakon kaso lilingtinkim dep. Hwena ahakon hen te olsoskam de syal gweblan hap ealp gwe-gweꞌan, hen ahakon jaba alakam dep, hen ahakon endang ala sasankam dep.
¹³ Hwena ano mae mo syal gweblan gol yala in Bian sa zere mo klis gun hup de yakla yalak de zaunnuk akasibli zala. Zen syaukkum de ang tankam sa akasiblila– dekam de ze hla tan hap, “San ha zeno mae mo abe hap de gol syal gweblanna an nama sa zaulu?”
¹⁴ Men zeno syal gweblan nakon de taibli srem gweꞌanka, zen zen sa dawemna nulin.
¹⁵ Hen men zeno mae mo syal gweblan nakon de syauknu in hap taibliꞌanka, zen molya ba maena nulink. Zena enna sa engaya gwer, hwena zeno mae mo nwe-masena san de gol zik de taiblin nakon de heya gwenna– ba maesa de golheya gwen sremkam.
¹⁶ Em san home tame uk? Nen an dwan Alapsa dekon boklesa kom so gweblan hap de gol makanke. Alap mo Enhona kitak nebon mae am gwe gwenda.
¹⁷ Zi de Alap mo gola insa karek gunkum, Alap sa hwena desa karek tala. Sap gola in zen Alap Zere en hap dena– lalakna. Hen kitak de Kristen zini nen an zen– gola inye.
¹⁸ Bahem enaka boton ta gwibin. Zi de ebon mae onakon zere mo auhu-kama enlalasa anakan enlala gweblanna, “Ano enlalana blala,” dawemna zen diki nonol okama nakore enlala blala insa zen tihis tan– dekam de hwena eiwa de enlala blalsa zer irin hipye.
¹⁹ Sap mensa auhu-kama enlala wenya ‘enlala blal’kam nen gweblanan, zen hwena Alap mo nwenak joblo-topna. Men kirekam zere mo olak lwak, “Zini men zen tim nul gwenan, ‘Ëe asa ere mo nwe hleng gwen nakon dawem gwer,’ kire zi hip man Alap zere mae mo nwe hleng gwenna insa li yul sone gwizimnira– zen de zere mae hap hep makan lwazimdin hip.”
²⁰ Hen ahana man lwak, “Okamanak mensa nenbirida gwenan, ‘Zini in enlala blala,’ hwena Alap man desa enlala gwibirida gwenda, ‘Zeno mae mo enlala blala in waba hap.’”
²¹ Zep nen bap nen Kristen bosyansa anakarekam boltere ta gwibin, “Ëe zebon de ang tanna.” Sap nen men zen Kristus hun eraha-en gwek, Alap mes nebe mae hap golzimki– nen de kitak teipsin-teipsinkim lowehen hap denaye.
²² Sap ee, Apolos, hen Petrus, ee hen teipsin-teipsin nika hom, hwena ee ama Alap hon de babu gwen zi makan emsa mas eibirida gweꞌan. Angkam em hen mese Kristus hun eraha-en gwek, zep nen angkam kitak teipsin zi mo kime bi eibiꞌin– sap angkam de okamana ansa, hen ngein sin dep dena, hen sap juwen hap dena, hen engaya gwen hap dena.
²³ Zen mae hap ki lwaꞌan: Sap nen mese Kristus hun eraha-en gwek, hen Zen mes Bian Alap han aha-en eka.