¹ Aya-wal oso-wal, ee kime ebon mae hatak– Alap onakore ol dawemkam dikim emsa tawa tabin hip, ee home ere mo ola sam-sam gul gwek– dekam de em asa enlala gweblan hap, “Zini an zeno enlalana blala.”
² Sap ee mese enlalana anakan hohle ta guk, “Ëe de zebon mae gwenkam, ee Kristus Yesus de zebe mae hap te-lidak sonnak tin en hap denaka asa tawa ta gwibir.”
³ Ëe kime eban mae golelowehe gwek, ee dekam sin-sinni, hen airin hip ama yal-yal gwe-gwek.
⁴ Ano tawa tabinni dekam, ee home ola sam-sam gul gwek– dekam de em asa enlala gweblan hap, “Zini an zeno ola soson tanganna– enlala blala ban.” Hwena ee Alap mo Enhonake yaing gwe kini gwek– anakare enlala naban, “Zen Zen sa zebe mae hap zere mo sosonna goltrei gwizimdi– banakare owas maesa de syal gwibir-zimdinkim.” Hendep em zebe zeno sosonna hla kuk.
⁵ Ëe mae habe kirekam gwek– em dikim auhu-kama nakore enlala blalsa abon hla tan srem hap, hen desa de em taiblibin srem hap. Hwena aena diki anakaresa de hlaulblun habe sam gwesik, “Zen Alap mo soson nakon syal gwe-gwenda.”
⁶ Hwena Kristen zini neno mae mo tawa tabinni, Kristus de nebe mae hap te-lidak sonnak tin hip dena, zen sap enlala blala ban. Hwena auhu-kama ennak de enlala elwa gwen zini bejen enlala blala insa tame tan, sap zen Alap onakorena. Diki men zen Kristus hun de zeraha-en gwennak ezise gweꞌan, zen en sa enlala blala insa tame da gwer. Sap enlala blala men dekam tawa la gwibirin, zen auhu-kamana an kore naka hom, hen men zen angkam teipsinkim irik nil gweꞌan, zen hen dekore naka hom. Zeno mae mo irik ginni in nabakam sa jek-jak gwer.
⁷ Hwena enlala blala men dekame tawa la gwibirin, zen Alap zere onakorena– mensa menkam zi hip aning ta gwizimkike. Hwena Zen sap orep mes okamana ansa de yang gulsun sremnak nesa anakan kalang gwibiridaka, “Enlala blala bare ol dawemna in san de ang tankam, zen zen sa ere mo ngatannak yaing gwer.”
⁸ Okamana awe de teipsin-teipsin wenya hom Alap mo enlala blal aning tanna insa tame dak. Sap zen de tame dananam, ki molya ngatan zi mo lang nakore Teipsin Zini Yesussu te-lidak sonnak makan da inninam.
⁹ Hwena enlala blala insa de tame tan hap dena, desa mes Alap nebe mae hap golzimki– men kirekam zere mo olak lwakke, “Zi mo hlaun sremna, hen sane gwen sremna, hen enlala gwibin sremna, desa mes Alap hamal gulzimki– men zen Zenaka enna nola gweblananke, zen en de desa tame gul gwen hap.”
¹⁰ Hwena zen in zebe nen angkam Alap mo enlala blal aning tanna insa tame la gwenan, sap nen zere mo Enho nabane lowehe gwenan. Sap zere mo Enhona Zen kitak hendep olk en san denaka tame gul gwenda– sap Alap zere mo enlala aning tanna hendep kitak.
¹¹ Men kirekam hen zi mo enlalana, zen diki zini in zen en de tawa gweblan. In zep hen kirekam Alap mo enlalana zen diki Alap zere mo Enho en de tawa gweblan.
¹² Nen auhu-kamana an kore enhosa home eirink. Nen hwena Alap zere mo Enhosae eirink. Zen in zebe tame ul gweꞌan– dawemna mensa Alap totoresa nebe mae hap gol gwizimꞌira, Kristus hun de zeraha-en gwenkam.
¹³ Zep nen in dekame tawa la gwibirin, zen auhu-kama zi mo enlala blala korena kim hom. Zen Alap zere mo Enho nakore enlala blalkame tawa la gwibirin. Zen in zep Alap zere mo Enho naban de zergwen zi enna dam nulsuk gwenan.
¹⁴ Alap mo Enho naban de zergwen srem zini, zen bejen Alap mo Enho nakore enlala blala insa dokwak tan. Zebe mae hap man nwe-mase gwe-gwizimnin– san de asyas ol. Tame gun hup ki sap ealp gwe-gwenan, hwena Alap mo Enho naban de zergwen sremkam, toton bejen tame gun.
¹⁵ Hwena Alap mo Enho naban de zergwen zini, nen ema tingare tawa tabinni anakan klis ul gwenan, “An eiwa Alap mo Enho nakorena. An dekore naka hom.” Hwena auhu-kama enlala zi bejen nesa anakan tame tabin, “Alap man zeno mae mo tawa tabinni sam gwesik gwibiꞌira,” ahaksa, “Zen hom sam gwesik gwibiꞌira.” Zen diki Bian Zen sa kirekam klis gulu.
¹⁶ Zep Alap mo olak man anakan lwak, “Zini toton banakan dep? – Bian Alap mo enlalasa de tame tan naye. Zep nen toton bejen nen ol zim-zimsi zebe hap golblan.” Sap eiwa kirekam lwak, hwena angkam Kristus mo enlalana nebon mae onak lwaꞌara!